申命记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
18:1 Chè-si Èng-tit ê Hūn-gia̍h
" Chè-si Lē-bī lâng, choân Lē-bī ê chi-cho̍k, in tī I-su-la-el tiong bô hūn bô gia̍p; in só͘ beh chia̍h ê, to̍h-sī Siōng-chú ê hóe-chè kah I ê sán-gia̍p.
18:2 In tī in hiaⁿ-tī tiong bô sán-gia̍p, Siōng-chú chò in ê sán-gia̍p, chiàu só͘ tùi in kóng ê.
18:3 " Chè-si tùi jîn-bîn só͘ eng-kai tit tio̍h ê hūn to̍h-sī chiahê: kiàn-nā hiàn gû á-.sī iûⁿ chò chè ê, tio̍h kā chêng-thúi kah nn̄g-ê chhùi-phóe, í-ki̍p tō͘ hō͘ chè-si.
18:4 Lí ê ngó͘-kok, lí ê chiú, lí ê iû, khí-thâu siu-sêng ê kah khí-thâu chián ê iûⁿ-mn̂g, lóng tio̍h hō͘ i.
18:5 In-ūi Siōng-chú — lí ê Siōng-tè tùi lí ê chèng chi-cho̍k kéng-soán i, hō͘ i kah i ê kiáⁿ-sun, hōng Siōng-chú ê miâ khiā-.leh, ho̍k-sāi I kàu éng-oán.
18:6 " Nā ū Lē-bī lâng bô-lūn kià-kha tī I-su-la-el tiong tó chi̍t chō siâⁿ mn̂g lāi, tùi hia chhut-.lâi, choan-sim ì-ài lâi-kàu Siōng-chú só͘ beh kéng-soán ê só͘-chāi,
18:7 i chiū ē hōng Siōng-chú — i ê Siōng-tè ê miâ lâi ho̍k-sāi, chhin-chhiūⁿ i hiahê chèng hiaⁿ-tī khiā tī Siōng-chú ê bīn-chêng ê Lē-bī lâng.
18:8 Τī i bē chó͘-sian ê sán-gia̍p í-gōa, i só͘ tit tio̍h chia̍h ê hūn-gia̍h tio̍h kah in pêⁿ. "
18:9 M̄-thang O̍h Gōa-pang ê Hong-sio̍k
" Lí nā lâi-kàu Siōng-chú — lí ê Siōng-tè só͘ siúⁿ-sù hō͘ lí ê tē, lí m̄ thang o̍h hiahê kok khó-ò͘ⁿ ê tāichì lâi kiâⁿ.
18:10 Lín tiong-kan m̄ thang ū lâng hō͘ kiáⁿ-jî keng-kòe hóe, kiâⁿ siâ-su̍t ê, chiam-pok ê, khòaⁿ-miā ê, chò sai-kong ê,
18:11 ōe-hû ê, chò tâng-ki ê, kiâⁿ mô͘-su̍t ê, khan-bông ê.
18:12 In-ūi kiàn-nā kiâⁿ hiahê tāichì ê, lóng sī Siōng-chú só͘ thó-ià ê, mā sī ūi tio̍h chiahê khó-ò͘ⁿ ê tāichì, Siōng-chú — lí ê Siōng-tè chiah tùi lí ê bīn-chêng kā in kóaⁿ chhut-.khì.
18:13 Lí tùi Siōng-chú — lí ê Siōng-tè, tio̍h chò oân-choân ê lâng. "
18:14 Èng-ín Heng-khí Chi̍t Ūi Sian-ti
" In-ūi lí só͘ beh sêng-chiap hiahê kok, lóng sī chun-thàn chiam-pok ê, kiâⁿ siâ-su̍t-ê; kóng tio̍h lí, Siōng-chú — lí ê Siōng-tè chiū m̄-chún lí ánne kiâⁿ.
18:15 Siōng-chú — lí ê Siōng-tè ē tùi lín tiong-kan, tùi lín ê hiaⁿ-tī, heng-khí sian-ti chhin-chhiūⁿ góa, lín tio̍h chun-thàn i.
18:16 " Chiàu lí tī Ho-lep chū-hōe ê ji̍t, tùi Siōng-chú — lí ê Siōng-tè it-chhè só͘ kiû ê, kóng, ' M̄-thang hō͘ góa koh thiaⁿ tio̍h chì-koân Siōng-chú ê siaⁿ, mā m̄ thang hō͘ góa koh khòaⁿ tio̍h chit-ê tōa-hóe, bián-tit góa ē sí-bông. '
18:17 Siōng-chú chiū tùi góa kóng, ' In só͘ kóng ê sī hó,
18:18 Góa beh tī in hiaⁿ-tī tiong, kā in heng-khí chi̍t-ê sian-ti chhin-chhiūⁿ lí, Góa ē kā Góa ê ōe hē tī i ê chhùi, i ē kā Góa it-chhè só͘ bēng-lēng ê tùi in kóng.
18:19 I thok Góa ê miâ lâi thoân Góa ê ōe, lâng nā m̄-thiaⁿ, Góa ē kā i pān.
18:20 Chóng-.sī, sian-ti ngē-ngē beh thok Góa ê miâ, kóng Góa só͘ bô bēng-lēng i kóng ê ōe, á-.sī hōng pa̍t-ê sîn-bêng ê miâ lâi kóng, hit-ê sian-ti tio̍h sí. '
18:21 " Lí ê sim nā siūⁿ kóng, ' Siōng-chú só͘ bô kóng ê ōe, goán beh ná ē chai? '
18:22 Nā ū sian-ti thok Siōng-chú ê miâ lâi kóng ê, hit-ê tāichì nā bô si̍t-hiān, mā bô èng-giām, che sī Siōng-chú só͘ bô kóng ê, sī hit-ê sian-ti ngē-ngē beh lâi kóng ê, lí to̍h m̄-bián kiaⁿ i. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。