撒母耳记下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
16:1 Ta-bi̍t kah Chi-bah
Ta-bi̍t kòe soaⁿ téng bô gōa hn̄g, khòaⁿ tio̍h Me-hui-bo-siat ê lô͘-po̍k Chi-bah lâi tú tio̍h i, i tòa kòa-oaⁿ ê lî nn̄g chiah, chài piáⁿ nn̄g pah, phû-tô koaⁿ chi̍t pah pha, joa̍h-thiⁿ ê kóe-chí chi̍t pah kah chiú chi̍t phôe-tē-á.
16:2 Ông mn̄g Chi-bah kóng, " Lí tòa chiahê lâi sī siáⁿ-mi̍h ì-sù? " Chi-bah kóng, " Lî sī beh hō͘ ông ê ka-koàn khiâ, piáⁿ kah joa̍h-thiⁿ ê kóe-chí, sī beh hō͘ siàu-liân lâng chia̍h, chiú sī beh hō͘ tī khòng-iá ià-siān ê lâng lim. "
16:3 Ông mn̄g kóng, " Lí ê chú-lâng ê kiáⁿ tī tó-ūi? " Chi-bah ìn ông kóng, " I iû-goân tī Ê-lú-sa-lèm, in-ūi i kóng, ' I-su-la-el lâng kin-á-ji̍t beh kā góa ê pē ê kok hêng góa. '"
16:4 Ông kā Chi-bah kóng, " Me-hui-bo-siat só͘-ū ê lóng kui hō͘ lí. " Chi-bah kóng, " Góa kūi-pài, goān tī góa ê chú — góa ê ông ê bīn-chêng tit tio̍h un-tián. "
16:5 Ta-bi̍t kah Si-mí
Ta-bi̍t ông lâi-kàu Ba-hu-lîm ê sî, lí khòaⁿ, ū Sàu-lô cho̍k ê ke chi̍t-ê lâng chhut-.lâi, to̍h-sī Ki-la̍h ê kiáⁿ, miâ kiò-chò Si-mí. I chhut-.lâi, ná kiâⁿ ná chiù-chó͘,
16:6 koh khioh chio̍h-thâu tìm Ta-bi̍t kah Ta-bi̍t ông ê jîn-sîn. Hit sî, chèng lâng kah ióng-sū lóng tī ông ê chó-iū.
16:7 Si-mí chiù-chó͘ kóng, " Lí chit-ê lâu lâng ê hoeh ê lâng, lí chit-ê pháiⁿ lâng, khì! Cháu-khui!
16:8 Lí thè Sàu-lô chò ông, taⁿ Siōng-chú kā i ê ke ê hoeh lóng kui tī lí, Siōng-chú kā chit-ê kok kau tī lí ê kiáⁿ Αp-sa-lôm ê chhiú. Taⁿ lí tú tio̍h ok-pò, in-ūi lí sī lâu lâng ê hoeh ê lâng. "
16:9 Che-lú-iah ê kiáⁿ A-bi-sai kā ông kóng, " Chit chiah sí-káu, kám thang chiù-chó͘ góa ê chú — góa ê ông? Kiû lí chún góa kòe-.khì, koah i ê thâu. "
16:10 Ông kóng, " Che-lú-iah chiahê kiáⁿ, góa kah lín ū siáⁿ-mi̍h khan-liân? Chhut-chāi i chiù-chó͘, in-ūi Siōng-chú hoan-hù i kóng, ' Lí tio̍h chiù-chó͘ Ta-bi̍t. ' Án-ne siáⁿ lâng káⁿ kóng lí ná ē ánne chò? "
16:11 Ta-bi̍t koh kā A-bi-sai kah i ê jîn-sîn kóng, " Góa chhin-seⁿ ê kiáⁿ siōng-chhiáⁿ siàu-siūⁿ góa ê sèⁿ-miā, hô-hòng chit-ê Biān-iá-mín lâng? Iông-ín i, chhut-chāi i chiù-chó͘, in-ūi che sī Siōng-chú kiò i ánne chò ê.
16:12 Kiám-chhái Siōng-chú kàm-chhat góa ê oan-óng, in-ūi i kin-á-ji̍t ê chiù-chó͘, Siōng-chú ē ēng hó lâi kā góa pò-èng. "
16:13 Ta-bi̍t kah tòe i ê lâng kiâⁿ lō͘ khì. Si-mí kiâⁿ tī i sio-tùi ê soaⁿ-phiâⁿ, ná kiâⁿ ná chiù-chó͘, koh tìm chio̍h-thâu, iā thô͘.
16:14 Ông kah tòe i ê jîn-bîn chin ià-siān, lâi-kàu chi̍t-ê só͘-chāi, chiū tī hia hioh-khùn.
16:15 Αp-sa-lôm kah chèng I-su-la-el lâng, lâi-kàu Ê-lú-sa-lèm. A-hi-to-hoel mā kah i tī hia.
16:16 Αp-sa-lôm tī Ê-lú-sa-lèm
Ta-bi̍t ê pêng-iú — Al-kih lâng Hu-sia lâi-kàu Αp-sa-lôm hia, Hu-sia kā Αp-sa-lôm kóng, " Goān ông bān-sòe! Goān ông bān-sòe! "
16:17 Αp-sa-lôm kā Hu-sia kóng, " Lí hó khoán-thāi lí ê pêng-iú kám sī ánne? Ná ē bô kah lí ê pêng-iú chò-hóe khì? "
16:18 Hu-sia kā Αp-sa-lôm kóng, " M̄-sī ánne, Siōng-chú kah chiahê jîn-bîn, í-ki̍p I-su-la-el jîn-bîn só͘ kéng ê, góa beh kui i, mā beh kah i tòa.
16:19 Koh chi̍t hāng, góa tio̍h ho̍k-sāi siáⁿ lâng? Kám m̄-sī tī i ê kiáⁿ ê bīn-chêng? Góa án-chóaⁿ tī lí ê lāu-pē ê bīn-chêng ho̍k-sāi, mā ē ánne tī lí ê bīn-chêng ho̍k-sāi. "
16:20 Αp-sa-lôm kā A-hi-to-hoel kóng, " Lín tio̍h kè-ōe, khòaⁿ lán tio̍h án-chóaⁿ kiâⁿ? "
16:21 A-hi-to-hoel kā Αp-sa-lôm kóng, " Lí ê lāu-pē só͘ lâu-.leh kò͘ chhù hiahê pîn-hui, lí tio̍h kah i khùn. I-su-la-el ê kûn-chiòng chiū thiaⁿ tio̍h lí hō͘ lí ê lāu-pē thó-ià, kiàn-nā kui lí ê lâng, i ê chhiú ē giám-ngē. "
16:22 In chiū kā Αp-sa-lôm tah pò͘-pêⁿ, tī ông-kiong ê chng-pêⁿ téng. Αp-sa-lôm chiū tī I-su-la-el jîn-bîn ê bīn-chêng ji̍p-khì kah i ê lāu-pē ê pîn-hui khùn.
16:23 Hit sî, A-hi-to-hoel só͘ kè-ōe ê, chhin-chhiūⁿ lâng teh mn̄g Siōng-chú ê ōe; A-hi-to-hoel tùi Ta-bi̍t á-.sī tùi Αp-sa-lôm só͘ kè-ōe ê, lóng sī ánne.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。