撒母耳记下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
17:1 Hu-sia Phò-hoāi A-hi-to-hoel ê Kè-bô͘
A-hi-to-hoel koh kā Αp-sa-lôm kóng, " Chhiáⁿ lí chún góa kéng chi̍t-bān nn̄g-chheng lâng, kim-mê góa beh chhut-hoat khì jiok Ta-bi̍t,
17:2 thàn i ià-siān chhiú nńg, góa ē jiok tio̍h i, hō͘ i kiaⁿ-hiâⁿ, tòe i ê jîn-bîn ē lóng tô-cháu, góa chiū kantaⁿ thâi-sí ông niā-niā,
17:3 hō͘ chèng lâng lóng kui lí. Lí só͘ chhōe hit-ê lâng sī chhin-chhiūⁿ kûn-chiòng tò tńg-.lâi, ánne jîn-bîn chiū lóng pêng-an. "
17:4 Αp-sa-lôm kah I-su-la-el ê tiúⁿ-ló lóng lia̍h chit-ê ōe chò hó.
17:5 Αp-sa-lôm kóng, " Tio̍h kiò Al-kih lâng Hu-sia lâi, lán mā thang thiaⁿ i só͘ kóng ê. "
17:6 Hu-sia lâi-kàu Αp-sa-lôm hia, Αp-sa-lôm kā i kóng, " A-hi-to-hoel kóng ánne, lán kám tio̍h chiàu i ê ōe kiâⁿ? Nā bô, lí chiū tio̍h kóng! "
17:7 Hu-sia kā Αp-sa-lôm kóng, " A-hi-to-hoel chit pái só͘ kè-ōe ê m̄-hó. "
17:8 Hu-sia koh kóng, " Lí chai lí ê lāu-pē kah tòe i ê lâng, lóng sī ióng-sū, taⁿ in ê sim béng-lia̍t, chhin-chhiūⁿ tī chhân-iá sit-lo̍h kiáⁿ ê hîm-bú, jî-chhiáⁿ lí ê lāu-pē sī chiàn-sū, it-tēng bô kah jîn-bîn chò-hóe hioh.
17:9 Lí khòaⁿ, i taⁿ bih tī soaⁿ-kheⁿ-á-.sī pa̍t só͘-chāi, nā ū kúi-nā-ê lâng tāi-seng hō͘ i thâi-sí, kiàn-nā thiaⁿ-.tio̍h ê lâng ē kóng, ' Tòe Αp-sa-lôm ê jîn-bîn tiong-kan ū lâng siū thâi. '
17:10 Sûi-jiân ū lâng hó-táⁿ, in ê sim chhin-chhiūⁿ sai ê sim, mā ē lóng siau-iûⁿ khì; in-ūi I-su-la-el lâng lóng chai lí ê pē sī ióng-sū, tòe i ê lâng mā lóng sī hó-táⁿ ê.
17:11 Só͘-í, góa kiàn-gī, tio̍h hō͘ I-su-la-el jîn-bîn, tùi Tàn kàu Bel-sí-bah, chū-chi̍p lâi lí chia, chhin-chhiūⁿ hái piⁿ ê soa hiah chē, lí mā chhin-sin tok-tīn.
17:12 Án-ne, bô-lūn tī siáⁿ-mi̍h só͘-chāi tú tio̍h i, lán ē-tàng kong-kek i, lo̍h tī i ê téng-bīn chhin-chhiūⁿ lō͘-chúi lo̍h tī tē-.ni̍h chi̍t-iūⁿ, hō͘ i kah tòe i ê lâng bô lâu kah pòaⁿ-ê.
17:13 I nā ji̍p siâⁿ, I-su-la-el jîn-bîn ē tòa soh-á kàu hit-ê siâⁿ, lán ē kā i thoa lo̍h hô, tì-sú tī hia bô khòaⁿ tio̍h chi̍t tè chio̍h-thâu-á. "
17:14 Αp-sa-lôm kā I-su-la-el jîn-bîn kóng, " Al-kih lâng Hu-sia ê kè-ōe, pí A-hi-to-hoel ê kè-ōe khah hó! " In-ūi Siōng-chú tiāⁿ tio̍h ē phò-hoāi A-hi-to-hoel ê hó kè-ōe, tì-sú Siōng-chú thang kàng chai-hō hō͘ Αp-sa-lôm.
17:15 Ta-bi̍t Chiap tio̍h Kéng-kò Chiū Tô-thoat
Hu-sia kā Cha-tok chè-si kah A-bi-a-thal kóng, " A-hi-to-hoel kā Αp-sa-lôm kah I-su-la-el ê tiúⁿ-ló só͘ kè-ōe ê sī ánne, ánne, góa só͘ kā i kè-ōe ê sī ánne, ánne.
