士师记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
4:1 Te-bó͘-la̍h kah Ba-la̍h
E-hut sí-liáu, I-su-la-el lâng koh kiâⁿ Siōng-chú só͘ khòaⁿ-chò pháiⁿ ê tāichì.
4:2 Siōng-chú kā in bē hō͘ Ka-nân ông Ia-bín, to̍h-sī tī Ha-cho͘l chò ông ê, i ê kun-tiúⁿ sī Si-se-la̍h, i tòa tī gōa-pang lâng ê Hā-lô-siat.
4:3 Ia-bín ông ū thih-chhia káu pah tâi, i tōa-tōa khi-ap I-su-la-el lâng jī-cha̍p nî, I-su-la-el lâng chiū kiû-kiò Siōng-chú.
4:4 Hit sî, ū chi̍t-ê lú-sian-ti miâ kiò-chò Te-bó͘-la̍h, sī La̍h-pí-to ê bó͘, i chò I-su-la-el ê sū-su.
4:5 I tòa tī E-hu-laim soaⁿ-tē, La̍h-má kah Be-thel ê tiong-kan, tī Te-bó͘-la̍h ê chó chhiū kha. I-su-la-el lâng lóng khì i hia, siū i phòaⁿ-toàn.
4:6 I chhe lâng kiò A-pí-lô-am ê kiáⁿ Ba-la̍h tùi Ná-hu-tha-lím ê Ke-té-sih lâi, tùi i kóng, " Siōng-chú — I-su-la-el ê Siōng-tè kám m̄-sī bēng-lēng kóng: lí tio̍h khì Tha-bo͘l soaⁿ, chhōa Ná-hu-tha-lím kah Che-bú-lông lâng chi̍t bān kah lí khì?
4:7 Góa beh hō͘ Ia-bín ê kun-tiúⁿ Si-se-la̍h kah i ê chhia, i ê kun-tūi, kàu Ki-sióng hô lí hia, góa beh kā i kau tī lí ê chhiú tiong. "
4:8 Ba-la̍h kā i kóng, " Lí nā kah góa-.khì, góa chiū beh khì; lí nā m̄ kah góa-.khì, góa chiū m̄-khì. "
4:9 Te-bó͘-la̍h kóng, " Góa it-tēng beh kah lí khì, chóng-.sī, lí tī só͘ kiâⁿ ê lō͘ bē tàng êng-hián, in-ūi Siōng-chú ē bē Si-se-la̍h tī chabó͘ lâng ê chhiú. " Te-bó͘-la̍h chiū khí-.lâi, kah Ba-la̍h chò-hóe khì Ke-té-sih.
4:10 Ba-la̍h chiū chio-chi̍p Che-bú-lông lâng kah Ná-hu-tha-lím lâng kàu Ke-té-sih, tòe i khì ê ū chi̍t bān lâng. Te-bó͘-la̍h mā kah i khì.
4:11 Ke-nî lâng Ê-bel bat lī-khui Ke-nî lâng, to̍h-sī Mô͘-se ê gōa-chhek Hô-pa ê kiáⁿ-sun, chiū tah pò͘-pêⁿ tī Sat-ná-im ê siōng chhiū piⁿ, to̍h-sī óa-kīn Ke-té-sih ê.
4:12 Ū lâng kā Si-se-la̍h kóng, " A-pí-lô-am ê kiáⁿ Ba-la̍h í-keng khì Tha-bo͘l soaⁿ. "
4:13 Si-se-la̍h chiū chū-chi̍p i só͘-ū ê chhia, to̍h-sī thih-chhia káu pah tâi kah tòe i ê kun-tūi, tùi gōa-pang ê Hā-lô-siat, kàu Ki-sióng hô.
4:14 Te-bó͘-la̍h tùi Ba-la̍h kóng, " Khí-.lâi, kin-á-ji̍t to̍h-sī Siōng-chú kā Si-se-la̍h kau tī lí ê chhiú ê ji̍t, Siōng-chú kám bô tī lí ê thâu-chêng kiâⁿ? " Chiū ánne, Ba-la̍h tùi Tha-bo͘l soaⁿ lo̍h-.lâi, tòe i ê ū chi̍t bān lâng.
4:15 Siōng-chú tī Ba-la̍h ê bīn-chêng, ēng to phah-loān Si-se-la̍h kah i só͘-ū ê chhia, i ê kun-tūi, Si-se-la̍h lo̍h-chhia kiâⁿ lō͘ tô-cháu.
4:16 Chóng-.sī, Ba-la̍h jiok hiahê chhia kah kun-tūi, kàu gōa-pang ê Hā-lô-siat, Si-se-la̍h ê kun-tūi lóng tó tī to hā, bô lâu kah pòaⁿ-ê lâng.
4:17 Chí-ū Si-se-la̍h kiâⁿ lō͘ tô-cháu, kàu Ke-nî lâng Ê-bel ê bó͘ Ia-el ê pò͘-pêⁿ, in-ūi Ha-cho͘l ông Ia-bín kah Ke-nî lâng Ê-bel ê ke hô-hó.
4:18 Ia-el chhut-lâi gêng-chiap Si-se-la̍h, kā i kóng, " Góa ê chú, oat ji̍p-.lâi, chhiáⁿ lí oat ji̍p-lâi góa chia, m̄-bián kiaⁿ. " Si-se-la̍h chiū oat ji̍p-khì i ê pò͘-pêⁿ. Ia-el chiū ēng thán-á kā i kah teh.
4:19 Si-se-la̍h kā i kóng, " Góa chhùi-ta, chhiáⁿ lí ēng tām-po̍h chúi hō͘ góa lim. " I chiū khui té leng ê phôe-tē hō͘ i lim, iû-goân kā i kah teh.
4:20 Si-se-la̍h koh kā i kóng, " Lí khiā tī pò͘-pêⁿ mn̂g, nā ū lâng lâi mn̄g lí kóng, ū lâng tī lí chia bô? Lí chiū kā i kóng, bô. "
4:21 Si-se-la̍h ià-siān khùn lo̍h-bîn, Ê-bel ê bó͘ Ia-el the̍h pò͘-pêⁿ ê teng, chhiú gia̍h thûi-á, liam-liam-á kiâⁿ kàu i hia, ēng teng tùi i ê pìn-piⁿ tèng ji̍p-.khì, thàu-kòe thô͘-kha, i chiū sí.
4:22 Hit sî, Ba-la̍h jiok Si-se-la̍h, Ia-el chhut-lâi kā i gêng-chiap, kā i kóng, " Lâi, góa kā lí só͘ teh chhōe ê lâng hō͘ lí khòaⁿ. " I chiū ji̍p-.khì, lí khòaⁿ, Si-se-la̍h í-keng sí, tó-.leh, teng iáu koh tī i ê pìn-piⁿ.
4:23 Án-ne, hit chi̍t ji̍t, Siōng-chú hō͘ Ka-nân ông Ia-bín khut-ho̍k tī I-su-la-el lâng ê bīn-chêng.
4:24 Chiū ánne, I-su-la-el lâng koh khah ū sè-le̍k, khah iâⁿ Ka-nân ông Ia-bín, it-ti̍t kàu kā Ka-nân ông Ia-bín choân-pō͘ bia̍t-tiāu.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。