民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
36:1 Cha-bó͘ kiáⁿ Sêng-chiap Sán-gia̍p ê Kui-tēng
Sio̍k Iô-sé-huh ê kiáⁿ-sun chiahê ke, Má-ná-se ê sun, Ma-kil ê kiáⁿ Gi-lia̍t ê kiáⁿ-sun, hiahê cho̍k-tiúⁿ lâi-kàu Mô͘-se kah I-su-la-el lâng chiahê cho̍k-tiúⁿ chiahê siú-léng ê bīn-chêng, kóng,
36:2 " Siōng-chú bat bēng-lēng góa ê chú liam-khau pun tē hō͘ I-su-la-el lâng chò sán-gia̍p, góa ê chú mā siū tio̍h Siōng-chú ê bēng-lēng, kā goán ê hiaⁿ-tī Che-lo-hu-hat ê sán-gia̍p pun hō͘ i hiahê chabó͘ kiáⁿ.
36:3 In nā kè I-su-la-el pa̍t chi-cho̍k ê lâng, in ê sán-gia̍p chiū tùi goán chó͘-sian só͘ lâu ê sán-gia̍p poah kòe-.khì, ke-thiⁿ tī in só͘ beh sio̍k ê chi-cho̍k ê sán-gia̍p; ánne chiū tùi goán liam-khau só͘ tit tio̍h ê sán-gia̍p poah kòe-.khì.
36:4 Kàu I-su-la-el lâng ê hí-nî, in ê sán-gia̍p chiū ke-thiⁿ tī in só͘ beh sio̍k ê chi-cho̍k ê sán-gia̍p; ánne, in ê sán-gia̍p to̍h-sī tùi goán chó͘-sian chi-cho̍k ê sán-gia̍p poah kòe-.khì. "
36:5 Mô͘-se chiàu Siōng-chú ê ōe bēng-lēng I-su-la-el lâng, kóng, " Iô-sé-huh kiáⁿ-sun ê chi-cho̍k só͘ kóng ê sī tio̍h.
36:6 Kóng tio̍h Che-lo-hu-hat chiahê chabó͘ kiáⁿ, Siōng-chú ánne bēng-lēng, kóng: In thang kè in kah-ì ê lâng, to̍k-to̍k tio̍h kè hō͘ in lāu-pē tâng-chong chi-cho̍k ê lâng.
36:7 Án-ne, I-su-la-el lâng ê sán-gia̍p chiū bô tùi chit chi-cho̍k kui kàu hit chi-cho̍k, in-ūi I-su-la-el lâng tio̍h ta̍k-ê chip-siú in chó͘-sian chi-cho̍k ê sán-gia̍p.
36:8 Kiàn-nā tī I-su-la-el chi-cho̍k tiong tit tio̍h sán-gia̍p ê chabó͘ kiáⁿ, tio̍h chò i ê lāu-pē tâng-chong chi-cho̍k ê lâng ê bó͘, thang hō͘ I-su-la-el lâng ê chi-cho̍k ta̍k-ê chip-siú in ê chó͘-sian ê sán-gia̍p.
36:9 Án-ne, in ê sán-gia̍p chiū bô tùi chit chi-cho̍k kui kàu hit chi-cho̍k, in-ūi I-su-la-el lâng ê chi-cho̍k, beh ta̍k-ê chip-siú in ê sán-gia̍p. "
36:10 Siōng-chú ánne hoan-hù Mô͘-se, Che-lo-hu-hat ê chabó͘ kiáⁿ chiū chiàu ánne khì kiâⁿ.
36:11 In-ūi Che-lo-hu-hat ê chabó͘ kiáⁿ, Mah-la̍h, Til-chah, Hog-lah, Mil-kah, No-ah, lóng kè in ê chek-peh ê kiáⁿ.
36:12 In kè tī Iô-sé-huh ê kiáⁿ, Má-ná-se kiáⁿ-sun hiahê ke; in ê sán-gia̍p chiū iû-goân lâu tī in lāu-pē ê ke ê chi-cho̍k.
36:13 Chiahê sī Siōng-chú tī Mô͘-ap pêng-goân, Iol-tàn hô piⁿ, I-é-lī-kho siâⁿ tùi-bīn, thok Mô͘-se só͘ hoan-hù I-su-la-el lâng ê bēng-lēng kah hoat-tō͘.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。