列王纪上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
5:1 Só͘-lô-móng Chún-pī Khí-chō Sèng-tiān
( LTH 2: 1-18)
Tu-lô ông Hi-lâm chhe i ê lô͘-po̍k khì kìⁿ Só͘-lô-móng, in-ūi i thiaⁿ tio̍h lâng ēng iû kā i boah lâi sòa-chiap i ê lāu-pē chò ông; in-ūi Hi-lâm pêng-sî thiàⁿ Ta-bi̍t.
5:2 Só͘-lô-móng mā chhe lâng khì kìⁿ Hi-lâm, kóng,
5:3 " Lí chai góa ê lāu-pē Ta-bi̍t, in-ūi sì-kho͘-ûi sì-hng ê kau-chiàn, bē tàng ūi Siōng-chú — i ê Siōng-tè ê miâ khí tiān, it-ti̍t kàu Siōng-chú kā tùi-te̍k hē tī i ê kha chêng.
5:4 Taⁿ Siōng-chú — góa ê Siōng-tè í-keng siúⁿ-sù góa sì-hng pêng-an, tì-sú bô tùi-te̍k, bô chai-hō.
5:5 Góa ê ì-sù sī beh ūi Siōng-chú — góa ê Siōng-tè ê miâ khí tiān, sī chiàu Siōng-chú èng-ín góa ê lāu-pē Ta-bi̍t ê ōe, I kóng, ' Góa beh hō͘ lí ê kiáⁿ sòa-chiap lí, chē lí ê ūi, i beh ūi góa ê miâ khí tiān. '
5:6 Só͘-í, chhiáⁿ lí bēng-lēng lâng, tī Le-ba-nòng kā góa chhò pek-hiuⁿ chhâ, góa ê lô͘-po̍k ē kah lí ê lô͘-po̍k chò-hóe chò, góa mā ē chiàu kiàn-nā lí só͘ tiāⁿ tio̍h ê, kā lí ê lô͘-po̍k ê kang-chîⁿ kau hō͘ lí, in-ūi lí chai, tī goán tiong-kan bô lâng chhin-chhiūⁿ Si-tòng lâng hiah gâu chhò chhiū. "
5:7 Hi-lâm thiaⁿ tio̍h Só͘-lô-móng ê ōe, chiū chin hoaⁿ-hí, kóng, " Kin-á-ji̍t eng-kai oló Siōng-chú, in-ūi I siúⁿ-sù Ta-bi̍t chi̍t-ê ū tì-hūi ê kiáⁿ, lâi tī-lí chiah chē ê jîn-bîn. "
5:8 Hi-lâm chhe lâng khì kìⁿ Só͘-lô-móng kóng, " Lí chhe lâng só͘ tùi góa kóng ê tāichì, góa ū thiaⁿ-.tio̍h; kóng tio̍h pek-hiuⁿ chhâ kah siông chhiū ê chhâ, góa ē chiàu lí ê sim-goān lâi chò.
5:9 Góa ê lô͘-po̍k ē tùi Le-ba-nòng kā i ūn lo̍h hái, góa ē ká kui pâi phû tī hái-.ni̍h, kàu lí só͘ kā góa chí-tēng ê só͘-chāi, góa ē tī hia thiah-khui, lí thang chiap-siu; lí ēng chia̍h-mi̍h hō͘ góa ê ke, chiâⁿ góa ê sim-goān. "
5:10 Hi-lâm chiū ēng pek-hiuⁿ chhâ kah siông chhiū ê chhâ, chiàu i it-chhè só͘ ài ê hō͘ Só͘-lô-móng.
5:11 Só͘-lô-móng hō͘ Hi-lâm nn̄g bān kol ê sió-be̍h, jī-cha̍p kol ê chheng-iû, chò i chhù lāi ê chia̍h-mi̍h. Só͘-lô-móng ta̍k nî chiàu ánne hō͘ Hi-lâm.
5:12 Siōng-chú chiàu I só͘ èng-ín ê, siúⁿ-sù tì-hūi hō͘ Só͘-lô-móng. Hi-lâm kah Só͘-lô-móng ê tiong-kan ū hô-pêng, in nn̄g lâng chò-hóe li̍p-iok.
5:13 Só͘-lô-móng ông tùi I-su-la-el jîn-bîn ê tiong-kan phài lâng-kang, só͘ phài ê lâng-kang kiōng saⁿ bān.
5:14 I ta̍k goe̍h-ji̍t lûn-liû phài chi̍t bān lâng kàu Le-ba-nòng; só͘-í in chi̍t goe̍h-ji̍t tī Le-ba-nòng, nn̄g goe̍h-ji̍t tī chhù lāi. A-to-nî-lâm sī hū-chek tok-kang ê.
5:15 Só͘-lô-móng ū taⁿ kang chhit bān, ū peh bān lâng tī soaⁿ-.ni̍h phah chio̍h.
5:16 Chiahê í-gōa, Só͘-lô-móng ū ēng tok-kang ê tōa-koaⁿ saⁿ-chheng saⁿ-pah lâng, in kàm-tok hiahê chò-kang ê lâng.
5:17 Ông chhut lēng, in chiū ūn tōa chio̍h kah pó-pòe ê chio̍h, ēng phah hó ê chio̍h lâi hē chò chhù ê tē-ki.
5:18 Só͘-lô-móng ê sai-hū kah Hi-lâm ê sai-hū, í-ki̍p Ge-bal lâng lóng phah chio̍h, koh chún-pī chhâ-liāu kah chio̍h, lâi khí sèng-tiān.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。