圣经阅读

查字典本章地图影像 [ 条列 | 表格 | 整段 ] 繁简语态度量衡其他阅读计画

新版查询或移至：说明

民数记线上收听:中文和合本现代中文译本修订版现代台语台语圣经客语福州话希伯来文读经下载档案关于语音圣经

11:1

Kiò-chò Tha-bé-la̍h ê Só͘-chāi

Jîn-bîn nga̍uh-nga̍uh-liām, in ê pháiⁿ ōe lâi-kàu Siōng-chú ê hīⁿ-khang, Siōng-chú thiaⁿ-.tio̍h chiū tōa siū-khì. Siōng-chú ê hóe tī in tiong-kan to̍h khí-.lâi, sio kàu iâⁿ ê piⁿ-kak.
11:2 Jîn-bîn tùi Mô͘-se ai-kiû, Mô͘-se chiū kî-kiû Siōng-chú, hit-ê hóe chiū sit.
11:3 Hit só͘-chāi chiū kiò-chò " Tha-bé-la̍h ", in-ūi Siōng-chú ê hóe sio tī in tiong-kan.
11:4

Mô͘-se Thiau-soán Chhit-cha̍p-ê Tiúⁿ-ló

In tiong-kan cha̍p-sek lâng tōa-tōa heng-khí tham-io̍k ê sim, I-su-la-el lâng koh thî-khàu kóng, " Siáⁿ lâng hō͘ goán ē-tàng ū bah thang chia̍h?
11:5 Goán ē kì-tit tī Ai-gi̍p ê sî, chia̍h hî bián chîⁿ, mā ē kì-tit ū n̂g-koe, si-koe, kú-chhài, chhang-á kah soàn-á.
11:6 Taⁿ goán ê cheng-le̍k ta-.khì, bô pòaⁿ-hāng mi̍h-kiāⁿ; tû-liáu má-ná í-gōa, tī goán ê ba̍k-chiu chêng ê bô pa̍t hāng mi̍h-kiāⁿ.
11:7 （Chit-ê má-ná chhin-chhiūⁿ oân-sui-jîn, chhin-chhiūⁿ chin-chu ê khoán-sit.
11:8 Jîn-bîn sì-kè kiâⁿ lâi khioh má-ná, ū ê ēng chio̍h-bō lâi bôa, ū ê ēng khū lâi cheng, tī tiáⁿ-.ni̍h piak chò piáⁿ, chu-bī chhin-chhiūⁿ tiâu-hô iû ê chia̍h-mi̍h.
11:9 Àm-sî lō͘-chúi lo̍h tī iâⁿ tiong, má-ná mā tòe teh lo̍h. ）
11:10 Mô͘-se thiaⁿ tio̍h jîn-bîn tāi-ke tī kakī ê pò͘-pêⁿ mn̂g-kháu teh thî-khàu, Siōng-chú tōa siū-khì, Mô͘-se mā bô hoaⁿ-hí.
11:11 Mô͘-se tùi Siōng-chú kóng, " Lí ná ē pháiⁿ khoán-thāi Lí ê lô͘-po̍k? Góa án-chóaⁿ bô tī Lí ê bīn-chêng tit tio̍h un-tián? Lí kèng-jiân ēng chiahê jîn-bîn ê ka-taⁿ hē tī góa ê sin chiūⁿ!
11:12 Chiahê jîn-bîn kám sī góa hoâi-īn ê? Kiám sī góa seⁿ ê? Lí kèng-jiân tùi góa kóng, ' Kā in phō tī heng chêng, chhin-chhiūⁿ iúⁿ-chhī gín'á ê lāu-pē teh phō chia̍h leng ê eⁿ-á, kàu tī Lí chiùchōa siúⁿ-sù hō͘ in ê chó͘-sian ê tē? '
11:13 Góa beh tùi tó-ūi tit tio̍h bah hō͘ chiahê jîn-bîn chia̍h? In-ūi in lóng tùi góa thî-khàu kóng, ' Lí tio̍h the̍h bah hō͘ goán, hō͘ goán thang chia̍h! '
11:14 Chiahê jîn-bîn ê ka-taⁿ siuⁿ tāng, góa kakī tam-tng bē khí.
11:15 Lí nā ánne khoán-thāi góa, góa nā tī Lí ê bīn-chêng tit tio̍h un-tián, kiû Lí sûi-sî kā góa thâi-sí, bián-tit hō͘ góa khòaⁿ tio̍h pún-sin ê khó͘-chêng. "
11:16 Siōng-chú tùi Mô͘-se kóng, " Lí tio̍h chū-chi̍p I-su-la-el ê tiúⁿ-ló chhit-cha̍p lâng lâi Góa chia, to̍h-sī lí só͘ chai chò jîn-bîn ê tiúⁿ-ló kah koaⁿ-tiúⁿ ê, chhōa in kàu hōe-bō͘ lâi, hō͘ in kah lí khiā tī hia.
