民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 Chiàn-iâⁿ Ka-nân Lâng
Tòa tī lâm-hong ê Ka-nân lâng, A-la̍t ông thiaⁿ tio̍h I-su-la-el lâng tùi A-tha-lîm hit pêng lâi, chiū kah I-su-la-el lâng kau-chiàn, kā in kúi-nā-ê lâng lia̍h khí-.lâi.
21:2 I-su-la-el lâng tùi Siōng-chú hoat-goān, kóng, " Lí nā chin-chiàⁿ kā chiahê jîn-bîn kau tī góa ê chhiú, góa chiū ē kā in ê siâⁿ choân-pō͘ châu-bia̍t. "
21:3 Siōng-chú thiaⁿ I-su-la-el lâng ê siaⁿ, kā Ka-nân lâng kau-tài in; in chiū kā Ka-nân lâng kah in ê siâⁿ choân-pō͘ siau-bia̍t. Hit só͘-chāi ê miâ chiū kiò-chò Hol-mah.
21:4 Ēng Tâng Chù ê Chôa
In tùi Hol soaⁿ chhut-hoat, tùi Âng-hái ê lō͘ khì, beh se̍h-kòe E-tóm ê tē. Jîn-bîn ūi tio̍h só͘ kiâⁿ ê lō͘, sim put-chí lóe-chì,
21:5 chiū hiâm Siōng-tè kah Mô͘-se kóng, " Lín ná ē chhōa goán chhut Ai-gi̍p, hō͘ goán sí tī chit-ê khòng-iá? In-ūi bô piáⁿ, bô chúi, goán ê sim thó-ià chit-ê bô bī bô sò͘ ê chia̍h-mi̍h. "
21:6 Siōng-chú chiū chhe hóe-chôa ji̍p-khì jîn-bîn ê tiong-kan kā jîn-bîn, I-su-la-el lâng sí chin chē.
21:7 Jîn-bîn lâi-kàu Mô͘-se hia, kóng, " Goán ū hoān chōe, in-ūi goán ū hiâm Siōng-chú kah lí. Chhiáⁿ lí kiû Siōng-chú hō͘ chiahê chôa lī-khui goán. " Mô͘-se chiū thè jîn-bîn kiû Siōng-chú sià-bián.
21:8 Siōng-chú tùi Mô͘-se kóng, " Lí chò chi̍t bóe hóe-chôa, khòa tī kî-koaⁿ ê téng-bīn; kiàn-nā hō͘ i kā tio̍h ê lâng chi̍t ē khòaⁿ, chiū ē oa̍h. "
21:9 Mô͘-se chiū chò chi̍t bóe tâng-chôa, khòa tī kî-koaⁿ téng; kiàn-nā hō͘ chôa kā tio̍h ê lâng, chi̍t-ē khòaⁿ tio̍h chit-ê tâng-chôa, chiū ē oa̍h khí-.lâi.
21:10 Tùi Hol Soaⁿ Kàu Mô͘-ap ê Soaⁿ-kok
I-su-la-el lâng chhut-hoat, chat iâⁿ tī O-po̍k.
21:11 Koh tùi O-po̍k chhut-hoat, chat iâⁿ tī Í-iâ-a-pa-lîm, to̍h-sī ǹg ji̍t chhut ê só͘-chāi kah Mô͘-ap sio-tùi ê khòng-iá.
21:12 Tùi hia chhut-hoat, chat iâⁿ tī Sat-lia̍t ê soaⁿ-kok.
21:13 Tùi-hia chhut-hoat, chat iâⁿ tī Al-nông ê hit pêng, to̍h-sī tī khòng-iá, tùi A-mô͘-lī ê tē-kài chhut-.lâi; in-ūi Al-nông sī Mô͘-ap ê kau-kài, tī Mô͘-ap kah A-mô͘-lī ê tiong-kan.
21:14 Só͘-í, Siōng-chú kau-chiàn ê chheh ū kóng: So͘-hoat ê Oa-hap-pek kah Al-nông hiahê soaⁿ-kok,
21:15 í-ki̍p chiahê soaⁿ-kok ê chúi-chôaⁿ, to̍h-sī ǹg Al tòa ê só͘-chāi, óa-kīn Mô͘-ap ê kéng-kài.
21:16 In tùi hia kàu Boh-ol; che to̍h-sī Siōng-chú bat tùi Mô͘-se só͘ kóng-khí ê chéⁿ, kóng, " Lí chū-chi̍p jîn-bîn, Góa beh ēng chúi hō͘ in lim. "
21:17 Hit sî, I-su-la-el lâng chhiùⁿ koa, kóng: Chéⁿ ah, chhèng chhut-.lâi! Lín tio̍h tùi i chhiùⁿ koa.
