启示录 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
18:1 Ba-bú-lông ê Bia̍t-bông
Jiân-āu góa khòaⁿ tio̍h lēng-gōa chi̍t-ê thiⁿ-sài tùi thiⁿ lo̍h-.lâi. I ū tōa koân-pèng, i ê êng-kng kā choân tē chiò-kng.
18:2 I tōa-siaⁿ hoah, " Tó lo̍h-khì lò͘! Tōa Ba-bú-lông tó lo̍h-khì à! Taⁿ chit-ê siâⁿ chiâⁿ-chò kúi teh tòa ê só͘-chāi, it-chhè ù-òe siâ-sîn ê kaⁿ-lô, í-ki̍p só͘ ū bô chheng-khì koh khó-ò͘ⁿ ê chiáu-lūi ê chiáu-siū.
18:3 In-ūi bān-pang lóng ū lim tio̍h chit-ê îm-hū îm-loān ê chiú lâi jiá-khí Siōng-tè ê siū-khì, tē-chiūⁿ ê kun-ông lóng bat kah i kiâⁿ kan-îm, tē-chiūⁿ chiahê senglí lâng lóng ū tùi i ê chhia-hoa hòng-tōng lâi hoat-châi. "
18:4 Góa koh thiaⁿ tio̍h lēng-gōa chi̍t-ê siaⁿ tùi thiⁿ-téng hoat-chhut, kóng, " Góa ê chú-bîn, tio̍h tùi îm-hū hia chhut-.lâi, chiah bián bak tio̍h i ê chōe, mā bián kah i chò-hóe siū chai-hō.
18:5 In-ūi i ê chōe í-keng lúi-chek tú thiⁿ, Siōng-tè ē kì-tit i ê siâ ok-hêng ūi.
18:6 Tio̍h chiàu i khoán-thāi lán ê thài-tō͘ lâi kā i khoán-thāi, chiàu i só͘ chò ê ka-pē kā i pò-èng. Ēng i tiâu-chiú ê poe, tiâu ka-pōe kiông ê chiú hō͘ i.
18:7 I bat án-chóaⁿ êng-kng kakī lâi chhia-hoa, tio̍h chiàu ánne hō͘ i kan-khó͘ pi-ai. In-ūi i sim-lāi kakī kóng, góa chò lú-ông chē tī ông-ūi, góa pēng m̄-sī kóaⁿ-hū, góa choa̍t-tùi bē tú tio̍h pi-siong ê tāichì.
18:8 Só͘-í, tī chi̍t ji̍t ê tiong-kan, i ê chai-hō ē lóng kàu, ū sí-bông, pi-ai, ki-hng. I mā ē hō͘ hóe sio bia̍t, in-ūi sím-phòaⁿ i ê Chú — Siōng-tè ū tōa khùi-la̍t. "
18:9 Tē chiūⁿ hiahê kah i kiâⁿ kan-îm koh kòe chhia-hoa seng-oa̍h ê kun-ông khòaⁿ tio̍h siâⁿ teh hóe sio ê ian, ē ūi tio̍h siâⁿ pi-siong thî-khàu.
18:10 In kiaⁿ khòaⁿ tio̍h Ba-bú-lông só͘ siū ê kan-khó͘, chiū khiā hn̄g-hn̄g, kóng, " Chhám ah! Chit-ê tōa siâⁿ Ba-bú-lông, chhám ah! Kian-kò͘ ê siâⁿ, chhám ah! In-ūi koh chi̍t-sî-á kú, lí chiū ē siū sím-phòaⁿ! "
18:11 Tē chiūⁿ hiahê senglí lâng, mā ūi tio̍h i pi-siong thî-khàu, in-ūi bô lâng koh bé in ê hòe,
18:12 Chiū-sī kim, gîn, pó-chio̍h, chin-chu, iù-môa-pò͘, si-tiû, chí-sek kah chu-âng sek ê ko-kùi pò͘-liāu, í-ki̍p ta̍k-khoán ê hiuⁿ-chhâ, ta̍k-khoán ê chhiūⁿ-gê chè-phín, ta̍k-khoán kùi-khì ê chhâ, tâng, thih kah pe̍h-chio̍h ê khì-kū,
18:13 Mā ū jio̍k-kùi, tāu-khò͘, phang-liāu, phang-iû, jú-hiuⁿ, chiú, iû, iù-mī, be̍h, gû, iûⁿ, bé, chhia, lô͘-po̍k, í-ki̍p sīm-chì lâng ê lêng-hûn.
