申命记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
14:1 Kìm-chí Gōa-pang ê Song-sū Hong-sio̍k
" Lín sī Siōng-chú — lín ê Siōng-tè ê kiáⁿ-jî, m̄ thang ūi tio̍h sí-lâng koah kakī ê seng-khu, mā m̄ thang tī lí nn̄g lúi ba̍k-chiu ê tiong-ng thì kng-kng,
14:2 In-ūi lí chò sèng ê jîn-bîn, lâi sio̍k tī Siōng-chú — lí ê Siōng-tè, Siōng-chú tùi tē-chiūⁿ bān-bîn tiong, lâi kéng-soán lí chò I te̍k-pia̍t ê chú-bîn. "
14:3 Chheng-khì kah Bô Chheng-khì ê Tōng-bu̍t
(LBK 11:1-47）
" Kiàn-nā khó-ò͘ⁿ ê mi̍h, lí lóng m̄ thang chia̍h.
14:4 Lí só͘ thang chia̍h ê chengseⁿ to̍h-sī chiahê: gû, mî-iûⁿ, soaⁿ-iûⁿ,
14:5 lo̍k kah lêng-iûⁿ, sió-lo̍k, iá soaⁿ-iûⁿ, bî-lo̍k, chhiah-iûⁿ kah kiuⁿ.
14:6 Cheng-seⁿ tiong kiàn-nā pun-tê, tê thiah chò nn̄g pêng ê, hoan-chháu ê chengseⁿ, lín lóng thang chia̍h.
14:7 Chóng-.sī, hiahê hoan-chháu ê á-.sī thiah-tê-.ê ê tiong-kan, lín m̄ thang chia̍h ê, to̍h-sī chiahê: lo̍k-tô, thò͘, soa-hoan, in-ūi i sī hoan-chháu m̄ koh bô pun-tê, tùi lín lâi kóng sī bô chheng-khì.
14:8 Ti — in-ūi i ū pun-tê ā bô hoan-chháu, tùi lín lâi kóng sī bô chheng-khì. In ê bah lín m̄ thang chia̍h, sí-.khì ê mā m̄ thang bong.
14:9 " Tī chúi tiong lín só͘ thang chia̍h ê sī chiahê: kiàn-nā ū si̍t ū lân ê, lín lóng thang chia̍h;
14:10 kiàn-nā bô si̍t bô lân ê, lín lóng m̄ thang chia̍h; nā chia̍h, tùi lín lâi kóng chiū bô chheng-khì.
14:11 " Kiàn-nā chheng-khì ê chiáu, lín lóng thang chia̍h.
14:12 M̄-thang chia̍h ê to̍h-sī eng, hiau, tiau,
14:13 Chian, sió-eng, ian kah i ê lūi,
14:14 it-chhè ê o͘-a kah i ê lūi,
14:15 tô-chiáu, kang ê tô-chiáu, hî-eng, chhiok-eng kah i ê lūi,
14:16 àm-kong-chiáu, ko͘-n̂g, niau-thâu-eng,
14:17 thê-ô͘, chhàu-thâu-eng, lô͘-chî,
14:18 ho̍h, pe̍h-lēng-si kah i ê lūi, tì-kè-chiáu, pián-hok.
14:19 " Kiàn-nā ū si̍t ē sô ê mi̍h, tùi lín lâi kóng chiū bô chheng-khì, lín lóng m̄ thang chia̍h.
14:20 Kiàn-nā ē poe chheng-khì ê mi̍h, lín lóng thang chia̍h.
14:21 " Kiàn-nā kakī sí-.khì ê mi̍h, lín lóng m̄ thang chia̍h, thang hō͘ lín mn̂g lāi kià-kha ê lâng chia̍h á-.sī bē hō͘ gōa-kok lâng chia̍h, in-ūi lí sī sèng ê jîn-bîn, sio̍k tī Siōng-chú — lí ê Siōng-tè. " Chú soaⁿ-iûⁿ-á, m̄ thang ēng i ê bú ê leng. "
14:22 Cha̍p Hūn Thiu Chi̍t Hūn ê Kui-tēng
" Lí tio̍h kā lí iā chéng só͘ chhut-sán ê, to̍h-sī lí ê chhân-hn̂g ta̍k nî só͘ chhut ê, cha̍p hūn thiu chi̍t-hūn.
14:23 Lí ê ngó͘-kok, chiú, iû ê cha̍p-hūn chi-it kah gû-iûⁿ thâu-chúi seⁿ ê, lí tio̍h tī Siōng-chú — lí ê Siōng-tè ê bīn-chêng chia̍h, to̍h-sī I só͘ beh kéng-soán lâi an-tì I ê miâ ê só͘-chāi, thang hō͘ lí ha̍k-si̍p tiāⁿtiāⁿ kèng-ùi Siōng-chú — lí ê Siōng-tè.
14:24 Tng Siōng-chú — lí ê Siōng-tè kā lí sù-hok ê sî, Siōng-chú — lí ê Siōng-tè só͘ beh kéng-soán an-tì I ê miâ ê só͘-chāi, nā lī-khui lí siuⁿ hn̄g, hit tiâu lō͘ siuⁿ tn̂g, tì-sú lí bē tàng tòa chiahê mi̍h kàu hia,
14:25 lí chiū thang ōaⁿ-chò gîn, kā gîn pau khí-.lâi, lia̍p tī lí ê chhiú lāi, ji̍p-khì Siōng-chú — lí ê Siōng-tè só͘ kéng-soán ê só͘-chāi.
14:26 Lí ēng chit-ê gîn chiàu sim só͘ ì-ài ê lâi bé, á-.sī gû, á-.sī iûⁿ, á-.sī chiú, á-.sī kāu chiú, kiàn-nā lí ê sim só͘ ì-ài ê; tī hia lí kah lí ê ka-koàn, tī Siōng-chú — lí ê Siōng-tè ê bīn-chêng lâi chia̍h, lâi hoaⁿ-hí.
14:27 " Τòa tī lí mn̂g lāi ê Lē-bī lâng, lí m̄ thang kā i pàng-sak, in-ūi i tī lín tiong-kan bô hūn bô gia̍p.
14:28 Ta̍k pái kàu saⁿ nî móa, lí tio̍h kā hit nî ê lông-sán-bu̍t cha̍p hūn thiu chi̍t hūn, khǹg tī lí ê mn̂g lāi.
14:29 In-ūi Lē-bī lâng tī lín tiong-kan bô hūn bô gia̍p, i kah chhut-gōa lâng, í-ki̍p ko͘-jî, kóaⁿ-hū, tòa tī lín mn̂g lāi ê, lóng thang lâi chia̍h kàu pá. Tì-sú Siōng-chú — lí ê Siōng-tè tī lí só͘ chò it-chhè ê tāichì, kā lí sù-hok. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。