11:17 Góa beh kàng-lîm tī hia kah lí kóng-ōe, mā beh kā kàng-lo̍h tī lí téng-bīn ê lêng mā kàng-lo̍h tī in tiong-kan, in chiū ē kah lí chò-hóe tam-tng jîn-bîn ê ka-taⁿ, bián-tit lí kakī chi̍t-ê lâng tam-tng.
11:18 Lí mā tio̍h kā jîn-bîn kóng, ' Lín tio̍h hō͘ kakī chò sèng, chún-pī bîn-á-chài thang chia̍h bah, in-ūi lín ū thî-khàu hō͘ Siōng-chú thiaⁿ tio̍h lín kóng, siáⁿ lâng hō͘ goán chia̍h bah? In-ūi goán tī Ai-gi̍p chin hó. Só͘-í, Siōng-chú beh hō͘ lín bah, hō͘ lín thang chia̍h.
11:19 Lín m̄-sī chia̍h chi̍t kang, nn̄g kang, gō͘ kang, cha̍p kang, jī-cha̍p kang,
11:20 lín ē chia̍h kàu chi̍t goe̍h-ji̍t móa, kàu bah tùi lín ê phīⁿ-khang chhut-.lâi, hō͘ lín thó-ià, in-ūi lín khì-sak tiàm tī lín tiong-kan ê Siōng-chú, tī I ê bīn-chêng thî-khàu kóng, goán ná ē chhut Ai-gi̍p? '"
11:21 Mô͘-se kóng, " Chiahê kah góa tòa ê jîn-bîn, kiâⁿ lō͘ ê tōa-lâng ū la̍k-cha̍p bān, Lí mā ū kóng, ' Góa beh hō͘ in chia̍h bah, hō͘ in thang chia̍h kàu chi̍t goe̍h-ji̍t móa. '
11:22 Lí kám ē ūi in thâi iûⁿ-kûn, gû-kûn, hō͘ in chia̍h kàu-gia̍h? Á-sī ūi tio̍h in chū-chi̍p hái lāi só͘-ū ê hî, hō͘ in chia̍h kàu-gia̍h? "
11:23 Siōng-chú tùi Mô͘-se kóng, " Siōng-chú ê chhiú kám sī té? Taⁿ lí ē khòaⁿ tio̍h Góa ê ōe ū tùi lí èng-giām á-bô. "
11:24 Mô͘-se chhut-khì kā Siōng-chú ê ōe tùi jîn-bîn kóng, mā chio-chi̍p jîn-bîn ê tiúⁿ-ló chhit-cha̍p lâng, hō͘ in khiā tī pò͘-pêⁿ ê sì-kho͘-ûi.
11:25 Siōng-chú tī hûn tiong kàng-lîm, tùi Mô͘-se kóng-ōe, kā kàng-lo̍h tī i téng-bīn ê Sèng Sîn, mā kàng-lo̍h tī chhit-cha̍p-ê tiúⁿ-ló tiong-kan; Sèng Sîn lîm-kàu in ê sî, in chiū kóng sian-ti ê ōe, í-āu chiū bô koh kóng.
11:26 Chóng-.sī, ū nn̄g-ê lâng iû-goân tī iâⁿ lāi, chi̍t-ê miâ kiò-chò I-lī-ta̍t, chi̍t-ê miâ kiò-chò Bí-ta̍t, in mā ū kì miâ chāi-lāi, m̄ koh, bô kàu pò͘-pêⁿ hia; Sèng Sîn lîm-kàu in, in chiū tī iâⁿ lāi kóng sian-ti ê ōe.
11:27 Ū chi̍t-ê siàu-liân lâng cháu-lâi kā Mô͘-se kóng, " I-lī-ta̍t kah Bí-ta̍t tī iâⁿ lāi teh kóng sian-ti ê ōe. "
11:28 Kin-tòe Mô͘-se ê Nùn ê kiáⁿ Io-siú-ah, to̍h-sī siū kéng-soán ê chi̍t-ê lâng kóng, " Chhiáⁿ góa ê chú Mô͘-se kā in kìm-chí. "
11:29 Mô͘-se tùi i kóng, " Lí kám sī ūi tio̍h góa ê iân-kò͘ teh chi̍t-tò͘? Goān Siōng-chú ê chú-bîn lóng chò sian-ti, Siōng-chú kā I ê Sèng Sîn kàng-lo̍h tī in ê téng-bīn. "
11:30 Mô͘-se kah I-su-la-el ê tiúⁿ-ló chiū tńg-khì iâⁿ lāi.
11:31

