历代志上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
17:1 拿单hō͘大卫ê信息
(撒下7：1-17)
大卫tòa tī伊ê宫内，大卫对拿单先知讲：「你看，我tòa tī柏香柴ê宫内，总是，上主ê约柜tī帐房内。」
17:2 拿单kā大卫讲：「见若tī你心内所想ê，thang照ánne行，因为上主kah你同在。」
17:3 Hit暝，上主ê话临到拿单讲：
17:4 「你去kā我ê奴仆—大卫讲：上主ánne讲：『你m̄ thang起厝hō͘我tòa，
17:5 因为tùi我chhōa以色列起来ê日到今á日，我m̄ bat tòa tī厝内，是tùi chitê布棚到hitê布棚，tùi chitê帐房到hitê帐房。
17:6 见若我kah以色列人所到ê所在，tī我所吩咐照顾我ê人民ê以色列ê士师中，我kám bat对in一个人讲：『你ná ē无kā我起柏香柴ê厝？』
17:7 「Taⁿ你tio̍h去kā我ê奴仆—大卫讲：万军ê上主ánne讲：『我bat tī羊椆，tùi teh顾羊来召你，做我ê子民—以色列人ê君王。
17:8 见若你所bat去ê所在，我tiāⁿ-tiāⁿ kah你同在，tī你ê面前剿灭你所有ê对敌；我beh hō͘你大出名，亲像地chiūⁿchiahê伟人ê名声。
17:9 而且我ē kā我ê子民—以色列人定tio̍h一个所在，来栽培in，hō͘ in tòa kakī ê所在，无koh迁徙；凶恶ê人mā无亲像起头ánne kā in陷害，
17:10 mā无亲像我命令士师治理我ê子民—以色列人ê时。我ē hō͘你ê对敌lóng屈服。我koh kā你讲，上主ē kā你建立一个家。
17:11 到你ê日子满足，tńg去你ê祖先hia，我ē hō͘你ê kiáⁿ孙续接你ê位，我mā ē坚固伊ê国位。
17:12 伊ē kā我起厝，我ē坚固伊ê座位到永远。
17:13 我ē做伊ê天父，伊ē做我ê kiáⁿ；我无beh hō͘我ê慈爱离开伊，亲像我早前hō͘它离开hitê你前一个王。
17:14 我mā ē永远坚固伊tī我ê家，tī我ê国；伊ê座位mā ē坚固到永远。』」
17:15 拿单就照chiahê话，chiahê默示，去kā大卫讲。
17:16 大卫感恩ê祈祷
(撒下7：18-29)
大卫王to̍h入去，坐tī上主ê面前，讲：「上主—上帝ah，我是啥人，我是啥物款ê家，祢chiah chhōa我到chitê地步？
17:17 上帝ah，祢看chitê iáu掠做是小khóa，因为祢koh讲tio̍h祢ê奴仆ê家到tī久长。上主—上帝ah，祢款待我亲像尊贵ê人ê地位。
17:18 大卫iáu有啥物话thang对祢讲到祢ê奴仆所得tio̍h ê尊贵？因为祢真了解祢ê奴仆。
17:19 上主ah，因为祢ê奴仆ê缘故，koh照祢ê心意，祢有行chitê大事，koh显出chiahê大事。
17:20 上主ah，照阮ê耳孔所听tio̍h ê，无一个亲像祢，祢以外无别个真神。
17:21 地chiūⁿ有tó一国亲像祢ê子民—以色列人，to̍h是上主早前去救赎in来做kakī ê人民，hō͘祢tùi极大koh thang惊ê tāichì得tio̍h名，因为赶逐列国离开祢ê子民，to̍h是祢所救赎出埃及hiahê人民ê面前。
17:22 因为祢hō͘祢ê子民—以色列人做祢ê子民，一直到永远；上主ah，祢mā做in ê上帝。
17:23 上主ah，taⁿ祢所讲tio̍h祢ê奴仆kah伊ê家ê话，愿它坚固到永远，求祢照祢所讲来行。
17:24 愿祢ê名永远坚固，受尊做大，讲：『万军ê上主是以色列ê上帝，是做以色列ê上帝。』祢ê奴仆—大卫ê家ē tī祢ê面前坚固。
17:25 我ê上帝ah，因为祢有启示hō͘祢ê奴仆知，祢ē kā伊建立一个家，所以，祢ê奴仆好胆tī祢ê面前祈祷。
17:26 上主ah，只有祢是上帝，祢用chitê福气应允祢ê奴仆。
17:27 Taⁿ祢欢喜赐福hō͘祢ê奴仆ê家，hō͘伊永远tī祢ê面前。上主ah，因为祢已经赐福，我一定永远得tio̍h福气。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。