士师记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
3:1 Lâu Loh-.lâi ê Bîn-cho̍k
Siōng-chú só͘ lâu chiahê cho̍k, sī beh ēng i lâi chhì-giām I-su-la-el lâng, to̍h-sī hiahê m̄ bat kìⁿ-kòe Ka-nân kau-chiàn ê tāichì ê lâng,
3:2 thiau-tî beh hō͘ I-su-la-el āu-tāi ê lâng chai-iáⁿ, lâi kà-sī in kau-chiàn, to̍h-sī hiahê chêng só͘ m̄ bat keng-kòe ê lâng.
3:3 Só͘ lâu-.leh hiahê cho̍k, to̍h-sī Hui-lī-sū gō͘-ê siú-léng kah só͘-ū ê Ka-nân lâng, Si-tòng lâng kah tòa tī Le-ba-nòng soaⁿ ê Hi-bī lâng, tùi Ba-al-hel-móng soaⁿ, kàu Ha-mat kháu.
3:4 Che to̍h-sī beh ēng in lâi chhì-giām I-su-la-el lâng, khòaⁿ in khéng chun-thàn Siōng-chú thok Mô͘-se só͘ bēng-lēng in chó͘-sian ê kài-bēng á-bô.
3:5 Chiū ánne, I-su-la-el lâng tòa tī Ka-nân lâng, Hiat lâng, A-mô͘-lī lâng, Pe-lí-ji lâng, Hi-bī lâng, I-é-bú-suh lâng ê tiong-kan,
3:6 Chhōa in ê chabó͘ kiáⁿ chò bó͘, mā kā chabó͘ kiáⁿ kè hō͘ in ê kiáⁿ, soah ho̍k-sāi in hiahê sîn-bêng.
3:7 Ot-ni-el
I-su-la-el lâng kiâⁿ Siōng-chú só͘ khòaⁿ-chò pháiⁿ ê tāichì, bē kì-tit Siōng-chú — in ê Siōng-tè, khì ho̍k-sāi chiahê Ba-al kah A-si-tha-lot.
3:8 Só͘-í, Siōng-chú siū-khì I-su-la-el lâng, kā in bē hō͘ Mê-só͘-po-ta-miah ông Kó͘-san-lī-sat-tiân. Chiū ánne, I-su-la-el lâng ho̍k-sāi Kó͘-san-lī-sat-tiân peh nî.
3:9 I-su-la-el lâng kiû-kiò Siōng-chú ê sî, Siōng-chú chiū kā I-su-la-el lâng heng-khí chi̍t-ê hiàn-sin-chiá lâi kiù in, to̍h-sī Ka-le̍p ê sió-tī Ke-ná-juh ê kiáⁿ Ot-ni-el.
3:10 Siōng-chú ê Sèng Sîn lîm-kàu i, i chiū chò I-su-la-el ê sū-su, chhut-khì kau-chiàn. Siōng-chú kā Mê-só͘-po-ta-miah ông Kó͘-san-lī-sat-tiân kau tī i ê chhiú, i chiū khah iâⁿ Kó͘-san-lī-sat-tiân.
3:11 Chiū ánne, hit-ê só͘-chāi thài-pêng sì-cha̍p nî. Jiân-āu, Ke-ná-juh ê kiáⁿ Ot-ni-el sí-.khì.
3:12 E-hut
I-su-la-el lâng koh kiâⁿ Siōng-chú só͘ khòaⁿ-chò pháiⁿ ê tāichì, Siōng-chú chiū hō͘ Mô͘-ap ông E-gú-lóng kiông-sēng, lâi kong-kek I-su-la-el lâng, in-ūi in kiâⁿ Siōng-chú só͘ khòaⁿ-chò pháiⁿ ê.
3:13 E-gú-lóng chū-chi̍p Am-móng lâng kah A-má-le̍k lâng lâi óa i, khì phah I-su-la-el lâng, chiàm chó chhiū ê siâⁿ.
3:14 Chiū ánne, I-su-la-el lâng ho̍k-sāi Mô͘-ap ông E-gú-lóng cha̍p-peh nî.
