创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
13:1 A-bú-lâm kah Ló-toh Hun-chhiú
A-bú-lâm tùi Ai-gi̍p chiūⁿ-.khì, i kah i ê bó͘, í-ki̍p i só͘-ū ê, liân Ló-toh lóng khì Ka-nân ê lâm-pō͘.
13:2 A-bú-lâm ê gû, gîn, kim chin chē.
13:3 I tùi Lâm-tē chiām-chiām sóa khì Be-thel, kàu tī Be-thel kah Ai siâⁿ ê tiong-kan, in chá-chêng tah pò͘-pêⁿ ê só͘-chāi,
13:4 Mā-sī i khí-thâu khí tôaⁿ ê só͘-chāi; A-bú-lâm tī hia kiû-kiò Siōng-chú ê miâ.
13:5 Kah A-bú-lâm tâng kiâⁿ ê Ló-toh mā ū iûⁿ-kûn, gû-kûn, pò͘-pêⁿ.
13:6 Hitê tē chiū bē iông-ín tit in chò-hóe tòa; in-ūi in ê châi-bu̍t chē, in chiah bē tàng chò-hóe tòa.
13:7 A-bú-lâm ê bo̍k-chiá kah Ló-toh ê bo̍k-chiá sio-cheⁿ. Hit tong-sî, Ka-nân lâng kah Pe-lí-ji lâng tòa tī hit-ê tē-khu.
13:8 A-bú-lâm kā Ló-toh kóng, " Lí góa m̄ thang oan-ke, lí ê bo̍k-chiá kah góa ê bo̍k-chiá mā m̄ thang oan-ke, in-ūi lán sī kut-jio̍k chì-chhin.
13:9 Choân tē kám bô tī lí ê ba̍k-chiu chêng? Chhiáⁿ lí lī-khui góa; lí nā kiâⁿ tò pêng, góa chiū khì chiàⁿ pêng; á-.sī lí nā kiâⁿ chiàⁿ pêng, góa chiū khì tò pêng.
13:10 Ló-toh gia̍h thâu khòaⁿ Iol-tàn hô kui-phiàn ê pêng-goân, it-ti̍t kàu Cho-al ê lō͘ lóng chin chu-jūn; hit-ê tē tī Siōng-chú iáu-bōe bia̍t So͘-tóm kah Am-mo͘-la̍h í-chêng, chhin-chhiūⁿ Siōng-chú ê hn̂g, mā chhin-chhiūⁿ Ai-gi̍p ê tē.
13:11 Chiū ánne, Ló-toh kéng Iol-tàn hô kui-phiàn ê pêng-goân, chhian-sóa khì tang pêng; in chiū hō͘-siong hun-khui.
13:12 A-bú-lâm tòa Ka-nân tē, Ló-toh tòa pêng-goân chiahê siâⁿ, sóa i ê pò͘-pêⁿ kàu So͘-tóm.
13:13 So͘-tóm lâng ke̍k pháiⁿ, tōa-tōa tek-chōe Siōng-chú.
13:14 A-bú-lâm Sóa-kàu He-bú-lông
Ló-toh lī-pia̍t liáu-āu, Siōng-chú tùi A-bú-lâm kóng, " Lí gia̍h thâu, tùi lí só͘ tiàm ê só͘-chāi, ǹg tang, sai, lâm, pak lâi khòaⁿ,
13:15 In-ūi lí só͘ khòaⁿ tio̍h it-chhè ê tē, Góa lóng beh hō͘ lí kah lí ê kiáⁿ-sun, it-ti̍t kàu éng-oán.
13:16 Góa mā beh hō͘ lí ê kiáⁿ-sun chhin-chhiūⁿ tē-chiūⁿ ê thô͘-soa hiah chē, lâng nā ē-tàng sǹg tē-chiūⁿ ê thô͘-soa, chiah ē-tàng sǹg lí ê kiáⁿ-sun.
13:17 Lí khí-lâi piàn kiâⁿ chit-ê tē ê hoâiⁿ-ti̍t, in-ūi Góa beh kā chit-ê tē hō͘ lí. "
13:18 A-bú-lâm chiū poaⁿ-sóa pò͘-pêⁿ lâi-kàu He-bú-lông, óa Mam-lē hiahê siōng chhiū tòa; i tī hia ūi Siōng-chú khí chi̍t chō tôaⁿ.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。