启示录 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
16:1 Siōng-tè Tōa Siū-khì ê Óaⁿ
Āu-lâi, góa koh thiaⁿ tio̍h ū tōa-siaⁿ tùi sèng-tiān chhut-.lâi, kā chhit-ê thiⁿ-sài kóng, " Lín khì, kā hit chhit óaⁿ Siōng-tè ê tōa siū-khì piàⁿ lo̍h-khì tē-chiūⁿ. "
16:2 Thâu chi̍t-ê thiⁿ-sài chiū khì, kā i hit óaⁿ piàⁿ lo̍h-khì tē-chiūⁿ, hiahê ū béng-siù ê kì-hō kah pài i ê chō-siōng ê lâng chiū seⁿ chhàu koh to̍k ê chhng.
16:3 Tē-jī-ê thiⁿ-sài kā i ê óaⁿ piàⁿ lo̍h-khì hái-.ni̍h, hái chiū piàn-chò chhin-chhiūⁿ sí-lâng ê hoeh, hái tiong ê oa̍h-mi̍h lóng sí-.khì.
16:4 Tē-saⁿ-ê thiⁿ-sài kā i ê óaⁿ piàⁿ lo̍h-khì kang-hô kah chúi-chôaⁿ, chúi chiū piàn-chò hoeh.
16:5 Góa thiaⁿ tio̍h chiáng-koán chiahê chúi ê thiⁿ-sài kóng, " Hiān-chāi chûn-chāi, chá-chêng chûn-chāi, chì-sèng ê Siōng-tè, Lí sī kong-gī, Lí ê sím-phòaⁿ kong-chèng.
16:6 In-ūi in ū lâu sìn-tô͘ kah sian-ti ê hoeh, taⁿ Lí ēng hoeh hō͘ in lim, che sī in eng-kai siū ê pò-èng. "
16:7 Jiân-āu góa koh thiaⁿ tio̍h chè-tôaⁿ ū siaⁿ kóng, " Sī lah, Chú — choân-lêng Siōng-tè, Lí ê sím-phòaⁿ chin-si̍t koh kong-gī. "
16:8 Tē-sì-ê thiⁿ-sài kā i hit-ê óaⁿ piàⁿ lo̍h-khì ji̍t-thâu, ji̍t-thâu chiū tit tio̍h koân-pèng, ēng hóe sio lâng.
16:9 Lâng hō͘ tōa iām-joa̍h ê hóe sio-.tio̍h, chiū siat-to̍k hit-ê ū koân chiáng-koán chiahê chai-hō ê Siōng-tè ê miâ, iû-goân m̄-khéng hóe-kái lâi kui êng-kng hō͘ Siōng-tè.
16:10 Tē-gō͘-ê thiⁿ-sài kā i hit-ê óaⁿ piàⁿ lo̍h-khì béng-siù ê chō-ūi, béng-siù ê kok-tō͘ sûi-sî piàn o͘-àm, lâng chiū kan-khó͘ kah kā-chi̍h.
16:11 In koh in-ūi in ê kan-khó͘ kah chhng-to̍k, chiū siat-to̍k thiⁿ-téng ê Siōng-tè, iû-goân bô hóe-kái lâi kái-piàn in ê kiâⁿ-ta̍h.
16:12 Tē-la̍k-ê thiⁿ-sài kā i hit-ê óaⁿ piàⁿ lo̍h-khì Iu-hu-la-té tōa hô, hô chúi sûi-sî ta-.khì, ūi tio̍h tùi tang-hong lâi ê lia̍t ông chún-pī chi̍t tiâu lō͘.
16:13 Góa koh khòaⁿ tio̍h ū saⁿ-ê bô chheng-khì ê lêng, chhin-chhiūⁿ chhân-kap-á, tùi liông ê chhùi, béng-siù ê chhùi kah ké sian-ti ê chhùi chhut-.lâi.
16:14 In to̍h-sī ē kiâⁿ kî-chek ê ok-mô͘ ê siâ-sîn, in chhut-khì chio-chi̍p choân sè-kài ê kun-ông, tī choân-lêng Siōng-tè só͘ tiāⁿ tio̍h hit-ê tōa ji̍t-chí chhut-lâi kau-chiàn.
16:15 （ lí tio̍h chù-ì! Góa ē chhin-chhiūⁿ chha̍t lâi. Hitê sûi-sî kéng-séng, kā saⁿ-chhēng piān-piān ê lâng si̍t-chāi ū hok-khì, in-ūi i m̄-bián hō͘ chèng lâng khòaⁿ tio̍h i thǹgpaktheh ê kiàn-siàu. ）
16:16 Hiahê siâ-mô͘ chiū chio-chi̍p lia̍t ông, tī chi̍t-ê Hi-bú-lâi ōe kiò-chò A-má-ge̍k-tùn ê só͘-chāi chū-chi̍p.
16:17 Tē-chhit-ê thiⁿ-sài kā i hit-ê óaⁿ piàⁿ lo̍h-khì khong-tiong, chiū ū tōa-siaⁿ tùi sèng-tiān ê pó-chō chhut-.lâi, kóng, " Oân-sêng à! "
16:18 Hit sî, ū sihnà, ū hiáng-siaⁿ, ū lûi tân kah tōa tē-tāng. Tē chiūⁿ ū jîn-lūi í-lâi, m̄ bat ū chiahni̍h tōa ê tē-tāng.
16:19 Hitê Ba-bú-lông tōa siâⁿ chiū li̍h-chò saⁿ tè, lia̍t kok ê siâⁿ-chhī mā lóng tó-hoāi. Siōng-tè mā ē kì-tit Ba-bú-lông tōa siâⁿ ê tāichì, chiū hō͘ i lim té-móa Siōng-tè ke̍k tōa siū-khì ê chiú.
16:20 Só͘-ū ê hái-tó kah soaⁿ lóng siau-sit-.khì.
16:21 Jiân-āu tùi thiⁿ-téng kàng-lo̍h tōa-lia̍p pha̍uh, ta̍k-lia̍p ê tāng-liōng lóng ū kúi-nā-cha̍p kong-kin. Lâng ūi tio̍h pha̍uh ê chai-hō, chiū siat-to̍k Siōng-tè, in-ūi hit-ê chai-hō hui-siông giâm-tiōng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。