撒母耳记下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
15:1 Αp-sa-lôm Tô͘-bô͘ Chō-hoán
Chit sî liáu-āu, Αp-sa-lôm ūi kakī chún-pī chhia-bé, koh ū gō͘ cha̍p lâng kiâⁿ tī i ê thâu-chêng.
15:2 Αp-sa-lôm chá-chá khí-.lâi, khiā tī siâⁿ mn̂g ê lō͘ piⁿ, nā ū lâng lâi, ū àn-kiāⁿ tio̍h hō͘ ông phòaⁿ-toàn ê, Αp-sa-lôm chiū kiò i lâi, mn̄g i kóng, " Lí sī tó chi̍t-ê siâⁿ ê lâng? " I ìn kóng, " Lô͘-po̍k sī I-su-la-el chi̍t-ê chi-cho̍k ê lâng. "
15:3 Αp-sa-lôm kā i kóng, " Lí ê tāichì sī hó, sī ū chêng-lí, chóng-.sī, ông bô kau-tài lâng thiaⁿ lí ê ōe. "
15:4 Αp-sa-lôm koh kóng, " Khó-sioh bô siat-li̍p góa chò chit-ê só͘-chāi ê sím-phòaⁿ-koaⁿ! Kiàn-nā ū sio-kò tio̍h phòaⁿ-toàn ê tāichì ê lâi-kàu góa chia, góa ē chiàu kong-gī phòaⁿ-koat. "
15:5 Kìⁿ nā ū lâng kīn-óa lâi kā i pài, i chiū chhun chhiú kā i khan, kā i chim.
15:6 I-su-la-el lâng ê tiong-kan, kiàn-nā beh khì kìⁿ ông kiû phòaⁿ-toàn ê, Αp-sa-lôm lóng ánne kā in khoán-thāi. Αń-ne, Αp-sa-lôm thau-thau-á tit tio̍h I-su-la-el lâng ê sim.
15:7 Kòe sì nî liáu-āu, Αp-sa-lôm tùi ông kóng, " Kiû lí chún góa khì He-bú-lông, hêng góa tùi Siōng-chú só͘ hē ê goān.
15:8 In-ūi lô͘-po̍k tòa tī A-lâm ê Ge-siul ê sî bat hē goān, kóng, ' Siōng-chú nā kó-jiân hō͘ góa koh tńg-lâi Ê-lú-sa-lèm, góa beh ho̍k-sāi Siōng-chú. '"
15:9 Ông kā i kóng, " Lí thang pêng-an khì. " Αp-sa-lôm chiū khí-.lâi, óng He-bú-lông khì.
15:10 Αp-sa-lôm chhe cheng-thàm kiâⁿ-phiàn I-su-la-el ta̍k chi-cho̍k, kóng, " Lín chi̍t-ē thiaⁿ tio̍h sàu-kak ê siaⁿ, chiū kóng, ' Αp-sa-lôm tī He-bú-lông chò ông ā! '"
15:11 Αp-sa-lôm só͘ chhiáⁿ hit nn̄g pah lâng kah i tùi Ê-lú-sa-lèm khì, hiahê lâng lóng sī bô-ì-tiong khì ê, m̄-chai hit-ê tāichì.
15:12 Ta-bi̍t ê bô͘-sū A-hi-to-hoel sī Gi-loh lâng, tng hiàn chè ê sî, Αp-sa-lôm chhe lâng khì tiàu i lâi, tùi i ê pún-siâⁿ Gi-loh lâi. Chiū ánne, poān-ge̍k ê sè-bīn ná kiông; in-ūi tòe Αp-sa-lôm ê jîn-bîn ji̍t-ji̍t ná chē.
15:13 Ta-bi̍t Tô-cháu Khì Ê-lú-sa-lèm
Ū lâng lâi pò Ta-bi̍t kóng, " I-su-la-el lâng ê sim lóng kui-ǹg Αp-sa-lôm à. "
15:14 Ta-bi̍t kā hiahê kah i tī Ê-lú-sa-lèm ê jîn-sîn kóng, " Khí-.lâi, lán tio̍h tô-cháu, nā bô, lóng bē tàng siám-phiah Αp-sa-lôm; lán tio̍h kóaⁿ-kín lâi-.khì, khióng-kiaⁿ i ē chin kín lâi jiok tio̍h lán, kā lán hām-hāi, ēng to thâi-sí siâⁿ lāi ê lâng. "
15:15 Ông ê jîn-sîn kā ông kóng, " Lí khòaⁿ, góa ê chú — góa ê ông só͘ chú-ì ê, lí ê lô͘-po̍k lóng ē khì chò. "
15:16 Ông chhut-.khì, i ê ka-koàn lóng tòe i khì, ông lâu cha̍p-ê pîn-hui kò͘ chhù.
15:17 Ông chhut-hoat, chèng lâng lóng tòe i khì, lâi-kàu Biat-mel-hak chiū hioh-khùn.
15:18 Ông ê jîn-sîn lóng tī i ê bīn-chêng kiâⁿ kòe-.khì, só͘-ū ê Ki-lī-thê lâng, Be-le-thi lâng kah Gat lâng, to̍h-sī tùi Gat tòe i lâi ê la̍k pah lâng, mā lóng tī ông ê bīn-chêng kiâⁿ kòe-.khì.
15:19 Ông kā Gat lâng It-thai kóng, " Lí ná ē beh kah goán khì? Lí thang tńg-khì kah ông chò-hóe tòa, lí sī gōa-pang lâng, chhian-sóa tī gōa-bīn, thang tńg-khì lí ê pún só͘-chāi!
