民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
19:1 Âng Gû-bó ê Hu
Siōng-chú hoan-hù Mô͘-se kah A-lông kóng,
19:2 Siōng-chú só͘ bēng-lēng lu̍t-hoat ê tiâu-lē sī ánne kóng: Lí tio̍h hoan-hù I-su-la-el lâng ēng chi̍t chiah sûn-choân bô khoat-tiám, m̄ bat kòa taⁿ, chhiah-sek ê gû-bó, khan lâi-kàu lí chia.
19:3 Lí tio̍h kā i kau hō͘ chè-si Ê-lī-a-chal, thang tòa chhut-khì iâⁿ gōa; lâng chiū tī i ê bīn-chêng thâi hit chiah gû.
19:4 Chè-si Ê-lī-a-chal tio̍h ēng chéng-thâu-á the̍h i ê hoeh tām-po̍h, ǹg hōe-bō͘ chêng hiù hoeh chhit pái.
19:5 Tio̍h ū chi̍t-ê lâng tī chè-si ê ba̍k-chiu chêng, sio bó ê gû-á, to̍h-sī sio i ê phôe, i ê bah, i ê hoeh, i ê sái.
19:6 Chè-si tio̍h kā pek-hiuⁿ chhâ, gû-chhek-chháu kah chu-âng sek mî, lóng hiat tī sio gû ê hóe tiong.
19:7 Chè-si tio̍h sé i ê saⁿ, ēng chúi sé seng-khu, jiân-āu ji̍p-khì iâⁿ lāi; chè-si ē bô chheng-khì-kàu ê-hng.
19:8 Sio gû-á ê lâng tio̍h ēng chúi sé i ê saⁿ, ēng chúi sé seng-khu, ē bô chheng-khì-kàu ê-hng.
19:9 Tio̍h ū chi̍t-ê chheng-khì ê lâng siu-khioh gû-bó ê hu, hē tī iâⁿ gōa chheng-khì ê só͘-chāi, lâu-.leh thang kah lâu-chúi hūn-ha̍p, lâi chò I-su-la-el hōe-chiòng tû-khì lahsap ê chúi; che mā sī teh tû-khì chōe.
19:10 Siu-khioh gû-bó ê hu ê lâng tio̍h sé i ê saⁿ, ē bô chheng-khì-kàu ê-hng; che beh hō͘ I-su-la-el lâng kah kià-kha tī in tiong-kan ê chhut-gōa lâng chò éng-oán ê lē. "
19:11 Bong tio̍h Si-thé
" Bong tio̍h lâng ê sin-si ê, chiū ē chhit ji̍t bô chheng-khì.
19:12 Hitê lâng kàu tē-saⁿ ji̍t, tio̍h ēng hit-ê chúi chheng-khì pún-sin; kàu tē-chhit ji̍t chiah chheng-khì; i nā tī tē-saⁿ ji̍t bô chheng-khì pún-sin, kàu tē-chhit ji̍t chiū bô chheng-khì.
19:13 Kiàn-nā bong tio̍h lâng ê sin-si, bô chheng-khì kakī ê, chiū òe lahsap Siōng-chú ê hōe-bō͘, chit-ê lâng tio̍h tùi I-su-la-el tiong chián-tû; in-ūi tû-khì lahsap ê chúi bô hiù tī i ê seng-khu, i chiū bô chheng-khì, i ê bô chheng-khì iáu koh tī i ê sin chiūⁿ.
19:14 " Lâng sí tī pò͘-pêⁿ lāi, hit-ê tiâu-lē sī ánne, kiàn-nā ji̍p-khì hit-ê pò͘-pêⁿ kah it-chhè tī pò͘-pêⁿ lāi ê, lóng tio̍h bô chheng-khì chhit ji̍t.
19:15 Kiàn-nā hian-khui ê khì-kū, to̍h-sī kòa bô khàm ba̍t ê, mā sī bô chheng-khì.
19:16 Bô-lūn siáⁿ lâng tī chhân-iá bong tio̍h hō͘ to thâi-sí ê, á-.sī sin-si, á-.sī lâng ê kut-thâu, á-.sī hûn-bōng, chiū ē chhit ji̍t bô chheng-khì.
19:17 " Tio̍h ūi tio̍h chit-ê bô chheng-khì ê lâng, the̍h tām-po̍h só͘ sio tû-khì chōe ê hóe-hu, hē tī khì-kū lāi, tò oa̍h-chúi tī hit téng-bīn.
19:18 Tio̍h ū chi̍t-ê chheng-khì ê lâng the̍h gû-chhek-chháu ùn chit-ê chúi, kā chúi hiù tī pò͘-pêⁿ kah só͘-ū ê khì-kū, í-ki̍p hit lāi-bīn ê lâng, koh hiù bong tio̍h kut-thâu ê, á-.sī bong tio̍h siū sat-hāi ê, á-.sī bong tio̍h si-thé ê, á-.sī bong tio̍h hûn-bōng ê lâng.
19:19 Tē-saⁿ ji̍t kah tē-chhit ji̍t, chheng-khì ê tio̍h kā hit-ê bô chheng-khì ê hiù chúi, kàu tē-chhit ji̍t thang hō͘ i chheng-khì; hit-ê lâng tio̍h sé saⁿ, ēng chúi sé seng-khu; kàu ê-hng chiah chheng-khì.
19:20 " Chóng-.sī, hit-ê bô chheng-khì ê lâng mā bô chheng-khì kakī ê, tio̍h tùi hōe tiong kā i chián-tû; in-ūi i òe lahsap Siōng-chú ê sèng-só͘. Tû-khì lahsap ê chúi nā bô hiù tī i ê seng-khu, i chiū sī bô chheng-khì ê lâng.
19:21 Che beh kā in chò éng-oán ê lē, koh hit-ê kā lâng hiù tû-khì lahsap ê chúi, hit-ê lâng tio̍h sé i ê saⁿ; kiàn-nā bong hit-ê tû-khì lahsap ê chúi ê, it-tēng bô chheng-khì-kàu ê-hng.
19:22 Kiàn-nā bô chheng-khì ê lâng só͘ bong tio̍h ê, chiū bô chheng-khì; bong tio̍h i ê, it-tēng bô chheng-khì-kàu ê-hng. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。