撒母耳记上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
5:1 Iok-kūi tī Hui-lī-sū
Hui-lī-sū lâng tòa Siōng-chú ê iok-kūi, tùi E-bian-ne-chel kng kàu A-si-to͘t.
5:2 Hui-lī-sū lâng kā Siōng-chú ê kūi kng ji̍p-khì Tāi-kún ê biō, hē tī tāi-kún ê sin piⁿ.
5:3 Keh kang chá-khí, A-si-to͘t ê lâng khí-.lâi, khòaⁿ tio̍h tāi-kún poa̍h-tó tī Siōng-chú ê kūi chêng, bīn phak tī thô͘-kha, chiū kā tāi-kún koh chhāi tī i ê goân ūi.
5:4 Koh keh tńg kang, thàu-chá khí-.lâi, khòaⁿ tio̍h tāi-kún poa̍h-tó tī Siōng-chú ê kūi chêng, bīn phak tī thô͘-kha, jî-chhiáⁿ tāi-kún ê thâu kah nn̄g ki chhiú-chiúⁿ lóng áu-tn̄g tī hō͘-tēng téng, chí ū chhun tāi-kún tó pêⁿ-pêⁿ ê seng-khu.
5:5 Ūi tio̍h ánne, tāi-kún ê chè-si kah só͘-ū ji̍p-khì tī A-si-to͘t tāi-kún biō ê lâng, lóng bô ta̍h tāi-kún ê hō͘-tēng, it-ti̍t kàu kin-á-ji̍t.
5:6 Siōng-chú ê chhiú tāng-tāng phah A-si-to͘t lâng, kā in pāi-hoāi, hō͘ in hoat liàp-á chèng, to̍h-sī A-si-to͘t kah i ê kéng lāi lóng sī ánne.
5:7 A-si-to͘t lâng khòaⁿ tio̍h ánne, chiū kóng, " I-su-la-el Siōng-chú ê kūi m̄ thang tiàm tī lán tiong-kan, in-ūi I ê chhiú tāng-tāng phah lán kah lán ê sîn-bêng tāi-kún. "
5:8 Chiū chhe lâng chhiáⁿ Hui-lī-sū hiahê siú-léng lâi chū-chi̍p tī in hia, kóng, " I-su-la-el Siōng-chú ê kūi, lán tio̍h án-chóaⁿ siat-hoat? " In ìn kóng, " Τhang kā I-su-la-el Siōng-tè ê kūi ūn khì Gat. " In chiū kā I-su-la-el Siōng-tè ê kūi ūn khì hia.
5:9 Ūn kàu-ūi liáu-āu, Siōng-chú ê chhiú kong-kek hit-ê siâⁿ, hō͘ hit-ê siâⁿ ê lâng chin tāi-loān, koh phah siâⁿ lāi ê lâng bô-lūn tōa-sè, in lóng hoat liàp-á chèng.
5:10 In chiū kā Siōng-tè ê kūi sàng-khì Ek-lóng. Siōng-tè ê kūi ūn kàu Ek-lóng, Ek-lóng ê lâng chiū hoah, " In kā I-su-la-el Siōng-tè ê kūi ūn lâi lán chia, sī beh hāi-sí lán kah lán ê jîn-bîn. "
5:11 Chiū chhe lâng chū-chi̍p Hui-lī-sū só͘-ū ê siú-léng, kóng, " I-su-la-el Siōng-tè ê iok-kūi tio̍h sàng tńg-khì I ê pún só͘-chāi, bián-tit I hāi-sí lán kah lán ê jîn-bîn. " Hit sî, choân siâⁿ ū tì-sú sí ê jiáu-loān, in-ūi Siōng-chú ê chhiú tī hia kā in phah chin tāng.
5:12 Bô sí ê lâng lóng tio̍h liàp-á chèng, siâⁿ tiong thî-khàu ê siaⁿ thàu kàu thiⁿ-.ni̍h.
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。