21:18 Chit kháu chéⁿ sī siú-léng khui ê, jîn-bîn chun-kùi ê lâng, ēng koân-pèng, ēng in ê koái-á ku̍t ê. In tùi khòng-iá khì Má-tha-ná,
21:19 tùi Má-tha-ná kàu Ná-ha̍p-lia̍t, tùi Ná-ha̍p-lia̍t kàu Pa-boa̍t;
21:20 tùi Pa-boat kàu Mô͘-ap tē ê soaⁿ-kok, kàu hit-ê khòaⁿ lo̍h-.khì, ē khòaⁿ tio̍h khòng-iá ê Pi-su-gah ê soaⁿ téng.
21:21 Chiàn-iâⁿ A-mô͘-lī Ông kah Ba-siáng Ông
I-su-la-el lâng chhe sù-chiá khì kìⁿ A-mô͘-lī lâng ê ông Si-hông, kóng,
21:22 " Kiû lí iông-ín góa tùi lí ê tē keng-kòe, goán bô phian tī chhân-hn̂g kah phû-tô hn̂g; goán mā bô beh lim chéⁿ-.ni̍h ê chúi, to̍k-to̍k kiâⁿ tōa lō͘, ti̍t-ti̍t keng-kòe lí ê tē-kài. "
21:23 Si-hông m̄-chún I-su-la-el lâng keng-kòe i ê kéng-kài, i chiū chū-chi̍p i ê kûn-chiòng chhut-lâi-kàu khòng-iá, beh tí-te̍k I-su-la-el lâng, lâi-kàu Ia-hat kah I-su-la-el lâng kau-chiàn.
21:24 I-su-la-el lâng ēng to kā i thâi, chiàm i ê tē, tùi Al-nông kàu Iá-bo̍k, ti̍t-ti̍t kàu Am-móng lâng hia, in-ūi Am-móng lâng ê tē-kài chin kian-kò͘.
21:25 I-su-la-el lâng kā i cheng-ho̍k só͘-ū ê siâⁿ, I-su-la-el lâng mā tòa A-mô͘-lī ê siâⁿ, tī He-si-bóng kah i só͘-ū ê siâⁿ.
21:26 Chit-ê He-si-bóng sī A-mô͘-lī ông Si-hông ê siâⁿ, i bat kah Mô͘-ap chêng ê ông kau-chiàn, tùi i ê chhiú chhiúⁿ choân tē, it-ti̍t kàu Al-nông.
21:27 Só͘-í, chò si ê lâng liām, kóng: Lín tio̍h lâi He-si-bóng, goān Si-hông ê siâⁿ tit tio̍h khí-chō, koh kian-kò͘.
21:28 In-ūi ū hóe tùi He-si-bóng chhut, ū hóe-iām tùi Si-hông ê siâⁿ hoat, sio-húi Mô͘-ap ê Al kah Al-nông koân-tē ê chú.
21:29 Mô͘-ap, lí ū chai-hō! Ke-mô͘-sih ê jîn-bîn, lín bia̍t-bông ā! Hō͘ i ê chapo͘ teng chò tô-cháu ê, chabó͘ kiáⁿ chò siū lia̍h ê, kau hō͘ A-mô͘-lī ông Si-hông.
21:30 Goán kā in siā, He-si-bóng kàu Ti-bóng choân-pō͘ húi-bia̍t, goán hō͘ tē pha-hng, it-ti̍t kàu Lô-hoat, to̍h-sī kàu Me-tí-ba.
21:31 Án-ne, I-su-la-el lâng chiū tòa tī A-mô͘-lī lâng ê tē.
21:32 Mô͘-se chhe lâng khì thàm-khòaⁿ Ia-chel, chiū chhú in hiahê chng-thâu, kā tòa hia ê A-mô͘-lī lâng kóaⁿ chhut-.khì.
21:33 I-su-la-el oat tùi Ba-siáng ê lō͘ khì, Ba-siáng ông O͘-k kah i ê kûn-chiòng lóng chhut-lâi kā in tí-te̍k, tī E-tu-lé kah in kau-chiàn.
21:34 Siōng-chú tùi Mô͘-se kóng, " M̄-bián kiaⁿ in, in-ūi Góa í-keng kā i kah i ê kûn-chiòng, í-ki̍p i ê tē lóng kau tī lí ê chhiú; lí tio̍h kā i khoán-thāi kah lí bat khoán-thāi tòa tī He-si-bóng ê A-mô͘-lī ông Si-hông sio-siâng. "
21:35 In chiū kā i kah i hiahê kiáⁿ, í-ki̍p i ê jîn-bîn phah, bô kā i lâu kah chi̍t-ê, chiū tit tio̍h i ê tē.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。