士师记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
1:1 Iô-tah kah Si-miān Chi-cho̍k Lia̍h tio̍h A-to-nî-be-chek
Io-siú-ah sí liáu-āu, I-su-la-el lâng mn̄g Siōng-chú kóng, " Siáⁿ lâng tio̍h chò thâu khì kah kā goán kong-kek ê Ka-nân lâng kau-chiàn? "
1:2 Siōng-chú kóng, " Iô-tah tio̍h khì, lí khòaⁿ, Góa í-keng kā hit-ê tē kau tī i ê chhiú tiong. "
1:3 Iô-tah tùi i ê a-hiaⁿ Si-miān kóng, " Chhiáⁿ lí kah góa chò-hóe lâi-khì góa só͘ liam tio̍h ê tē kah Ka-nân lâng kau-chiàn; góa mā beh kah lí khì, kàu lí só͘ liam tio̍h ê tē. " Si-miān chiū kah i khì.
1:4 Iô-tah chiū khì, Siōng-chú kā Ka-nân lâng kah Pe-lí-ji lâng, kau tī in ê chhiú tiong.
1:5 In tī Be-chek kā in phah-sí chi̍t-bān lâng, koh tī Be-chek tú tio̍h A-to-nî-be-chek kah i kau-chiàn, kiat-kó thâi-iâⁿ Ka-nân lâng kah Pe-lí-ji lâng.
1:6 A-to-nî-be-chek tô-cháu, in kā i jiok, lia̍h tio̍h i, chám-tn̄g i ê chhiú kah kha ê tōa-thâu-bú.
1:7 A-to-nî-be-chek kóng, " Chá-chêng ū chhit-cha̍p-ê ông, chhiú kah kha ê tōa-thâu-bú lóng chám khí-.lâi, tī góa ê toh-kha khioh chia̍h-mi̍h. Τaⁿ Siōng-chú chiàu góa só͘ kiâⁿ ê, lâi kā góa pò-èng. " In kā i chhōa kàu Ê-lú-sa-lèm, i chiū sí tī hia.
1:8 Iô-tah Chi-cho̍k Chiàm-niá Ê-lú-sa-lèm kah He-bú-lông
Iô-tah lâng kong-kek Ê-lú-sa-lèm, cheng-ho̍k i, ēng to kā in thâi-sí, koh pàng hóe sio siâⁿ.
1:9 Āu-lâi, Iô-tah lâng lo̍h-khì kah tòa tī soaⁿ-tē lâm pêng ê tē, to̍h-sī pêng-goân ê tē ê Ka-nân lâng kau-chiàn.
1:10 Iô-tah koh khì phah hiahê tòa tī He-bú-lông ê Ka-nân lâng, thâi-sí Sī-su, A-hi-mān kah That-mái. He-bú-lông í-chêng ê miâ kiò-chò Ki-lia̍t-a-ba.
1:11 Ot-ni-el Chiàm-niá Te-bil Siâⁿ
( ISA 15: 13-19)
I tùi hia khì phah tòa tī Te-bil ê jîn-bîn; Te-bil í-chêng ê miâ kiò-chò Ki-lia̍t-se-hut.
1:12 Ka-le̍p kóng, " Nā ū lâng phah Ki-lia̍t-se-hut lâi kā i cheng-ho̍k, góa beh kā góa ê chabó͘ kiáⁿ Ak-sa̍h hō͘ i chò bó͘. "
1:13 Ka-le̍p ê sió-tī Ke-ná-juh ê kiáⁿ Ot-ni-el kā i cheng-ho̍k, i chiū kā i ê chabó͘ kiáⁿ Ak-sa̍h hō͘ Ot-ni-el chò bó͘.
1:14 Ak-sa̍h kòe-mn̂g ê sî, i khǹg tiōng-hu tùi in lāu-pē thó chi̍t khu chhân. Ak-sa̍h tùi lî téng lo̍h-.lâi, Ka-le̍p chiū mn̄g i kóng, " Lí ài siáⁿ-mi̍h? "
1:15 I ìn kóng, " Kiû lí kā góa sù-hok, lí í-keng kā góa an-tì tī lâm-hong ê tē, kiû lí hō͘ góa chúi-chôaⁿ. " Ka-le̍p chiū kā téng-bīn ê chúi-chôaⁿ kah ē-bīn ê chúi-chôaⁿ hō͘ i.
1:16 Iô-tah kah Biān-iá-mín Chi-cho̍k ê Sèng-lī
Mô͘-se ê gōa-chhek sī Ke-nî lâng, i ê kiáⁿ-sun kah Iô-tah ê kiáⁿ-sun tùi chó-chhiū siâⁿ chò-hóe khì, lâi-kàu A-la̍t lâm pêng ê Iô-tah ê khòng-iá kah hia ê lâng chò-hóe tòa.
1:17 Iô-tah kah i ê a-hiaⁿ Si-miān chò-hóe khì, phah-sí tòa tī Che-hoat ê Ka-nân lâng, choân-pō͘ kā in bia̍t-tiāu, hit-ê siâⁿ chiū ánne kiò-chò Hol-mah.
