撒母耳记下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
13:1 Am-non kah Tha-mal
Chit-ê tāichì í-āu, Ta-bi̍t ê kiáⁿ Αp-sa-lôm ū chi̍t-ê chin súi ê sió-mōe, miâ kiò-chò Tha-mal. Ta-bi̍t ê kiáⁿ Am-non thiàⁿ i.
13:2 Am-non ūi tio̍h i ê sió-mōe Tha-mal ut-chut kàu phòa-pēⁿ, in-ūi i sī chāi-sek-lí, Am-non kakī chai oh-tit tùi i chò siáⁿ-mi̍h tāichì.
13:3 Am-non ū chi̍t-ê pêng-iú, miâ kiò-chò Io-Ná-tap, sī Ta-bi̍t ê a-hiaⁿ Si-me-ah ê kiáⁿ. Io-Ná-tap sī chi̍t-ê chin lêng-khiàu ê lâng.
13:4 I tùi Am-non kóng, " Ông ê kiáⁿ, lí ná ē chi̍t ji̍t pí chi̍t ji̍t khah siau-sán? Án-chóaⁿ m̄ kā góa kóng? " Am-non kā i kóng, " Góa thiàⁿ góa ê sió-tī Αp-sa-lôm ê sió-mōe Tha-mal. "
13:5 Io-Ná-tap kā i kóng, " Lí tio̍h tó tī bîn-chhn̂g téng, ké-chò phòa-pēⁿ. Lí ê lāu-pē lâi kā lí khòaⁿ, chiū tùi i kóng, ' Kiû lí chún góa ê sió-mōe Tha-mal lâi góa chia, ēng chia̍h-mi̍h hō͘ góa, chún-pī tī góa ê bīn-chêng, hō͘ góa khòaⁿ-.tio̍h, tùi i ê chhiú chiap lâi chia̍h. '"
13:6 Am-non chiū tó-.leh ké phòa-pēⁿ, ông lâi khòaⁿ i. Am-non chiū tùi ông kóng, " Kiû lí hō͘ góa ê sió-mōe Tha-mal lâi góa chia, tī góa ê bīn-chêng kā góa chò nn̄g tè piáⁿ, góa thang tùi i ê chhiú chiap lâi chia̍h. "
13:7 Ta-bi̍t chiū chhe lâng khì-kàu Tha-mal ê chhù, kā i kóng, " Taⁿ lí khì lí ê a-hiaⁿ Am-non ê chhù, kā i chún-pī chia̍h-mi̍h. "
13:8 Tha-mal chiū lâi-kàu i ê a-hiaⁿ Am-non ê chhù, Am-non tó-.leh. Tha-mal the̍h mī-hún, tī i ê bīn-chêng chhiau chò piáⁿ, koh piak hiahê piáⁿ,
13:9 Chiū kā chian-pôaⁿ piàⁿ tī i ê bīn-chêng. Am-non m̄-chia̍h, chiū kóng, " Tāi-ke tio̍h lī-khui góa chhut-.khì. " Chāi-tiûⁿ ê lâng chiū lī-khui i chhut-.khì.
13:10 Am-non kā Tha-mal kóng, " Lí phâng chia̍h-mi̍h ji̍p-lâi khùn-pâng, góa thang tùi lí ê chhiú chiap lâi chia̍h. " Tha-mal chiū phâng só͘ chò ê piáⁿ ji̍p-khì khùn-pâng, kàu i ê a-hiaⁿ Am-non hia.
13:11 I phâng khì hō͘ i chia̍h, i chiū khiú i, kā i kóng, " Góa ê sió-mōe, lí lâi kah góa chò-hóe khùn. "
13:12 Tha-mal kā i kóng, " Góa ê a-hiaⁿ, m̄ thang, m̄ thang lêng-jio̍k góa, in-ūi tī I-su-la-el tiong bô eng-kai ánne chò, lí m̄ thang chò chit-ê gōng-sū.