15:20 Lí cha-hng chiah lâi, góa kin-á-ji̍t kám thang lô-hoân lí kah goán khì phiau-liû? Góa khì góa só͘ khì ê só͘-chāi, lí thang tńg-.khì, chhōa lí ê hiaⁿ-tī chò-hóe tńg-.khì! Goān un-tián sêng-si̍t kah lí tông-chāi. "
15:21 It-thai ìn ông kóng, " Góa kí éng-oán oa̍h ê Siōng-chú kah góa ê chú — góa ê ông ê oa̍h-miā lâi chiùchōa, góa ê chú — góa ê ông he̍k oa̍h he̍k sí, kìⁿ i só͘ tī-.leh ê só͘-chāi, lí ê lô͘-po̍k mā ē tī hia. "
15:22 Ta-bi̍t kā It-thai kóng, " Lí khì, kòe-.khì! " Gat lâng It-thai kah hiahê tòe i ê lâng kah só͘-ū ê gín'á chiū lóng kòe-.khì.
15:23 Choân tē tōa-siaⁿ thî-khàu, chèng lâng lóng kòe-.khì, ông mā kòe Kit-lông khe; chèng lâng kòe-.khì, ǹg khòng-iá teh kiâⁿ.
15:24 Cha-tok kah só͘-ū tòe i ê Lē-bī lâng kng Siōng-chú ê iok-kūi lâi, in kā Siōng-chú ê kūi hē tī hia. A-bi-a-thal lâi hia, thèng-hāu chèng lâng tùi siâⁿ lāi chhut-.lâi, lóng kòe-.khì.
15:25 Ông kā Cha-tok kóng, " Lí kng Siōng-chú ê kūi tńg-khì siâⁿ lāi, góa nā tī Siōng-chú ê ba̍k-chiu chêng tit tio̍h un-tián, I ē hō͘ góa tńg-.lâi, hō͘ góa koh khòaⁿ tio̍h I kah I tòa ê só͘-chāi.
15:26 Siat-sú I kóng, ' Góa bô kah-ì lí. ' Lí khòaⁿ, góa tī chia, goān I chiàu I khòaⁿ-chò hó ê lâi kiâⁿ tī góa ê sin chiūⁿ! "
15:27 Ông koh kā Cha-tok chè-si kóng, " Lí kám m̄-sī sian-kiàn? Lí thang an-jiân tńg-khì siâⁿ lāi; lí ê kiáⁿ A-hi-mâ-chu kah A-bi-a-thal ê kiáⁿ Io-ná-than, lín chit nn̄g-ê kiáⁿ lóng thang kah lí khì.
15:28 Lí khòaⁿ, góa tī khòng-iá ê tō͘-kháu thèng-hāu tùi lí hia ū siau-sit lâi, pò góa chai-iáⁿ si̍t-chêng. "
15:29 Chiū ánne, Cha-tok kah A-bi-a-thal kng Siōng-chú ê kūi tńg-khì Ê-lú-sa-lèm, in chiū tòa tī hia.
15:30 Ta-bi̍t tùi chiūⁿ Kaⁿ-ná soaⁿ ê lō͘ chiūⁿ-.khì, ná kiâⁿ ná háu, tà thâu-khak thǹg-chhiah-kha lâi kiâⁿ. Tòe i khì ê chèng lâng mā tà thâu-khak chiūⁿ-.khì, ná kiâⁿ ná háu.
15:31 Ū lâng pò Ta-bi̍t kóng, " A-hi-to-hoel mā tòe Αp-sa-lôm tī poān-tóng ê tiong-kan. " Ta-bi̍t kóng, " Siōng-chú ah, kiû Lí hō͘ A-hi-to-hoel ê kè-bô͘ piàn-chò gōng tāichì! "
15:32 Ta-bi̍t chiūⁿ-kàu soaⁿ téng, kèng-pài Siōng-chú ê só͘-chāi, khòaⁿ tio̍h Al-kih lâng Hu-sia, saⁿ thiah-li̍h, thâu-khak sám tîn-ai, lâi kā i gêng-chiap.
15:33 Ta-bi̍t kā i kóng, " Lí nā kah góa-.khì, ē thoa-lūi góa;
15:34 lí nā tńg-khì siâⁿ lāi, kā Αp-sa-lôm kóng, ' Ông, góa beh chò lí ê lô͘-po̍k; góa í-chêng chò lí ê pē ê lô͘-po̍k, taⁿ góa mā beh ánne chò lí ê lô͘-po̍k. ' Lí chiū thang ūi góa phò-hoāi A-hi-to-hoel ê kè-bô͘.
15:35 Chè-si Cha-tok kah A-bi-a-thal kám bô kah lí tī hia? Lí tùi ông-kiong lāi só͘ thiaⁿ tio̍h ê, chiū tio̍h kā Cha-tok chè-si kah A-bi-a-thal kóng.
15:36 Cha-tok ê kiáⁿ A-hi-mâ-chu kah A-bi-a-thal ê kiáⁿ Io-ná-than, chit nn̄g-ê kiáⁿ mā kah in tī hia. Kiàn-nā lín só͘ thiaⁿ-.tio̍h ê, thang kau-thok in lâi pò góa chai. "
15:37 Chiū ánne, Ta-bi̍t ê pêng-iú Hu-sia ji̍p siâⁿ; Αp-sa-lôm mā ji̍p Ê-lú-sa-lèm.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。