3:15 I-su-la-el lâng kiû-kiò Siōng-chú ê sî, Siōng-chú chiū kā in heng-khí chi̍t-ê hiàn-sin-chiá, to̍h-sī Biān-iá-mín lâng Ge-la̍h ê kiáⁿ E-hut, i sī si̍p-koàn ēng tò chhiú ê. I-su-la-el lâng kau-thok i sàng lé-mi̍h khì hō͘ Mô͘-ap ông E-gú-lóng.
3:16 E-hut ūi kakī phah chi̍t ki siaam bīn lāi ê kiàm, tn̂g chi̍t tiú, pa̍k tī chiàⁿ-thúi saⁿ-khò͘ ê lāi-bīn.
3:17 I ēng lé-mi̍h hiàn hō͘ Mô͘-ap ông E-gú-lóng, E-gú-lóng sī chi̍t-ê chin pûi ê lâng.
3:18 Hiàn lé-mi̍h liáu-āu, chiū chhe tòa lé-mi̍h ê lâng lóng khì.
3:19 I pún-sin tùi kīn Gil-gal phah chio̍h-siōng ê só͘-chāi oa̍t tò tńg-.lâi, kóng, " Ông, góa ū pì-bi̍t ê tāichì beh kā lí kóng. " Ông kóng, " Siok-chēng! " Khiā tī i sin piⁿ ê lâng chiū lóng thè chhut-.khì.
3:20 E-hut lâi kìⁿ i, ông kakī chi̍t-ê chē tī liâng-léng ê lâu-téng, E-hut kóng, " Góa hōng Siōng-chú ê kài-bēng ū tāichì lâi pò lí chai. " Ông chiū tùi chō-ūi khiā khí-.lâi.
3:21 E-hut chiū chhun tò chhiú, tùi chiàⁿ-thúi poe̍h-chhut kiàm, chha̍k ji̍p-khì ông ê pak-tó͘,
3:22 Kiàm ê pèⁿ mā sūn-sòa ji̍p-.khì, kiàm hō͘ iû kā tiâu-.leh, in-ūi i bô tùi i ê pak-tó͘ poe̍h kiàm chhut-.lâi, chiū thàng-kòe kha-chiah-phiaⁿ chhut-.lâi.
3:23 E-hut chiū chhut-khì kàu mn̂g-lông, kā hiahê lâu-mn̂g koaiⁿ-só khí-.lâi.
3:24 I chhut-khì liáu-āu, ông ê lô͘-po̍k kàu, khòaⁿ tio̍h lâu-mn̂g koaiⁿ-só teh, chiū kóng, " I it-tēng sī tī lâu-téng teh tāi-piān. "
3:25 In thèng-hāu kàu tio̍h-kiaⁿ kah gāng-.khì, khòaⁿ tio̍h i bô khui lâu-téng ê mn̂g, chiū gia̍h só-sî lâi khui, lí khòaⁿ, in ê chú-lâng í-keng sí-.khì, tó tī thô͘-kha.
3:26 In iân-chhiân ê sî, E-hut chiū tô-cháu, keng-kòe phah chio̍h-siōng ê tē liáu-āu, chiū siám cháu-khì-kàu Se-i-la̍h.
3:27 Kàu-ūi liáu-āu chiū tī E-hu-laim soaⁿ-tē pûn sàu-kak, I-su-la-el lâng chiū tòe i tùi soaⁿ-tē lo̍h-.khì, E-hut kiâⁿ tī thâu-chêng,
3:28 tùi in kóng, " Lín tòe góa lâi, in-ūi Siōng-chú í-keng kā lín ê tùi-te̍k Mô͘-ap lâng kau tī lín ê chhiú. " In chiū tòe i lo̍h-.khì, tī Mô͘-ap ê tùi-bīn pé-siú Iol-tàn hô ê tō͘-thâu, bô iông-ín chi̍t-ê lâng kòe-.khì.
3:29 Hit sî, thâi-sí Mô͘-ap lâng chha-put-to chi̍t bān, lóng sī tōa-hàn ê ióng-sū, bô kah chi̍t-ê cháu lī-khui.
3:30 Chiū ánne, Mô͘-ap chiū khut-ho̍k tī I-su-la-el lâng, tē-hng thài-pêng peh-cha̍p nî.
3:31 Siam-gal
E-hut liáu-āu, ū A-nah ê kiáⁿ Siam-gal, i ēng kóaⁿ gû ê thih-chhì phah-sí la̍k-pah-ê Hui-lī-sū lâng. I mā kiù I-su-la-el lâng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。