1:18 Iô-tah koh cheng-ho̍k Ga-jah kah i ê kéng-kài, A-si̍t-kî-lûn kah i ê kéng-kài, Ek-lóng kah i ê kéng-kài.
1:19 Siōng-chú kah Iô-tah tông-chāi, i chiū kā tòa tī soaⁿ-tē ê jîn-bîn kóaⁿ chhut-.khì, chóng-.sī, bē tàng kā tòa tī pêng-goân ê jîn-bîn kóaⁿ chhut-.khì, in-ūi in ū thih-chhia.
1:20 In chiàu Mô͘-se só͘ kóng ê, ēng He-bú-lông hō͘ Ka-le̍p, i chiū tùi hia kā A-lap saⁿ-ê kiáⁿ kóaⁿ chhut-.khì.
1:21 Biān-iá-mín lâng bô kā tòa tī Ê-lú-sa-lèm ê I-é-bú-suh lâng kóaⁿ chhut-.khì. I-é-bú-suh lâng iû-goân tī Ê-lú-sa-lèm kah Biān-iá-mín lâng chò-hóe tòa, it-ti̍t kàu kin-á-ji̍t.
1:22 E-hu-laim kah Má-ná-se Chi-cho̍k Chiàm-niá Be-thel
Iô-sé-huh ke mā khì kong-kek Be-thel, ū Siōng-chú kah in tông-chāi.
1:23 Iô-sé-huh ke chhe lâng khì thau-khòaⁿ Be-thel, hit-ê siâⁿ ê miâ khí-thâu sī kiò-chò Lù-chuh.
1:24 Chò cheng-thàm ê khòaⁿ tio̍h chi̍t-ê lâng tùi siâⁿ lāi chhut-.lâi, chiū tùi i kóng, " Kiû lí kā ji̍p siâⁿ ê lō͘ pò goán chai, goán ē hó khoán-thāi lí. "
1:25 Hitê lâng chiū pò in ji̍p siâⁿ ê lō͘, in chiū ēng to thâi-sí siâⁿ lāi ê jîn-bîn, to̍k-to̍k pàng hit-ê lâng kah i ê choân ke lī-khui.
1:26 Hitê lâng khì Hiat lâng ê tē, khí chi̍t chō siâⁿ, hō-miâ kiò-chò Lù-chuh. Kàu kin-á-ji̍t iáu kiò chit-ê miâ.
1:27 Bô hō͘ I-su-la-el Lâng Kóaⁿ-chhut ê Jîn-bîn
Má-ná-se mā bô kóaⁿ-chhut Biat-siang kah i ê chng-thâu ê jîn-bîn, Tha-nak kah i ê chng-thâu ê jîn-bîn, Tol kah i ê chng-thâu ê jîn-bîn, Ip-le-àm kah i ê chng-thâu ê jîn-bîn, Me-gi-tóng kah i ê chng-thâu ê jîn-bîn; Ka-nân lâng chiū koat-tēng tòa tī hiahê só͘-chāi.
1:28 Kàu I-su-la-el kiông-sēng liáu-āu, chiū hō͘ Ka-nân lâng chò khó͘-kang, bô choân-pō͘ kā in kóaⁿ chhut-.khì.
1:29 E-hu-laim mā bô kā tòa tī Ge-chel ê Ka-nân lâng kóaⁿ chhut-.khì, Ka-nân lâng chiū tī in tiong-kan, iû-goân tòa tī Ge-chel.
1:30 Che-bú-lông mā bô kā Ki-lûn kah Na-ha-lal ê jîn-bîn kóaⁿ chhut-.khì. Ka-nân lâng chiū iû-goân tòa tī in tiong-kan, lâi chò khó͘-kang.
1:31 A-sel mā bô kā A-kho tòa tī Si-tòng, A-hek-la̍h, Ak-chip, Hek-pa, A-hut-kek kah Le-hap ê jîn-bîn kóaⁿ chhut-.khì.
1:32 A-sel lâng kah tòa hit só͘-chāi Ka-nân lâng ê tiong-kan chò-hóe tòa, in-ūi bô kā in kóaⁿ chhut-.khì.
1:33 Ná-hu-tha-lím bô kā Bia̍t-si-mé-si kah Pek-a-la̍p tòa ê jîn-bîn kóaⁿ chhut-.khì, Ná-hu-tha-lím chiū tòa tī hit só͘-chāi Ka-nân lâng ê tiong-kan; chóng-.sī, tòa tī Bia̍t-si-mé-si kah Pek-a-la̍p ê jîn-bîn lóng chò khó͘-kang.
1:34 A-mô͘-lī lâng kiông-pek Tàn ê lâng tòa tī soaⁿ-tē, bô iông-ín in lo̍h-lâi pêng-goân.
1:35 A-mô͘-lī lâng chiū koat-tēng beh tòa tī Hi-lia̍t soaⁿ, A-iá-lông kah Sial-bím. Āu-lâi, Iô-sé-huh ke kiông-sēng khí-.lâi, chiū hō͘ in chò khó͘-kang.
1:36 A-mô͘-lī lâng ê tē-kài, sī tùi A-khek-la̍h-pin soaⁿ-phiâⁿ, tùi Se-la̍h it-ti̍t khì.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。