撒母耳记下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
10:1 Ta-bi̍t Phah-iâⁿ Am-móng Lâng kah A-lâm Lâng
( LTS 19:1-19)
Chit sî í-āu, Am-móng lâng ê ông sí, i ê kiáⁿ Ha-nun sòa-chiap i chò ông.
10:2 Ta-bi̍t kóng, " Góa beh si un hō͘ Na-ha-si ê kiáⁿ Ha-nun, tú chhin-chhiūⁿ i ê lāu-pē si un hō͘ góa." Ta-bi̍t chiū chhe jîn-sîn, kau-thok in ūi tio̍h sí lāu-pē kā i an-ùi. Ta-bi̍t ê jîn-sîn lâi-kàu Am-móng lâng ê kéng lāi.
10:3 Chóng-.sī, Am-móng lâng ê siú-léng chhe lâng kā in ê chú Ha-nun kóng, " Ta-bi̍t chhe lâng lâi lí chia kā lí ùi-būn, lí siūⁿ kóng i kám sī teh chun-kèng lí ê pē? Ta-bi̍t chhe i ê jîn-sîn, kám m̄-sī beh cheng-thàm chit-ê siâⁿ, siông-sè khòaⁿ thang lâi kā i chhia-tó? "
10:4 Ha-nun chiū kā Ta-bi̍t ê jîn-sîn ê chhùi-chhiu thì chi̍t-pòaⁿ, koh tùi-tiong koah-tn̄g i ê saⁿ kàu tōa-thúi téng, chiū chhe in tò tńg-.khì.
10:5 Ū lâng kā Ta-bi̍t kóng, i chiū chhe lâng khì kā in gêng-chiap, in-ūi hiahê lâng kiàn-siàu kàu-ke̍k. Ông kóng, " Thang tòa tī I-é-lī-kho siâⁿ thèng-hāu chhùi-chhiu hoat tn̂g, chiah tò tńg-.lâi. "
10:6 Am-móng lâng chai in hō͘ Ta-bi̍t thó-ià, chiū chhe lâng khì chhiàⁿ Biat-le-ho͘p ê A-lâm lâng kah Cho͘-ba ê A-lâm lâng, pō͘-peng nn̄g bān kah Má-kah ông ê lâng chi̍t chheng, koh ū Tô-pek lâng chi̍t bān nn̄g chheng.
10:7 Ta-bi̍t thiaⁿ-.tio̍h, chiū chhe Io-ap chhōa ióng-sū kun-tūi.
10:8 Am-móng lâng chhut-lâi pâi tīn tī siâⁿ mn̂g-kháu, Cho͘-ba kah Le-hap ê A-lâm lâng í-ki̍p Tô-pek lâng kah Má-kah lâng, lēng-gōa pâi tīn tī kau-iá.
10:9 Io-ap khòaⁿ tio̍h chêng-āu ū tùi-te̍k pâi tīn, chiū tùi I-su-la-el cheng-peng ê tiong-kan koh-chài kéng lâi pâi tīn, tí-te̍k A-lâm lâng.
10:10 Kî-tha ê jîn-bîn kau i ê sió-tī A-bi-sai, hō͘ i pâi tīn lâi tí-te̍k Am-móng lâng.
10:11 Koh kóng, " Nā A-lâm lâng pí góa khah kiông, lí chiū lâi pang-chān góa; nā Am-móng lâng pí lí khah kiông, góa chiū khì pang-chān lí.
10:12 Tio̍h ióng-kám, lán tio̍h ūi lán ê jîn-bîn kah lán Siōng-chú ê siâⁿ chò tāi-tiōng-hu. Goān Siōng-chú chiàu I só͘ khòaⁿ-chò sī hó ê lâi kiâⁿ! "
10:13 Chiū ánne, Io-ap kah tòe i ê jîn-bîn chìn-chêng khì kah A-lâm lâng kau-chiàn, in chiū tī i ê bīn-chêng tô-cháu.
10:14 Am-móng lâng khòaⁿ tio̍h A-lâm lâng tô-cháu, in mā tī A-bi-sai ê bīn-chêng cháu ji̍p-khì siâⁿ lāi. Io-ap chiū tùi Am-móng lâng hia tńg-.khì, lâi-kàu Ê-lú-sa-lèm.
10:15 A-lâm lâng khòaⁿ tio̍h in tī I-su-la-el lâng ê bīn-chêng thâi-su, chiū koh chū-chi̍p óa-.lâi.
10:16 Ha-ta-te-chel chhe lâng tiàu hô gōa ê A-lâm lâng chhut-.lâi, in lâi-kàu Hi-lân, Ha-ta-te-chel ê kun-tiúⁿ Sok-hoat chhōa in.
10:17 Ū lâng pò Ta-bi̍t chai, i chiū chū-chi̍p I-su-la-el jîn-bîn, kòe Iol-tàn hô lâi-kàu Hi-lân. A-lâm lâng pâi tīn kong-kek Ta-bi̍t, kah i kau-chiàn.
10:18 A-lâm lâng tī I-su-la-el ê bīn-chêng tô-cháu, Ta-bi̍t thâi-sí A-lâm chhit pah tâi chiàn-chhia ê peng kah bé-peng sì bān, koh phah in ê kun-tiúⁿ Sok-hoat, hō͘ i sí tī hia.
10:19 Hâng-ho̍k Ha-ta-te-chel hiahê ông khòaⁿ tio̍h in tī I-su-la-el ê bīn-chêng thâi-su, chiū kah I-su-la-el hô-hó, lâi khut-ho̍k in. Chiū ánne, A-lâm lâng m̄-káⁿ koh pang-chān Am-móng lâng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。