约书亚记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
3:1 I-su-la-el Lâng Kòe Iol-tàn Hô
Thiⁿ-kng, Io-siú-ah thàu-chá khí-.lâi kah I-su-la-el jîn-bîn lóng lī-khui Si̍t-tîm, lâi-kàu Iol-tàn, iáu-bōe kòe-.khì, chiū tī hia hioh-khùn, thèng-hāu kòe hô.
3:2 Kòe saⁿ ji̍t, koaⁿ-tiúⁿ piàn kiâⁿ iâⁿ tiong,
3:3 bēng-lēng jîn-bîn kóng, " Lín khòaⁿ tio̍h Siōng-chú — lín ê Siōng-tè ê iok-kūi, koh khòaⁿ tio̍h chè-si Lē-bī lâng kng i ê sî, tio̍h lī-khui lín ê só͘-chāi, lâi tòe in ê āu-bīn kiâⁿ.
3:4 Chóng-.sī, lín kah iok-kūi sio-lī, chha-put-to tio̍h niû nn̄g-chheng tiú ê hn̄g, m̄ thang pek-kīn i, ánne sī beh hō͘ lín chai só͘ tio̍h kiâⁿ ê lō͘, in-ūi lín pêng-sî m̄ bat kiâⁿ chit tiâu lō͘. "
3:5 Io-siú-ah tùi jîn-bîn kóng, " Lín tio̍h kakī sèng-kiat, in-ūi bîn-á-chài Siōng-chú ē tī lín tiong-kan kiâⁿ kî-sū. "
3:6 Io-siú-ah koh hoan-hù chè-si kóng, " Lín kng iok-kūi khí-.lâi, kiâⁿ tī jîn-bîn ê thâu-chêng." In chiū kā iok-kūi kng khí-.lâi, kiâⁿ tī jîn-bîn ê thâu-chêng.
3:7 Siōng-chú tùi Io-siú-ah kóng, " Tùi kin-á-ji̍t khí, Góa beh hō͘ lí tī I-su-la-el jîn-bîn ê ba̍k-chiu chêng chò tōa, hō͘ in chai Góa kah lí tông-chāi, chhin-chhiūⁿ í-chêng kah Mô͘-se tông-chāi.
3:8 Lí tio̍h hoan-hù kng iok-kūi ê chè-si kóng, ' Lín kàu Iol-tàn hô chúi piⁿ ê sî, tio̍h tī Iol-tàn thêng-kha. '"
3:9 Io-siú-ah tùi I-su-la-el lâng kóng, " Lín kiâⁿ óa-.lâi, thiaⁿ Siōng-chú — lín ê Siōng-tè ê ōe. "
3:10 Io-siú-ah koh kóng, " Chiū ánne, lín thang chai oa̍h ê Siōng-chú tī lín tiong-kan, ē tī lín ê thâu-chêng kóaⁿ-tio̍k Ka-nân lâng, Hiat lâng, Hi-bī lâng, Pe-lí-ji lâng, Gi-ga-sih lâng, A-mô͘-lī lâng kah I-é-bú-suh lâng;
3:11 lí khòaⁿ, phó͘-thiⁿ-ē ê Chú-cháiⁿ ê iok-kūi ē tī lín ê thâu-chêng kòe-.khì, ji̍p-khì Iol-tàn.
3:12 Lín taⁿ tio̍h tùi I-su-la-el chi-cho̍k tiong-kan kéng-soán cha̍p-jī-ê lâng, múi chi-cho̍k chi̍t-ê lâng,
3:13 lâi-kàu kng phó͘-thiⁿ-ē ê chì-koân Siōng-chú ê iok-kūi ê chè-si hia, in ê kha khiā tī Iol-tàn hô ê chúi, Iol-tàn hô ê chúi to̍h-sī tùi téng-bīn lâu lo̍h-.lâi ê chúi ē chia̍t-tn̄g, khiā khí-lâi chiâⁿ-chò chúi-chhiûⁿ. "
3:14 Jîn-bîn lī-khui pò͘-pêⁿ, beh kòe Iol-tàn hô ê sî, chè-si chiū kng iok-kūi kiâⁿ tī jîn-bîn ê thâu-chêng.
3:15 （Tī siu-sêng ê sî, Iol-tàn hô ê chúi tiāⁿtiāⁿ pôaⁿ-kòe i ê hōaⁿ. ） Kng iok-kūi ê lâi-kàu Iol-tàn hô, kng iok-kūi ê chè-si kha chi̍t ē ùn tio̍h chúi,
3:16 hit-ê tùi téng-bīn lâu lo̍h-.lâi ê chúi chiū khiā khí-lâi chiâⁿ-chò chúi-chhiûⁿ, nn̄g pêng sio-lī chin hn̄g, tī Sat-la̍h-tàn piⁿ-á ê A-tám siâⁿ; hit-ê lâu tī A-la̍h-bah hái, to̍h-sī Iâm-hái, hiahê chúi choân-jiân chia̍t-tn̄g. Jîn-bîn chiū tī I-é-lī-kho siâⁿ ê tùi-bīn kòe-.khì.
3:17 Kng Siōng-chú iok-kūi ê chè-si tī Iol-tàn hô ê ta tē tiāⁿtiāⁿ khiā-.leh, I-su-la-el jîn-bîn lóng tùi ta tē kòe-.khì, it-ti̍t kàu jîn-bîn choân-pō͘ kòe Iol-tàn hô.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。