约书亚记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
2:1 Io-siú-ah Phài Bi̍t-thàm Ji̍p-khì I-é-lī-kho Siâⁿ
Nùn ê kiáⁿ Io-siú-ah tùi Si̍t-tîm thau-thau-á chhe nn̄g-ê lâng chò cheng-thàm, kā in hoan-hù kóng, " Lín khì khòaⁿ hit-ê tē kah I-é-lī-kho siâⁿ. " In chiū khì, kàu chi̍t-ê chhiong-ki La-ha̍t ê chhù, chiū tī hia hioh-khùn.
2:2 Ū lâng khì pò-kò I-é-lī-kho siâⁿ ông, kóng, " Lí khòaⁿ, kin-àm ū I-su-la-el lâng lâi chia thau-khòaⁿ lán chit-ê tē. "
2:3 I-é-lī-kho siâⁿ ông chhe lâng khì La-ha̍t hia, kóng, " Hiahê lâi lí chia, ji̍p-khì lí ê chhù ê lâng, lí tio̍h chhōa in chhut-.lâi, in-ūi in lâi sī beh thau-khòaⁿ chit-ê choân tē. "
2:4 Cha-bó͘ lâng kā hit nn̄g-ê lâng chhàng ba̍t, chiū ìn kóng, " Chin-chiàⁿ ū lâng lâi góa chia; chóng-.sī, in tùi tó-ūi lâi, góa m̄-chai.
2:5 Ji̍t àm beh koaiⁿ siâⁿ mn̂g ê sî, hiahê lâng chhut-.khì, in khì tó-ūi góa m̄-chai. Lín kóaⁿ-kín khì jiok, chiū ē jiok-.tio̍h. "
2:6 ( Chóng-.sī, chabó͘ lâng í-keng chhōa in chiūⁿ chhù téng, ēng só͘ pâi tī chhù téng ê môa-kó lâi kā in khàm-.leh. )
2:7 Hiahê lâng chiū tùi Iol-tàn hô hit tiâu lō͘ khì jiok in, lâi-kàu lō͘-thâu; jiok in ê lâng chi̍t-ē chhut-.khì, siâⁿ mn̂g chiū koaiⁿ khí-.lâi.
2:8 Nn̄g lâng iáu-bōe khì khùn, chabó͘ lâng chiū chiūⁿ chhù téng lâi-kàu in hia,
2:9 Tùi in kóng, " Góa chai Siōng-chú í-keng kā chit-ê tē siúⁿ-sù hō͘ lín, koh in-ūi lín ê iân-kò͘ goán lóng chin kiaⁿ, só͘-ū tòa tī chit só͘-chāi ê jîn-bîn, tī lín ê bīn-chêng lóng sit táⁿ;
2:10 in-ūi goán ū thiaⁿ tio̍h lín chhut Ai-gi̍p ê sî, Siōng-chú án-chóaⁿ tī lín ê thâu-chêng hō͘ Âng-hái ê chúi ta-.khì, koh ū lín án-chóaⁿ khoán-thāi Iol-tàn hô hit pêng nn̄g-ê A-mô͘-lī ông — Si-hông kah O͘-k, to̍h-sī lín só͘ húi-bia̍t ê.
2:11 Goán chi̍t-ē thiaⁿ tio̍h chiahê tāichì chiū sit táⁿ. In-ūi lín ê iân-kò͘ ta̍k-ê lâng sîn put hù thé. In-ūi Siōng-chú — lín ê Siōng-tè, tī thiⁿ-téng tē-hā chò Siōng-tè.
2:12 Taⁿ góa í-keng kā lín hó khoán-thāi, chhiáⁿ lín kí Siōng-chú tùi góa chiùchōa, beh hó khoán-thāi góa lāu-pē ê ke, sòa hō͘ góa chi̍t-ê si̍t-chāi ê kì-hō,
2:13 ē kā góa ê lāu-pē, lāu-bú, góa ê hiaⁿ-tī, chí-mōe kah it-chhè sio̍k in só͘-ū ê, chín-kiù goán ê sèⁿ-miā, hō͘ goán thang bián sí. "
2:14 Nn̄g lâng ìn i kóng, " Lí nā bô lāu-sia̍p goán chit-ê tāichì, goán kam-goān ēng goán ê sèⁿ-miā thè lín, kàu Siōng-chú kā chit-ê tē siúⁿ-sù hō͘ goán ê sî, goán ē ēng chû-ài sêng-si̍t khoán-thāi lí. "
2:15 Chiū ánne, i ēng soh-á tùi thang-á kā in lūi lo̍h-.khì, in-ūi i ê chhù khí tī siâⁿ chhiûⁿ, i mā tòa tī chhiûⁿ téng.
2:16 I tùi in kóng, " Lín tio̍h chiūⁿ-khì soaⁿ-.ni̍h, khióng-kiaⁿ jiok ê lâng tú tio̍h lín, lín tio̍h tī hia bih saⁿ ji̍t, thèng-hāu jiok lín ê lâng tńg-.lâi, jiân-āu chiah thang kiâⁿ lín ê lō͘. "
2:17 Nn̄g lâng tùi i kóng, " Lí kah goán só͘ chiùchōa ê, goán it-tēng bô ūi tio̍h hit-ê lâi hoān chōe.
2:18 Goán nā kàu chit só͘-chāi ê sî, lí tio̍h kā chit tiâu chu-âng sek ê soh-á pa̍k tī tūi goán lo̍h-.khì ê thang-á-.ni̍h, mā tio̍h chū-chi̍p lí ê lāu-pē, lāu-bú, hiaⁿ-tī kah lí ê lāu-pē choân ke lóng tiàm lí ê chhù lāi.
2:19 Kiàn-nā chhut lí ê ke ê mn̂g khì ke-lō͘ ê, i ê sí sī kakī chū chhú ê, bô goán ê chōe. Kiàn-nā kah lí tī chhù lāi ê, nā ū lâng hē chhiú hāi i, i ê sí to̍h-sī goán ê chōe.
2:20 Chóng-.sī, lí nā lāu-sia̍p goán chit-ê tāichì, lí só͘ kah goán chiùchōa ê chiū kah goán bô koan-hē. "
2:21 I kóng, " Τhang chiàu lín ê ōe lâi kiâⁿ. " Chiū ánne, i chhe in chhut-.khì, in chiū khì. Jiân-āu, i ēng chu-âng sek ê soh-á pa̍k tī thang-á.
2:22 Nn̄g lâng khì-kàu soaⁿ-.ni̍h, tiàm hia saⁿ ji̍t, thèng-hāu jiok in ê lâng tńg-.khì. Jiok in ê lâng-iân-lō͘ chhōe in, mā chhōe bô tio̍h in.
2:23 Nn̄g lâng chiū lo̍h soaⁿ tńg-.lâi, kòe hô lâi-kàu Nùn ê kiáⁿ Io-siú-ah hia, tùi i kóng-khí in só͘ tú tio̍h it-chhè ê tāichì.
2:24 In koh tùi Io-siú-ah kóng, " Siōng-chú kó-jiân kā hit-ê choân tē kau tī lán ê chhiú; tòa tī hit só͘-chāi só͘-ū ê jîn-bîn, tī lán ê bīn-chêng lóng sit táⁿ. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。