民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
12:1 Mi-lí-ám Hông Chhú-hoa̍t
Mi-lí-ám kah A-lông hiâm Mô͘-se, ūi tio̍h i só͘ chhōa Kú-si̍t ê chabó͘ kiáⁿ, in-ūi Mô͘-se bat chhōa Kú-si̍t lâng ê chabó͘ kiáⁿ chò bó͘.
12:2 In kóng, " Siōng-chú kám kantaⁿ kah Mô͘-se kóng-ōe? Kám mā bô kah goán kóng-ōe? " Chit-ê ōe Siōng-chú ū thiaⁿ-.tio̍h.
12:3 Hitê Mô͘-se chò lâng hui-siông un-jiû, iâⁿ-kòe sè-chiūⁿ ê chèng lâng.
12:4 Siōng-chú hut-jiân tùi Mô͘-se, A-lông kah Mi-lí-ám kóng, " Lín saⁿ lâng chhut-lâi hōe-bō͘ chia. " In saⁿ lâng chiū chhut-.lâi.
12:5 Siōng-chú tī hûn-thiāu tiong kàng-lîm, khiā tī pò͘-pêⁿ mn̂g-kháu, tiàu A-lông kah Mi-lí-ám, in nn̄g lâng chiū chhut-.lâi.
12:6 Siōng-chú kóng, " Τio̍h thiaⁿ Góa ê ōe, lín tiong-kan nā ū sian-ti, Góa — Siōng-chú ē ēng ī-siōng hō͘ in bat Góa, tī bîn-bāng tiong kah in kóng-ōe.
12:7 " Góa ê lô͘-po̍k Mô͘-se m̄-sī ánne; i chīn-tiong tī Góa ê choân ke.
12:8 " Góa beh bīn tùi bīn kah i kóng-ōe, to̍h-sī bêng-bêng kóng, bô ēng chhai-gí, i koh ē khòaⁿ tio̍h Siōng-chú ê hêng-siōng. Lín hiâm Góa ê lô͘-po̍k Mô͘-se, án-chóaⁿ bô teh kiaⁿ? "
12:9 Siōng-chú tùi in siū-khì, chiū lī-khui.
12:10 Hûn tùi pò͘-pêⁿ téng sóa-khui, lí khòaⁿ, Mi-lí-ám thái-ko chhin-chhiūⁿ seh. A-lông khòaⁿ Mi-lí-ám, lí khòaⁿ, i sī thái-ko.
12:11 A-lông tùi Mô͘-se kóng, " Góa ê chú, kiû lí m̄ thang in-ūi goán ê gû-gōng hoān chōe, koh kā chit-ê chōe kui tī goán.
12:12 Kiû lí m̄ thang hō͘ i chhin-chhiūⁿ tú tùi lāu-bú ê pak-tó͘ chhut-.lâi, bah to̍h í-keng nōa chi̍t-pòaⁿ ê thai. "
12:13 Mô͘-se chiū ai-kiû Siōng-chú kóng, " Siōng-tè ah, kiû Lí kā i i hó! "
12:14 Siōng-chú tùi Mô͘-se kóng, " Siat-sú i ê lāu-pē tī i ê bīn phùi nōa, i kám bô kiàn-siàu chhit kang? Taⁿ tio̍h kā i koaiⁿ tī iâⁿ gōa chhit kang, jiân-āu chiah thang chhōa i ji̍p-.lâi. "
12:15 Chiū ánne, koaiⁿ Mi-lí-ám tī iâⁿ gōa chhit kang; jîn-bîn bô chhut-hoat, thèng-hāu Mi-lí-ám koh ji̍p-.lâi.
12:16 Āu-lâi, jîn-bîn tùi Ha-che-lot chhut-hoat, tī Pa-lân ê khòng-iá chat iâⁿ.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。