撒母耳记下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
5:1 Ta-bi̍t Chò I-su-la-el kah Iô-tah ê Ông
( LTS 11: 1-9; 14: 1-7)
Tong-sî, I-su-la-el chèng chi-cho̍k lâi-kàu He-bú-lông, kìⁿ Ta-bi̍t kóng, " Lí khòaⁿ, goán sī lí ê kut-jio̍k.
5:2 Chá-chêng Sàu-lô chò goán ê ông ê sî, chhōa I-su-la-el chhut-ji̍p ê sī lí; Siōng-chú mā bat kā lí kóng, ' Lí ē chiàu-kò͘ Góa ê chú-bîn — I-su-la-el lâng, mā ē chò I-su-la-el ê kun-ông. '"
5:3 Chiū ánne, I-su-la-el ê tiúⁿ-ló lóng lâi He-bú-lông kìⁿ ông, Ta-bi̍t ông tī He-bú-lông Siōng-chú ê bīn-chêng kah in li̍p-iok, in chiū ēng iû boah Ta-bi̍t chò I-su-la-el ê ông.
5:4 Ta-bi̍t chē-ūi ê sî saⁿ-cha̍p hòe, i chē-ūi sì-cha̍p nî.
5:5 Tī He-bú-lông chò Iô-tah ông chhit nî koh la̍k goe̍h-ji̍t, tī Ê-lú-sa-lèm chò choân I-su-la-el kah Iô-tah ê ông saⁿ-cha̍p saⁿ nî.
5:6 Ông kah tòe i ê lâng lâi-kàu Ê-lú-sa-lèm beh kong-kek tòa tī hit só͘-chāi ê I-é-bú-suh lâng. In tùi Ta-bi̍t kóng, " Lí nā bô tû chiahê chheⁿmê-.ê kah pái-kha-.ê, chiū bē tàng ji̍p-lâi chit só͘-chāi. " In siūⁿ kóng Ta-bi̍t choa̍t-tùi bē ji̍p-lâi chia.
5:7 Chóng-.sī, Ta-bi̍t kong-kek Si-óng ê siâⁿ-pó, che to̍h-sī Ta-bi̍t ê siâⁿ.
5:8 Tng hit ji̍t, Ta-bi̍t kóng, " Siáⁿ lâng phah I-é-bú-suh lâng, tio̍h tùi chúi-kau chiūⁿ-khì phah Ta-bi̍t ê sim só͘ oàn-hūn pái-kha-.ê kah chheⁿmê-.ê. " Chiū ánne, ū sio̍k-gí kóng, " Ū chheⁿmê-.ê kah pái-kha-.ê bē tàng ji̍p-khì chhù-.ni̍h. "
5:9 Ta-bi̍t tòa tī siâⁿ-pó, chheng hit só͘-chāi kiò-chò Ta-bi̍t ê siâⁿ. Ta-bi̍t tùi Mi-lō͘ sì-kho͘-ûi khí-chō, mā ǹg lāi-bīn.
5:10 Ta-bi̍t lâi kú ná kiông-sēng, in-ūi Siōng-chú — bān-kun ê Siōng-tè kah i tông-chāi.
5:11 Tu-lô ông Hi-lân chhe sù-chiá tòa pek-hiuⁿ chhâ kah ba̍k-chhiūⁿ, chio̍h-chhiūⁿ lâi-kàu Ta-bi̍t hia, in kā Ta-bi̍t khí chhù.
5:12 Ta-bi̍t chai-iáⁿ Siōng-chú tiāⁿ tio̍h ē siat-li̍p i chò I-su-la-el ông, koh ūi tio̍h I ê chú-bîn — I-su-la-el lâng lâi heng-khí I ê kok.
5:13 Ta-bi̍t tùi He-bú-lông lâi liáu-āu, tùi Ê-lú-sa-lèm koh li̍p hō͘-hui, Ta-bi̍t koh seⁿ kiáⁿ-jî.
5:14 Tī Ê-lú-sa-lèm só͘ seⁿ ê kiáⁿ to̍h-sī Siam-mu-ah, Sok-pā, Ná-than kah Só͘-lô-móng,
5:15 Ip-hal, E-li-siu-ah, Ne-he̍k, Ia-hui-iah,
5:16 E-lí-sia-mah, E-li-a-tah kah E-li-hoe-lia̍t.
5:17 Thâi-iâⁿ Hui-lī-sū Lâng
( LTS 14: 8-17)
Hui-lī-sū lâng thiaⁿ tio̍h lâng ēng iû boah Ta-bi̍t chò I-su-la-el ông, Hui-lī-sū ê kûn-chiòng chiū khí-lâi siàu-siūⁿ Ta-bi̍t. Ta-bi̍t thiaⁿ-.tio̍h, chiū lo̍h-khì kàu iâⁿ-chē.
5:18 Hui-lī-sū lâng lâi liáu-āu, pò͘-tì tī Le-hoa-im ê soaⁿ-kok.
5:19 Ta-bi̍t mn̄g Siōng-chú kóng, " Góa kám thang khì kong Hui-lī-sū lâng? Lí kám ē kā in kau tī góa ê chhiú? " Siōng-chú kā Ta-bi̍t kóng, " Lí thang khì, in-ūi góa it-tēng ē kā Hui-lī-sū lâng kau tī lí ê chhiú tiong. "
5:20 Ta-bi̍t lâi-kàu Ba-al-pe-la-chim, Ta-bi̍t tī hia kā in phah, kóng, " Siōng-chú tī góa ê bīn-chêng chhiong-sòaⁿ góa ê tùi-te̍k, chhin-chhiūⁿ chúi teh chhiong-sòaⁿ, só͘-í, kā hit só͘-chāi ê miâ kiò-chò Ba-al-pe-la-chim（ Chù, Hi-bú-lâi bûn ê im-tha̍k, ì-sù sī " Chhiong-sòaⁿ ê Chú ". ）.
5:21 In kā in ê ngó͘-siōng khì-sak tī hia, Ta-bi̍t kah tòe i ê lâng chiū kā ngó͘-siōng khioh cháu.
5:22 Hui-lī-sū lâng koh-chài lâi, pò͘-tì tī Le-hoa-im ê soaⁿ-kok.
5:23 Ta-bi̍t mn̄g Siōng-chú, Siōng-chú kóng, " M̄-thang ti̍t-ti̍t óa-.khì, tio̍h oan kàu in ê āu-bīn, tùi sng-châi chhiū tùi-bīn khì kā in phah.
5:24 Lí nā thiaⁿ tio̍h tī sng-châi chhiū bóe ū kha-pō͘ siaⁿ, chiū tio̍h kóaⁿ-kín chìn-hêng, in-ūi hit sî Siōng-chú í-keng tùi lín ê thâu-chêng chhut-.khì, kong-kek Hui-lī-sū lâng ê kun-tūi. "
5:25 Ta-bi̍t chiū chiàu Siōng-chú só͘ hoan-hù ê khì kiâⁿ, kong-kek Hui-lī-sū lâng, tùi Ge-bah kàu Ge-chel.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。