18:14 Hiahê senglí lâng tùi i kóng, " Lí ê sim só͘ ì-ài ê hiahê hó mi̍h lóng bô-.khì à; lí it-chhè ê êng-hôa hù-kùi lóng siau-sit-.khì, éng-oán bē tàng koh khòaⁿ tio̍h à. "
18:15 Khò chit-ê siâⁿ chò senglí hoat-châi ê lâng, in-ūi chin kiaⁿ khòaⁿ tio̍h chit-ê siâⁿ só͘ siū ê kan-khó͘, só͘-í, lóng khiā hn̄g-hn̄g teh pi-siong thî-khàu,
18:16 Kóng, " Chhám à! Chhám à! Chit-ê tōa siâⁿ, pêng-sî chhēng iù-môa-pò͘, chí-sek kah chu-âng sek ê saⁿ, kui seng-khu chng kah lóng sī kim, pó-chio̍h kah chin-chu. "
18:17 Bô chi̍t-sî-á kú, hiahê châi-hù to̍h lóng bô-.khì à. Só͘-ū ê chûn-tiúⁿ, lú-kheh kah chúi-siú í-ki̍p só͘-ū khò-hái seng-oa̍h ê lâng lóng khiā hn̄g-hn̄g teh khòaⁿ.
18:18 In khòaⁿ tio̍h chit-ê siâⁿ teh hóe sio ê ian, chiū tōa-siaⁿ hoah, " Ū tó chi̍t-ê siâⁿ chhin-chhiūⁿ chit-ê tōa siâⁿ? "
18:19 In tī kakī ê thâu-khak téng sám thô͘-soa hún, pi-siong thî-khàu, tōa-siaⁿ hoah, " Chhám à! Chhám à! Chit-ê tōa siâⁿ, tī hái-.ni̍h kiâⁿ-chûn ê lâng lóng khò chit-ê siâⁿ lâi hoat-châi! Chit-ê siâⁿ chi̍t-sî-á kú to̍h hùi-bô-.khì à!
18:20 " Thiⁿ ah, lín chiahê sìn-tô͘ kah sian-ti, tio̍h ūi tio̍h chit-ê siâⁿ ê bia̍t-bông lâi hoaⁿ-hí, in-ūi Siōng-tè í-keng thè lín sin-oan, kā chit-ê siâⁿ chhú-hoa̍t ā. "
18:21 Jiân-āu, ū chi̍t-ê tōa khùi-la̍t ê thiⁿ-sài, mo͘h chi̍t tè chhin-chhiūⁿ tōa chio̍h-bō ê chio̍h-thâu khí-.lâi, hiat lo̍h-khì hái-.ni̍h, kóng, " Ba-bú-lông tōa siâⁿ mā ē chhin-chhiūⁿ ánne, hō͘ lâng chhut-la̍t hiat lo̍h-.khì, choa̍t-tùi bē tàng koh khòaⁿ-.tio̍h.
18:22 Mā bē koh thiaⁿ tio̍h tôaⁿ khîm, chàu ga̍k, pûn-siau, pûn kó͘-chhoe ê siaⁿ, mā bē koh khòaⁿ tio̍h ta̍k chióng kang-gē ê sai-hū, mā bē koh thiaⁿ tio̍h e bō ê siaⁿ;
18:23 Mā bē koh khòaⁿ tio̍h teng-hóe ê kng, mā bē koh thiaⁿ tio̍h sin-lông kah sin-niû ê siaⁿ. Lí ê senglí lâng pêng-sî tī tē-chiūⁿ lóng sī ū sè-le̍k ê lâng; bān-kok mā lóng hō͘ lí ê siâ-su̍t bê-he̍k khì!
18:24 Sian-ti, sìn-tô͘ kah tē-chiūⁿ só͘-ū siū sat-hāi ê lâng ê hoeh lóng tī chit-ê siâⁿ chhōe-.tio̍h, Ba-bú-lông chiah ē siū chhú-hoa̍t. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。