民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
32:1 Iol-tàn Hô Tang hōaⁿ ê Chi-cho̍k
( SBK 3: 12-22)
Lū-biān ê kiáⁿ-sun kah Ga̍t ê kiáⁿ-sun, in ê chengseⁿ hui-siông chē; in khòaⁿ tio̍h Ia-chel ê tē kah Gi-lia̍t ê tē, sī thang chhī chengseⁿ ê só͘-chāi.
32:2 Ga̍t ê kiáⁿ-sun kah Lū-biān ê kiáⁿ-sun, chiū lâi kìⁿ Mô͘-se kah chè-si Ê-lī-a-chal, í-ki̍p hōe-chiòng ê siú-léng, kā in kóng,
32:3 " A-tāi-lio̍k, Ti-bóng, Ia-chel, Lêng-la̍h, He-si-bóng, E-lé-a-leh, Sī-pan, Ne-bó, Pí-ún,
32:4 to̍h-sī Siōng-chú tī I-su-la-el hōe-chiòng ê bīn-chêng só͘ cheng-ho̍k ê tē, sī thang chhī chengseⁿ ê tē, lí ê lô͘-po̍k mā ū chengseⁿ. "
32:5 Koh kóng, " Goán nā tī lí ê bīn-chêng tit tio̍h un-tián, kiû lí ēng chit-ê tē hō͘ lí ê lô͘-po̍k chò sán-gia̍p, m̄ thang chhōa goán kòe Iol-tàn hô. "
32:6 Mô͘-se tùi Ga̍t ê kiáⁿ-sun kah Lū-biān ê kiáⁿ-sun kóng, " Chóng-bô lín ê hiaⁿ-tī khì cheng-chiàn, lín mā chē tī chia;
32:7 lín ná ē hō͘ I-su-la-el lâng lóe-chì, bô ài ji̍p-khì Siōng-chú só͘ siúⁿ-sù hō͘ in hit-ê tē?
32:8 Góa í-chêng tùi Ka-té-si Bal-né-ah chhe lín ê lāu-pē khì thàm-khòaⁿ hit-ê tē, in mā sī ánne khì chò.
32:9 In-ūi in khì E-si-kol ê soaⁿ-kok khì khòaⁿ hit-ê tē ê sî, ū hō͘ I-su-la-el lâng lóe-chì, bô ài ji̍p-khì Siōng-chú só͘ siúⁿ-sù hō͘ in ê tē.
32:10 Hit ji̍t Siōng-chú hoat-chhut siū-khì, chiū chiùchōa kóng:
32:11 " Kiàn-nā tùi Ai-gi̍p khí-lâi jī-cha̍p hòe í-siōng ê lâng, choa̍t-tùi bē tàng khòaⁿ tio̍h Góa tùi A-bu-la-hàm, Í-sak, Iâ-kop, chiùchōa èng-ín ê tē, in-ūi in bô choan-sim kin-tòe Góa.
32:12 To̍k-to̍k Ki-nî-sé cho̍k, E-hun-neh ê kiáⁿ Ka-le̍p kah Nùn ê kiáⁿ Io-siú-ah thang khòaⁿ-.tio̍h, in-ūi in ū choan-sim tòe Siōng-chú.
32:13 Siōng-chú tùi I-su-la-el lâng siū-khì, hō͘ in tī khòng-iá phiau-liû sì-cha̍p nî, thèng-hāu hit tāi tī Siōng-chú ê bīn-chêng kiâⁿ pháiⁿ ê lâng lóng siau-bia̍t.
32:14 Lí khòaⁿ, lín khí-lâi sòa-chiap lín ê lāu-pē, ke-thiⁿ chōe-jîn ê sò͘-gia̍h, hō͘ Siōng-chú koh khah tùi I-su-la-el siū-khì.
32:15 Lín nā oa̍t tò-tńg bô tòe I, I ē koh kā in pàng-sak tī khòng-iá, lín to̍h-sī bia̍t-bông chiahê chèng lâng.
32:16 In óa-kīn Mô͘-se kóng, " Goán beh tī chia ūi goán ê chengseⁿ chò tiâu, ūi goán ê gín'á khí siâⁿ.
32:17 Chóng-.sī, goán pún-sin beh tòa kun-khì, kiâⁿ tī I-su-la-el lâng ê thâu-chêng, thèng-hāu goán chhōa in kàu in ê só͘-chāi; in-ūi tòa chit-ê tē ê jîn-bîn ê iân-kò͘, to̍k-to̍k goán ê gín'á ē tòa tī kian-kò͘ ê siâⁿ lāi.
32:18 Goán m̄ tńg-khì goán chhù, goán beh thèng-hāu I-su-la-el lâng ta̍k-ê lóng tit tio̍h i ê sán-gia̍p.
32:19 Goán bô beh kah in tī Iol-tàn hô hit pêng koh khì ê tē tit tio̍h sán-gia̍p, in-ūi goán ê sán-gia̍p sī chāi tī Iol-tàn hô tang pêng chit pêng. "
32:20 Mô͘-se tùi in kóng, " Lín nā beh ánne kiâⁿ, tio̍h tī Siōng-chú ê bīn-chêng tòa kun-khì chhut-khì kau-chiàn,
32:21 Lín só͘-ū tòa kun-khì ê lâng, nā tī Siōng-chú ê bīn-chêng kòe Iol-tàn hô, thèng-hāu I tùi I ê bīn-chêng kóaⁿ-chhut I ê tùi-te̍k.
