撒母耳记上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
13:1 Tí-khòng Hui-lī-sū Lâng
Sàu-lô tú-á chē-ūi ê sî XX hòe, chò I-su-la-el ông X2 nî ê sî, （ Chù, XX kah X2, ha̍k-chiá jīn-ûi chit nn̄g-ê sò͘-jī tī Hi-bú-lâi bûn chhau-pún tiong siū sún he̍k ûi-sit, bô hoat-tō͘ ho̍k-goân; in-ūi goân-bûn chiàu jī bīn tha̍k hun-pia̍t chí ū " Chi̍t hòe " Kah" Nn̄g-nî ". ）,
13:2 I chiū ūi kakī tùi I-su-la-el tiong kéng saⁿ chheng lâng, nn̄g chheng lâng kin-tòe Sàu-lô tī Mik-mah kah Be-thel soaⁿ, chi̍t chheng kin-tòe Io-ná-than tī Biān-iá-mín ê Gi-be-at; kî-tha ê lâng, i chhe in tńg-khì ta̍k lâng ê pò͘-pêⁿ.
13:3 Io-ná-than phah Ge-bah Hui-lī-sū lâng ê kun-iâⁿ, Hui-lī-sū lâng thiaⁿ-.tio̍h. Sàu-lô chiū pûn sàu-kak tī choân tē, ì-sù sī kiò Hi-bú-lâi lâng lóng tio̍h thiaⁿ.
13:4 I-su-la-el jîn-bîn thiaⁿ tio̍h Sàu-lô phah Hui-lī-sū lâng ê kun-iâⁿ, koh thiaⁿ tio̍h I-su-la-el lâng hō͘ Hui-lī-sū lâng thó-ià, jîn-bîn chiū lâi kin-tòe Sàu-lô, chū-chi̍p tī Gil-gal.
13:5 Hui-lī-sū lâng chū-chi̍p beh kah I-su-la-el lâng kau-chiàn, ū chhia saⁿ bān tâi, bé-peng la̍k chheng, pō͘-peng chhin-chhiūⁿ hái piⁿ ê soa hiah chē, chiū khí-lâi tī Bia̍t-a-biân tang pêng ê Mik-mah chat iâⁿ.
13:6 I-su-la-el lâng khòaⁿ tio̍h kakī gûi-kip, in-ūi jîn-bîn siū khún-pek, kakī chiū bih tī soaⁿ-tōng, chhiū-nâ, chio̍h-hia̍t, hiám-iàu ê só͘-chāi kah chhim kheⁿ.
13:7 Mā ū Hi-bú-lâi lâng kòe Iol-tàn hô lâi-kàu Gat kah Gi-lia̍t tē. Sàu-lô iáu koh tī Gil-gal, jîn-bîn lóng phi̍h-phi̍h chhoah lâi kin-tòe i.
13:8 Sàu-lô chiàu Sa-mu-el só͘ tiāⁿ tio̍h ê ji̍t-kî, thèng-hāu chhit ji̍t. Sa-mu-el iáu-bōe lâi Gil-gal, jîn-bîn chiū lī-khui i sì-sòaⁿ-.khì.
13:9 Sàu-lô kóng, " Kā sio-chè kah siā-un-chè tòa-lâi góa chia. " I chiū hiàn sio-chè.
13:10 I hiàn sio-chè tú-á liáu-āu, lí khòaⁿ, Sa-mu-el kàu à, Sàu-lô chhut-khì kā i gêng-chiap, beh kā i chhéng-an.
13:11 Sa-mu-el kóng, " Lí chò siáⁿ-mi̍h tāichì? " Sàu-lô kóng, " In-ūi góa khòaⁿ tio̍h jîn-bîn sì-sòaⁿ lī-khui góa, lí mā bô chiàu só͘ tiāⁿ tio̍h ê ji̍t-kî kàu, jî-chhiáⁿ Hui-lī-sū lâng í-keng chū-chi̍p tī Mik-mah.
13:12 Só͘-í, góa kóng, Hui-lī-sū lâng ē kàu Gil-gal lâi kong-kek góa, góa koh iáu-bōe kiû Siōng-chú si un, góa chiū bián-kióng hiàn sio-chè. "
13:13 Sa-mu-el tùi Sàu-lô kóng, " Lí chò gōng-sū à, in-ūi lí bô chun-siú Siōng-chú — lí ê Siōng-tè só͘ bēng-lēng lí ê kài-bēng. Nā-sī ū siú, Siōng-chú chiū ē tī I-su-la-el tiong kian-kò͘ lí ê ông-ūi kàu éng-oán.
13:14 Taⁿ lí ê ông-ūi bô kú-tn̂g, Siōng-chú í-keng chhōe tio̍h ha̍h I ê sim-ì ê chi̍t-ê lâng, jî-chhiáⁿ Siōng-chú mā tiāⁿ tio̍h i lâi chò I ê chú-bîn ê thâu, in-ūi lí bô chun-siú Siōng-chú só͘ bēng-lēng lí ê. "
13:15 Sa-mu-el chiū khí-.lâi, tùi Gil-gal chiūⁿ-khì Biān-iá-mín ê Gi-be-at. Sàu-lô tiám-sǹg tòe i ê lâng, chha-put-to ū la̍k pah lâng.
13:16 Sàu-lô kah i ê kiáⁿ Io-ná-than, í-ki̍p tòe in ê lâng, lóng tòa tī Biān-iá-mín ê Ge-bah; chóng-.sī, Hui-lī-sū lâng chat iâⁿ tī Mik-mah.
13:17 Ū chhiúⁿ-kiap ê tùi Hui-lī-sū ê kun-iâⁿ tiong chhut-.lâi, hun-chò saⁿ tūi, chi̍t tūi oat tùi O͘-hu-lah ê lō͘, kàu Siú-oa ê tē khì,
13:18 koh chi̍t tūi oat tùi Pek-hô-lûn ê lō͘ khì; koh chi̍t tūi oat tùi Che-pho-im ê soaⁿ-kok tùi-bīn tē-kài ê lō͘, ǹg khòng-iá khì.
13:19 Hit sî, I-su-la-el choân tē bô chi̍t-ê phah thih sai-hū, in-ūi Hui-lī-sū lâng kóng, khióng-kiaⁿ Hi-bú-lâi lâng chè-chō kiàm kah chhiuⁿ.
13:20 I-su-la-el lâng ē kā i ê lê, pê, pó͘-thâu kah tî-thâu bôa lāi, ta̍k lâng tio̍h lo̍h-khì Hui-lī-sū lâng hia.
13:21 Nā beh lè tî-thâu, lê, saⁿ-khí ê chhe, pó͘-thâu kah kóaⁿ gû ê thih-chhì, tio̍h chi̍t pim ê kang-chîⁿ.
13:22 Só͘-í, kàu kau-chiàn ê ji̍t, tòe Sàu-lô kah Io-ná-than ê lâng bô kah chi̍t-ê lâng chhiú-.ni̍h ū kiàm ū chhiuⁿ ê, kantaⁿ Sàu-lô kah i ê kiáⁿ Io-ná-than ū.
13:23 Hui-lī-sū hông-siú ê peng chhut-khì kàu Mik-mah ê koan-kháu.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。