13:13 Á góa, góa beh án-chóaⁿ sé góa ê kiàn-siàu? Á lí, lí tī I-su-la-el chò gōng lâng ê chi̍t-ê, taⁿ chhiáⁿ lí tùi ông kóng, i bô beh kìm-chí góa kè hō͘ lí. "
13:14 Chóng-.sī, Am-non m̄-khéng thiaⁿ i ê ōe, in-ūi i pí i khah ū la̍t, chiū kā i lêng-jio̍k, kah i chò-hóe khùn.
13:15 Í-āu Am-non hui-siông oàn-hūn i, hit-ê oàn-hūn i ê oàn-hūn, pí í-chêng thiàⁿ i ê thiàⁿ koh khah tōa. Am-non chiū kā i kóng, " Khí-.lâi, lí chhut-.khì. "
13:16 Tha-mal kā i kóng, " M̄-thang ánne, lí kóaⁿ góa chhut-khì ē hāi tio̍h góa, pí lí chêng khoán-thāi góa ê khah thiám! " Chóng-.sī, Am-non m̄-khéng thiaⁿ i.
13:17 Chiū kiò hit-ê sū-hāu i ê lô͘-po̍k kóng, " Tio̍h kóaⁿ chit-ê chabó͘ gín'á tùi góa chia chhut-.khì! I chhut-khì liáu-āu, mn̂g tio̍h chhòaⁿ khí-.lâi. "
13:18 Hit sî, Tha-mal chhēng chhái-sek ê saⁿ, in-ūi ông ê chabó͘ kiáⁿ, iáu-bōe chhut-kè ê, lóng chhēng chit khoán saⁿ. Am-non ê lô͘-po̍k chiū khan i chhut-.khì, chhut-khì liáu-āu, mn̂g chiū chhòaⁿ khí-.lâi.
13:19 Tha-mal sám hóe-hu tī thâu-khak, thiah-li̍h só͘ chhēng chhái-sek ê saⁿ, ēng chhiú lám thâu-khak lâi kiâⁿ, ná kiâⁿ ná háu.
13:20 I ê a-hiaⁿ Αp-sa-lôm mn̄g i kóng, " Lí ê a-hiaⁿ Am-non kám bat kah lí chò-tui? Góa ê sió-mōe, taⁿ m̄-hó chò-siaⁿ, i sī lí ê a-hiaⁿ, m̄ thang khòa-ì chit-ê tāichì. " Tha-mal chiū toaⁿ-sin tòa tī i ê a-hiaⁿ Αp-sa-lôm ê chhù.
13:21 Ta-bi̍t ông thiaⁿ tio̍h chiahê tāichì, chiū put-chí siū-khì.
13:22 Αp-sa-lôm bô kah Am-non kóng hó kóng pháiⁿ, in-ūi Αp-sa-lôm oàn-hūn Am-non, sī i ū lêng-jio̍k i ê sió-mōe Tha-mal.
13:23 Αp-sa-lôm Pò-siû
Kòe nn̄g nî, Αp-sa-lôm tī kīn E-hu-laim ê Pa-le̍k-hā-só, ū chhiàⁿ lâng kā i chián iûⁿ-mn̂g; Αp-sa-lôm chhiáⁿ ông ê chèng kiáⁿ só͘-ū lóng khì.
13:24 Αp-sa-lôm lâi kìⁿ ông, kóng, " Taⁿ lí ê lô͘-po̍k ū chhiàⁿ lâng teh chián iûⁿ-mn̂g, chhiáⁿ ông í-ki̍p ông ê jîn-sîn kah lô͘-po̍k, chò-hóe khì. "
13:25 Ông kā Αp-sa-lôm kóng, " Góa ê kiáⁿ, m̄ thang, goán m̄ thang lóng khì, khióng-kiaⁿ lí khai-hùi siuⁿ siong-tiōng. " Αp-sa-lôm pek i, chóng-.sī, i m̄-khì; kantaⁿ kā i chiok-hok.
