启示录 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
11:1 Nn̄g-ê Kiàn-Chèng-jîn
Góa ū niá-siū chi̍t ki chhin-chhiūⁿ koái-á ê chhioh, koh ū siaⁿ tùi góa kóng, " Khí-.lâi, khì niû Siōng-tè ê sèng-tiān kah chè-tôaⁿ, mā tio̍h sǹg tī hia kèng-pài ê jîn-sò͘.
11:2 Sèng-tiān ê gōa-īⁿ m̄-bián niû, in-ūi gōa-īⁿ í-keng kau hō͘ gōa-pang lâng, in ē thún-ta̍h sèng-siâⁿ sì-cha̍p-jī goe̍h-ji̍t.
11:3 Góa ē chhe-phài nn̄g-ê chhēng môa-pò͘-saⁿ ê kiàn-chèng-jîn, in beh thoân Siōng-tè ê sìn-sit chi̍t-chheng nn̄g-pah la̍k-cha̍p kang. "
11:4 Chit nn̄g-ê kiàn-chèng-jîn, to̍h-sī khiā tī choân tē ê Chú bīn-chêng hit nn̄g châng kaⁿ-ná chhiū kah nn̄g-ê teng-tâi.
11:5 Nā ū lâng beh kā in siong-hāi, in ē tùi chhùi thò͘ hóe chhut-.lâi, kā tùi-te̍k sio-bia̍t; nā ū lâng ài beh hāi in, it-tēng chhin-chhiūⁿ ē ánne siū sat-hāi.
11:6 Chit nn̄g-ê kiàn-chèng-jîn, ū koân thang kā thiⁿ koaiⁿ khí-.lâi, thang hō͘ in teh thoân tō-lí ê ji̍t-chí bē lo̍h hō͘; in mā ū koân chiáng-koán chúi, hō͘ i piàn-chò hoeh, koh chiàu in só͘ ài, put-koán-sî thang ēng ta̍k chióng ê chai-hō kong-kek tāi-tē.
11:7 In chò kiàn-chèng liáu-āu, tùi bô-té chhim kheⁿ khí-.lâi ê hit chiah béng-siù ē kah in kau-chiàn. Béng-siù ē chiàn-iâⁿ koh kā in kā-sí.
11:8 In ê sin-si ē tó tī tōa siâⁿ ê ke-lō͘; lâng kā chit-ê siâⁿ-chhī pí-phēng chò So͘-tóm kah Ai-gi̍p, in ê Chú mā tī hia hō͘ lâng tèng si̍p-jī-kè.
11:9 Tùi ta̍k-ê bîn-cho̍k, ta̍k-ê cho̍k-kûn, ta̍k chióng gí-giân, ta̍k-ê kok-ka ê tiong-kan, ū lâng lâi khòaⁿ in ê sin-si saⁿ kang pòaⁿ, koh m̄-chún lâng kā in bâi-chòng.
11:10 Tòa tī tē-chiūⁿ ê lâng, ē in-ūi in ê sí lâi hoaⁿ-hí khoài-lo̍k, kau-ōaⁿ lé-mi̍h; in-ūi chit nn̄g-ê sian-ti ū hō͘ tòa tī tē-chiūⁿ ê lâng siū chin chē khó͘-to̍k.
11:11 Kòe hit saⁿ kang pòaⁿ liáu-āu, ū oa̍h-khì tùi Siōng-tè hia lâi ji̍p-khì in lāi-bīn, in chiū peh khí-lâi khiā, khòaⁿ-.tio̍h ê lâng lóng tōa tio̍h-kiaⁿ.
11:12 Hit nn̄g-ê sian-ti chiū thiaⁿ tio̍h tùi thiⁿ lâi ū tōa-siaⁿ tùi in kóng, " Khí-lâi chia! " In chiū tī tùi-te̍k ê ba̍k-chiu chêng, chē hûn chiūⁿ thiⁿ.
11:13 Tú hit sî, hoat-seng tōa tē-tāng, hit chō siâⁿ tò cha̍p-hūn chi-it; in-ūi tē-tāng sí-.khì ê ū chhit-chheng lâng; kî-tha ê lâng tōa tio̍h-kiaⁿ, kui êng-kng hō͘ thiⁿ-téng ê Siōng-tè.
11:14 Tē-jī-ê chai-hō í-keng kòe-.khì, tē-saⁿ-ê chai-hō liâmpiⁿ kàu.
11:15 Tē-chhit Ki Kó͘-chhoe
Tē-chhit-ê thiⁿ-sài chi̍t ē pûn kó͘-chhoe, thiⁿ-téng ū ke̍k tōa ê siaⁿ teh kóng, " Sè-kan ê kok chiâⁿ-chò lán ê Siōng-tè kah I ê Ki-tok ê kok-tō͘. I beh chò ông kàu bān-sè-tāi bô chīn. "
11:16 Tī Siōng-tè ê bīn-chêng, chē tī in chō-ūi ê jī-cha̍p sì ê tiúⁿ-ló, bīn phak lo̍h-khì kèng-pài Siōng-tè,
11:17 Kóng, " Hiān-chāi chûn-chāi, chá to̍h chûn-chāi ê choân-lêng ê Chú — Siōng-tè, goán kám-siā Lí, in-ūi Lí í-keng chiáng-koân lâi chò ông.
11:18 Lia̍t kok tōa siū-khì, Lí mā tōa siū-khì. Sí-lâng siū sím-phòaⁿ ê sî-kî kàu à. Lí ê lô͘-po̍k, to̍h-sī hiahê sian-ti kah chèng sìn-tô͘ í-ki̍p kèng-ùi Lí ê miâ ê, bô-lūn tōa-sè, Lí pò-siúⁿ in ê sî-kî kàu à. Hiahê pāi-hoāi tāi-tē ê lâng siū Lí húi-bia̍t ê sî-kî kàu à. "
11:19 Tī thiⁿ-téng, Siōng-tè ê sèng-tiān chiū khui, sèng-tiān lāi bīn I ê iok-kūi khòaⁿ hiān-hiān; sòa lo̍h-lâi ū sihnà, hiáng-siaⁿ, lûi tân, tē-tāng kah tōa pha̍uh.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。