申命记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
6:1 Tōa Kài-bēng
" Che sī Siōng-chú — lín ê Siōng-tè só͘ bēng-lēng lâi kà-sī lín ê kài-bēng, lu̍t-lē, hoat-tō͘, hō͘ lín tī lín só͘ beh kòe-khì tit tio̍h chò sán-gia̍p ê tē thang chiàu ánne kiâⁿ,
6:2 mā thang hō͘ lí kah lí ê kiáⁿ-kiáⁿ sun-sun, it-seng kèng-ùi Siōng-chú — lí ê Siōng-tè, chip-siú I só͘-ū ê lu̍t-lē kah kài-bēng, to̍h-sī góa só͘ bēng-lēng lí ê, hō͘ lí ê ji̍t-chí tit tio̍h kú-tn̂g.
6:3 I-su-la-el lâng, lí tio̍h thiaⁿ, tio̍h chip-siú lâi chiàu ánne kiâⁿ, hō͘ lí thang tī hit-ê lâu leng kah bi̍t ê tē, tit tio̍h hióng-hok, lâng-gia̍h ke-thiⁿ hui-siông chē, chhin-chhiūⁿ Siōng-chú — lí chó͘-sian ê Siōng-tè só͘ èng-ín lí ê.
6:4 " I-su-la-el lâng, lí tio̍h thiaⁿ! Siōng-chú — lán ê Siōng-tè, sī to̍k-it ê Siōng-chú.
6:5 Lí tio̍h chīn-sim, chīn-sèng, chīn-la̍t, thiàⁿ Siōng-chú — lí ê Siōng-tè.
6:6 Góa kin-á-ji̍t só͘ bēng-lēng lí chiahê ōe, tio̍h kì tī lí ê sim,
6:7 mā tio̍h ēng che khîn-khîn kà-sī lí ê kiáⁿ-jî, bô-lūn lí chē tī chhù lāi, á-.sī kiâⁿ tī lō͘-.ni̍h, khùn á-.sī khí-.lâi, lóng tio̍h káng-lūn.
6:8 Mā tio̍h pa̍k tī lí ê chhiú chò kì-hō, tì tī lí nn̄g lúi ba̍k-chiu ê tiong-ng chò kì-liām;
6:9 koh tio̍h siá tī lí ê chhù ê mn̂g-kheng, í-ki̍p lí ê mn̂g-chhòaⁿ.
6:10 Kéng-kò M̄-thang Pōe-ge̍k Siōng-tè
" Siōng-chú — lí ê Siōng-tè chhōa lí ji̍p-khì I tùi lí ê chó͘-sian A-bu-la-hàm, Í-sak, Iâ-kop, chiùchōa beh hō͘ lí ê tē, tī hia ū tōa koh súi ê siâⁿ, m̄-sī lí só͘ khí-chō ê;
6:11 mā ū chhù chek-chū móa-móa ê hó mi̍h, m̄-sī lí só͘ chek-chū ê; mā ū khui piān-piān ê chúi-chéⁿ, m̄-sī lí só͘ khui ê; mā ū phû-tô hn̂g kah kaⁿ-ná chhiū, m̄-sī lí só͘ chai-chèng ê, hō͘ lí chia̍h kàu pá.
6:12 Hit sî, lí tio̍h kín-sīn, bián-tit lí bē kì-tit Siōng-chú, to̍h-sī chhōa lí tùi Ai-gi̍p tē — chò lô͘-lē ê ke, chhut-.lâi ê.
6:13 Lí tio̍h kèng-ùi Siōng-chú — lí ê Siōng-tè, ho̍k-sāi I, kí I ê miâ lâi chiùchōa.
6:14 M̄-thang chun-thàn pa̍t-ê sîn-bêng, to̍h-sī lín sì-kho͘-ûi jîn-bîn ê hiahê sîn-bêng.
6:15 In-ūi tī lín tiong-kan ê Siōng-chú — lí ê Siōng-tè, choa̍t-tùi bô iông-ín ēng pa̍t-ê sîn-bêng lâi kah I phit-phòe, sī khióng-kiaⁿ Siōng-chú — lí ê Siōng-tè tùi lí tōa siū-khì, tùi tē-chiūⁿ kā lí tû-bia̍t.
6:16 " Lín m̄ thang chhì-thàm Siōng-chú — lín ê Siōng-tè, chhin-chhiūⁿ lín tī Mak-sá kā I chhì-thàm chi̍t-iūⁿ.
6:17 Tio̍h tì-ì chun-siú Siōng-chú — lín ê Siōng-tè ê kài-bēng kah I só͘ bēng-lēng lín ê kài-bēng, lu̍t-lē.
6:18 Siōng-chú só͘ khòaⁿ-chò chèng-ti̍t kah khòaⁿ-chò sī hó ê, lí tio̍h chiàu ánne kiâⁿ, hō͘ lí thang hióng-hok, koh thang ji̍p-khì tit tio̍h Siōng-chú tùi lí ê chó͘-sian só͘ chiùchōa ê hó tē,
6:19 beh tùi lí ê bīn-chêng kā lí só͘-ū ê tùi-te̍k kóaⁿ chhut-.khì, chiàu Siōng-chú só͘ kóng ê.
6:20 " Chiong-lâi, lí ê kiáⁿ nā mn̄g lí, kóng, ' Siōng-chú — lán ê Siōng-tè só͘ bēng-lēng lín chiahê kài-bēng, lu̍t-lē kah hoat-tō͘, sī siáⁿ-mi̍h ì-sù? '
6:21 Lí tio̍h kā lí ê kiáⁿ kóng, ' Í-chêng goán tī Ai-gi̍p chò Hôa-láu ê lô͘-lē, Siōng-chú ēng tōa koân-lêng ê chhiú, chhōa goán chhut Ai-gi̍p.
6:22 Siōng-chú tī goán ê ba̍k-chiu chêng, ēng tōa koh lī-hāi ê sîn-jiah kah kî-sū, kiâⁿ tī Ai-gi̍p kah Hôa-láu, í-ki̍p i ê choân ke téng-bīn,
6:23 tùi hia chhōa goán chhut-.lâi, beh chhōa goán ji̍p-.khì, kā I tùi lán chó͘-sian só͘ chiùchōa ê tē siúⁿ-sù hō͘ lán.
6:24 Siōng-chú bēng-lēng lán kiâⁿ chiahê it-chhè ê lu̍t-lē, thang lâi kèng-ùi Siōng-chú — lán ê Siōng-tè, hō͘ lán tiāⁿtiāⁿ tit tio̍h hok-khì, tit tio̍h I pó-choân lán ê sèⁿ-miā, chhin-chhiūⁿ kin-á-ji̍t ê khoán-sit.
6:25 Lán nā chiàu Siōng-chú — lán ê Siōng-tè só͘ bēng-lēng ê, tī I ê bīn-chêng chiàu I só͘-ū ê kài-bēng lâi kiâⁿ, che to̍h-sī lán ê gī-hêng. '"
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。