17:16 Taⁿ lín tio̍h kóaⁿ-kín chhe lâng khì kā Ta-bi̍t kóng, ' Kim-mê m̄ thang tòa tī khòng-iá ê tō͘-kháu, it-tēng tio̍h kòe hô, bián-tit ông kah tòe i ê lâng lóng siū thun-bia̍t. '"
17:17 Hit sî, Io-ná-than kah A-hi-mâ-chu tiàm tī Ian-lo-gel teh thèng-hāu, in-ūi m̄-káⁿ hō͘ lâng khòaⁿ tio̍h in ji̍p siâⁿ. Ū chi̍t-ê lú-pī lâi kā in kóng, in chiū khì kā Ta-bi̍t ông kóng.
17:18 Chóng-.sī, ū chi̍t-ê gín'á khòaⁿ tio̍h in, chiū khì kā Αp-sa-lôm kóng. In nn̄g lâng kóaⁿ-kín chàu kàu Ba-hu-lîm bó͘ lâng ê chhù, hit-ê lâng ê īⁿ lāi ū chéⁿ, in nn̄g lâng chiū lo̍h-khì hia.
17:19 Hit ke ê chabó͘ lâng ēng kòa khàm chéⁿ-chhùi, téng-bīn pho͘ be̍h-sap, tāichì chiū bô lāu-sia̍p.
17:20 Αp-sa-lôm ê lô͘-po̍k lâi-kàu chabó͘ lâng hit keng chhù, mn̄g i kóng, " A-hi-mâ-chu kah Io-ná-than tī tó-ūi? " Cha-bó͘ lâng kóng, " In kòe khe khì à. " Lô͘-po̍k khì chhōe in, chhōe bô tio̍h, chiū tńg-khì Ê-lú-sa-lèm.
17:21 In tńg-khì liáu-āu, nn̄g lâng tùi chéⁿ té khí-.lâi, khì kā Ta-bi̍t ông kóng, " Lín tio̍h khí-.lâi, kóaⁿ-kín kòe chúi, in-ūi A-hi-to-hoel ū ánne, ánne kè-ōe, beh hāi lí. "
17:22 Ta-bi̍t kah tòe i ê lâng chiū khí-.lâi, kòe-khì Iol-tàn. Kàu thiⁿ-kng, bô chhun kah chi̍t-ê lâng bô kòe Iol-tàn.
17:23 A-hi-to-hoel khòaⁿ tio̍h bô chiàu i ê kè-ōe kiâⁿ, chiū chún-pī lî chhut-hoat, tńg-khì i ê siâⁿ, kàu i ê ke, hoan-hù i ê ka-sū, chiū kakī tiàu-tāu sí, bâi-chòng tī i ê lāu-pē ê bōng.
17:24 Ta-bi̍t lâi-kàu Ma-há-niam, Αp-sa-lôm kah tòe i ê I-su-la-el lâng, mā lóng kòe-khì Iol-tàn.
17:25 Αp-sa-lôm siat-li̍p A-ma-sa chò kun-tiúⁿ lâi tāi-thè Io-ap. A-ma-sa sī I-su-la-el lâng, E-te̍l-la̍h ê kiáⁿ. E-te̍l-la̍h bat kah Na-ha-si ê chabó͘ kiáⁿ A-bi-ga-il tâng-pâng; chit-ê A-bi-ga-il kah Io-ap ê lāu-bú Che-lú-iah sī chí-mōe.
17:26 I-su-la-el lâng kah Αp-sa-lôm chat iâⁿ tī Gi-lia̍t tē.
17:27 Ta-bi̍t lâi-kàu Ma-há-niam hit sî, Am-móng cho̍k ê Lap-bah lâng Na-ha-si ê kiáⁿ Sok-pí, Lô-tí-pa lâng Am-mí-el ê kiáⁿ Ma-kil, Gi-lia̍t ê Lô-ki-lîm lâng Bal-chi-lâi,
17:28 tòa chhn̂g-pho͘, phûn, hûi-khì, sió-be̍h, tōa-be̍h, mī-hún, chhá ê ngó͘-kok, tāu-á, âng-tāu,
17:29 bi̍t, leng-iû, iûⁿ kah gû-leng-piáⁿ, kiong-kip Ta-bi̍t kah tòe i ê lâng thang chia̍h; in-ūi in kóng," Jîn-bîn tī khòng-iá it-tēng ē iau, ià-siān koh chhùi-ta."
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。