Siōng-chú Kàng Ian-chhun

Ū hong tùi Siōng-chú chhut-.lâi, kā ian-chhun tùi hái-.ni̍h chhoe-.lâi, lo̍h tī iâⁿ piⁿ, chit pêng chha-put-to chi̍t ji̍t ê lō͘-thêng, hit pêng chha-put-to chi̍t ji̍t ê lō͘-thêng, tī iâⁿ ê sì-kho͘-ûi sì-kè lóng sī, lī tē chha-put-to ū nn̄g tiú.
11:32 Jîn-bîn khí-.lâi, kui ji̍t kui mê kah keh tńg kang ê kui ji̍t, lia̍h ian-chhun, siōng-chió ê mā lia̍h cha̍p ho-mel, ūi kakī pâi-lia̍t tī iâⁿ ê sì-kho͘-ûi.
11:33 Bah tī in ê chhùi-khí, iáu chia̍h bōe liáu, Siōng-chú chiū tùi jîn-bîn siū-khì, Siōng-chú kàng tōa chai-hō lâi phah jîn-bîn.
11:34 Hitê só͘-chāi hō-miâ kiò-chò Ki-bú-lo̍t-hat-ta-bah, in-ūi tī hia ū bâi-chòng tham-io̍k ê jîn-bîn.
11:35 Jîn-bîn tùi Ki-bú-lo̍t-hat-ta-bah kiâⁿ kàu Ha-che-lot, chiū tī Ha-che-lot tòa lo̍h-.lâi.

查询或移至：说明

[ 条列 | 表格 | 整段 ] 繁简语态重新查询影像本章地图度量衡其他

中文:和合本和合本2010现代中文译本1995版现代中文译本2019版新译本恢复本思高译本吕振中译本NET圣经中译本深文理和合本官话和合本北京官话译本文理和合本神天圣书文理委办译本施约瑟浅文理译本马殊曼译本四人小组译本高连茨基圣咏经郭实腊新遗诏书和旧遗诏圣书太平天国文理译本原文直译(参考用)
英文:ESVKJVBBEWEBASVDarbyERV
原文与古译本:旧约马索拉原文七十士译本
台客语:现代台语2021版汉字现代台语2021版全罗圣经公会巴克礼台汉本巴克礼全罗巴克礼汉罗圣经公会现代客语全罗圣经公会现代客语汉字全民台语圣经全罗全民台语圣经汉罗全民台语圣经Ruby
其他:圣经公会布农语圣经圣经公会泰雅尔语圣经圣经公会鲁凯语圣经赛德克族Tgdaya语圣经公会阿美语1997圣经公会太鲁阁语圣经印尼圣经越南圣经俄文圣经韩文圣经日语圣经藏语圣经武加大译本新武加大译本

各圣经译本着作权如版权说明。

本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。

信望爱站使用cookies 技术来强化网站功能，您使用本网站，表示您同意我们使用 cookies 技术.