13:26 Αp-sa-lôm kóng, " Nā bô, chiū hō͘ góa ê a-hiaⁿ Am-non kah goán khì. " Ông kóng, " Án-chóaⁿ tio̍h i kah lí khì? "
13:27 Αp-sa-lôm pek i, ông chiū ín-chún Am-non kah ông ê chèng kiáⁿ chò-hóe khì.
13:28 Αp-sa-lôm hoan-hù i ê lô͘-po̍k kóng, " Lín tio̍h chù-ì, khòaⁿ Am-non lim chiú hí-lo̍k ê sî, góa kā lín kóng, phah Am-non, lín chiū tio̍h kā i thâi-sí. M̄-bián kiaⁿ, che kám m̄-sī góa hoan-hù lín ê? Lín chò lín hó-táⁿ ióng-kám! "
13:29 Αp-sa-lôm ê lô͘-po̍k chiū chiàu Αp-sa-lôm só͘ hoan-hù ê, lâi tùi-hù Am-non. Ông ê chèng kiáⁿ lóng peh khí-.lâi, ta̍k lâng khiâ i ê lô tô-cháu.
13:30 In iáu tī lō͘-.ni̍h to̍h ū hong-siaⁿ thoân kàu Ta-bi̍t, kóng, " Αp-sa-lôm ū thâi-sí ông ê chèng kiáⁿ, bô lâu kah pòaⁿ-ê. "
13:31 Ông chiū khí-lâi thiah-li̍h saⁿ, tó tī thô͘-kha; ông ê jîn-sîn mā thiah-li̍h saⁿ, khiā tī i ê sin piⁿ.
13:32 Ta-bi̍t ê a-hiaⁿ Si-me-ah ê kiáⁿ, Io-Ná-tap ìn kóng, " Góa ê chú, m̄ thang siūⁿ kóng ông ê chèng kiáⁿ, hiahê siàu-liân lâng lóng hō͘ i thâi-sí, chí ū Am-non sí niā-niā. In-ūi tùi Am-non lêng-jio̍k i ê sió-mōe Tha-mal hit ji̍t, Αp-sa-lôm chiū í-keng ū chit-ê ì-sù.
13:33 Taⁿ góa ê chú — góa ê ông, m̄ thang khòa-ì chit-ê tāichì, siūⁿ kóng ông ê chèng kiáⁿ lóng sí, kî-si̍t chí ū Am-non sí niā-niā. "
13:34 Αp-sa-lôm chiū tô-cháu. Siú-bōng ê siàu-liân lâng gia̍h thâu khòaⁿ, khòaⁿ tio̍h chin chē jîn-bîn tùi i ê āu-bīn, tùi soaⁿ piⁿ ê lō͘ lâi.
13:35 Io-Ná-tap kā ông kóng, " Lí khòaⁿ, ông ê chèng kiáⁿ lóng lâi à, kó-jiân chiàu lí ê lô͘-po̍k só͘ kóng ê."
13:36 Ōe tú-á kóng soah, ông hiahê kiáⁿ chiū kàu-ūi, khui-siaⁿ thî-khàu; ông kah jîn-sîn mā lóng tōa thî-khàu, pi-siong kàu-ke̍k.
13:37 Αp-sa-lôm cháu kàu Ge-siul ông A-mi-hut ê kiáⁿ Ta̍t-mái hia. Ta-bi̍t ji̍t-ji̍t ūi tio̍h i ê kiáⁿ pi-ai.
13:38 Αp-sa-lôm cháu kàu Ge-siul, tī hia tòa saⁿ nî.
13:39 Ta-bi̍t ông ê sim pek-chhiat siàu-liām Αp-sa-lôm, in-ūi Am-non í-keng sí, chiū siū an-ùi.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。