创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
35:1 上帝tī伯特利赐福雅各
上帝kā雅各讲：「起来！去伯特利，tòa tī hia，koh tio̍h tī hia kā上帝起一座坛；to̍h是你闪避你ê阿兄以扫ê面ê时，对你出现ê hit位。」
35:2 雅各to̍h kā全家以及所有kah伊tī ・leh ê人讲：「Lín tio̍h除去lín中间ê外邦神明，mā tio̍h kakī 清气，换lín ê衫裤。
35:3 咱tio̍h起来，来去伯特利，我beh tī hia kā上帝起一座坛，to̍h是tī我tú tio̍h患难ê日，应允我ê祈祷，tī我所行ê路kah我同在ê hit位。」
35:4 Into̍h kā in手内所有异邦ê神明kah in ê耳钩，lóng hō͘雅各，雅各kā hiahê物件埋tī示剑hia ê橡树脚。
35:5 Into̍h出发，上帝hō͘四箍围ê城ê人lóng真tio̍h惊，in to̍h无去jiok雅各ê众kiáⁿ。
35:6 雅各以及所有kah伊做阵ê人，来到迦南地ê路斯，to̍h是伯特利。
35:7 伊tī hia起一座坛，to̍h kā hit所在号名，叫做El-be-thel，因为伊闪避伊ê阿兄ê时，上帝tī hia对伊出现。
35:8 利百加ê奶母底波拉死去，就埋葬tī伯特利下面ê橡树脚，所以kā它叫做A-lûn-pa-kó͘（注：希伯来文ê音读，意思是「哀伤ê橡树」）。
35:9 雅各tùi巴旦亚南tńg来，上帝koh对伊出现，赐福hō͘伊。
35:10 上帝koh kā伊讲：「你ê名是雅各，taⁿ以后你ê名无koh叫雅各，beh叫做以色列。」他to̍h叫伊ê名以色列。
35:11 上帝koh kā伊讲：「我是全能上帝，你tio̍h生湠真chē，将来有一国，koh有真chē国tùi你来生，koh有君王tùi你来出世。
35:12 我所hō͘亚伯拉罕kah以撒ê地，我beh hō͘你，mā beh kā chitê地hō͘你ê kiáⁿ孙。
35:13 上帝to̍h tùi kah伊讲话ê所在上天。
35:14 雅各to̍h tī上帝kah伊讲话ê所在khiā一支石柱，tī hit顶面灌奠倒油。
35:15 雅各就称上帝kah伊讲话ê所在叫做伯特利。
35:16 拉结难产死去
In tùi伯特利出发，离开以法他 iáu有一站á路ê时，拉结临产，tú tio̍h有艰难。
35:17 当她艰苦生ê时，产婆对她讲：「M̄免惊，你taⁿ beh koh得tio̍h一个kiáⁿ。」
35:18 她ê气kiōng-beh断; 临终ê时，to̍h kā她ê kiáⁿ ê名号做Biān-o͘-nî。M̄ koh，伊ê老父kā伊号名叫做便雅悯。
35:19 拉结死，埋葬tī去以法他ê路；以法他to̍h是伯利恒。
35:20 雅各khiā柱tī她ê墓顶。Chitê柱to̍h是拉结ê墓牌，到今á日iáu tī ・leh。
35:21 以色列koh出发去，tī E-tel了望台搭布棚。
35:22 雅各ê Kiáⁿ儿
以色列tòa tī hit所在ê时，流便去kah伊ê老父ê细姨辟拉做伙困，以色列mā有听tio̍h风声。
35:23 雅各总共有十二个kiáⁿ。利亚ê kiáⁿ，to̍h是雅各ê大kiáⁿ流便，以及西缅、利未、偤大、以萨迦、西布伦。
35:24 拉结ê kiáⁿ，to̍h是约瑟、便雅悯。
35:25 拉结ê女婢辟拉所生ê kiáⁿ，to̍h是但kah拿弗他利。
35:26 利亚ê女婢悉帕所生ê kiáⁿ有迦得、亚设。Chiahê是雅各tī巴旦亚南所生ê kiáⁿ。
35:27 以撒ê死亡
雅各来见伊tī幔利ê老父以撒，来到基列亚巴，to̍h是希伯仑，亚伯拉罕kah以撒bat寄脚ê所在。
35:28 以撒食到一百八十岁。
35:29 以撒年岁老，日子满足，气断来死，tńg去伊ê祖先hia。伊两 个kiáⁿ以扫kah雅各kā伊埋葬。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。