32:22 Hitê tē í-keng hō͘ Siōng-chú khah iâⁿ, jiân-āu lín thang tńg-.lâi; tī Siōng-chú kah I-su-la-el ê bīn-chêng, lín chiū bô chōe, chit-ê tē ē tī Siōng-chú ê bīn-chêng hō͘ lín chò sán-gia̍p.
32:23 Siat-sú lín bô ánne kiâⁿ, to̍h-sī tek-chōe Siōng-chú, lín tio̍h chai lín ê chōe ē kā lín jiok.
32:24 Taⁿ tio̍h kā lín ê gín'á khí siâⁿ, kā lín ê iûⁿ-kûn chò tiâu, chiàu lín ê chhùi só͘ kóng ê khì kiâⁿ. "
32:25 Ga̍t ê kiáⁿ-sun kah Lū-biān ê kiáⁿ-sun tùi Mô͘-se kóng, " Lí ê lô͘-po̍k beh chiàu góa ê chú só͘ hoan-hù ê khì kiâⁿ.
32:26 Goán ê gín'á, goán ê bó͘, goán ê iûⁿ-kûn, goán ê chengseⁿ, lóng beh lâu tī Gi-lia̍t chiahê siâⁿ.
32:27 Chóng-.sī, lí ê lô͘-po̍k, kiàn-nā tòa kun-khì ê lóng ē chiàu góa ê chú só͘ kóng ê ōe, tī Siōng-chú ê bīn-chêng kòe-khì kau-chiàn. "
32:28 Mô͘-se chiū ūi tio̍h in hoan-hù chè-si Ê-lī-a-chal kah Nùn ê kiáⁿ Io-siú-ah, í-ki̍p I-su-la-el chèng chi-cho̍k ê cho̍k-tiúⁿ.
32:29 Mô͘-se tùi in kóng, " Ga̍t ê kiáⁿ-sun kah Lū-biān ê kiáⁿ-sun, in nā kah lín kòe Iol-tàn hô, ta̍k lâng gia̍h ke-si tī Siōng-chú ê bīn-chêng khì kau-chiàn, hit-ê tē hō͘ lín khah iâⁿ, lín chiū tio̍h ēng Gi-lia̍t tē hō͘ in chò sán-gia̍p.
32:30 Siat-sú in m̄ tòa kun-khì kah lín kòe-.khì, in chiū tī Ka-nân tē tùi lín tiong-kan tit tio̍h sán-gia̍p. "
32:31 Ga̍t ê kiáⁿ-sun kah Lū-biān ê kiáⁿ-sun ìn kóng, " Siōng-chú tùi goán só͘ kóng ê, lí ê lô͘-po̍k chiū ánne kiâⁿ.
32:32 Goán ē tòa kun-khì, tī Siōng-chú ê bīn-chêng kòe-khì ji̍p Ka-nân tē, to̍k-to̍k Iol-tàn hô gōa, goán só͘ tit tio̍h chò sán-gia̍p ê tē, iû-goân kui goán. "
32:33 Mô͘-se chiū kā A-mô͘-lī ông Si-hông ê kok kah Ba-siáng ông O͘-k ê kok, hit-ê tē kah i kéng lāi chiahê siâⁿ, to̍h-sī sì-kho͘-ûi chiahê siâⁿ, lóng hō͘ Ga̍t ê kiáⁿ-sun kah Lū-biān ê kiáⁿ-sun, í-ki̍p Iô-sé-huh ê kiáⁿ Má-ná-se ê pòaⁿ chi-cho̍k.
32:34 Ga̍t ê kiáⁿ-sun só͘ khí Ti-bóng, A-tha-lio̍k, A-ló-el,
32:35 A-tha-lio̍k-sok-hoán, Ia-chel, Iok-pí-hap,
32:36 Pek-lêng-la̍h kah Pek-hap-lân, lóng sī kian-kò͘ ê siâⁿ; in koh ū khí iûⁿ-tiâu.
32:37 Lū-biān ê kiáⁿ-sun só͘ khí He-si-bóng, E-lé-a-leh, Ki-lia̍t-tháim,
32:38 Ne-bó, Ba-al-me-óng( í-keng ōaⁿ in ê miâ, ) koh khí Si-bú-mah; in ēng sin ê miâ lâi hō só͘ khí chiahê siâⁿ .
32:39 Má-ná-se ê kiáⁿ Ma-kil, i ê kiáⁿ-sun khì Gi-lia̍t chiàm hit-ê tē, kóaⁿ-chhut hit só͘-chāi ê A-mô͘-lī lâng.
32:40 Mô͘-se kā Gi-lia̍t hō͘ Má-ná-se ê kiáⁿ Ma-kil, i chiū tòa tī hia.
32:41 Má-ná-se ê kiáⁿ Ia-il khì chiàm hiahê chng-thâu, chiū kā i chheng-chò Hap-úi-te̍k-gāi-jíⁿ.
32:42 Lô-pa khì chiàm Ke-na̍t kah Ke-na̍t chiahê chng-thâu, chiū chiàu kakī ê miâ kā i chheng-chò Lô-pa.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。