启示录 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
9:1 Pûn Tē-gō͘ Ki kah Tē La̍k Ki Kó͘-chhoe Ī-kò ê Chai-hō
Tē-gō͘-ê thiⁿ-sài chi̍t ē pûn, góa khòaⁿ tio̍h chi̍t lia̍p chheⁿ tùi thiⁿ-téng lak lo̍h tē. Chit lia̍p chheⁿ ū niá-siū bô-té chhim kheⁿ ê só-sî.
9:2 Chit lia̍p chheⁿ phah-khui bô-té chhim kheⁿ, chiū ū chhin-chhiūⁿ tōa hóe-lô͘ ê ian tùi chhim kheⁿ chhèng khí-.lâi, ji̍t-thâu kah thài-khong lóng in-ūi chhim kheⁿ ê ian piàn-sêng o͘-àm.
9:3 Ū chháu-meh tùi ian ê lāi-bīn chhut-.lâi, hioh tī tē-chiūⁿ; in ū niá-siū chhin-chhiūⁿ tē-chiūⁿ ê giat-á-thâng só͘-ū ê koân-pèng.
9:4 Hiahê chháu-meh ū siū kau-tài, m̄ thang siong-hāi tē-chiūⁿ ê chheⁿ-chháu, chhiū-ba̍k kah só͘-ū ê si̍t-bu̍t, kantaⁿ thang siong-hāi hiahê tī thâu-hia̍h bô hō͘ Siōng-tè khàm ìn chò kì-hō ê lâng.
9:5 Koh m̄-chún chháu-meh hāi-sí chiahê lâng, kantaⁿ hō͘ in siū khó͘ gō͘ goe̍h-ji̍t; in ê thòng-khó͘ tú chhin-chhiūⁿ hō͘ giat-á-thâng kā tio̍h.
9:6 Tī hit gō͘ goe̍h-ji̍t tiong-kan, lâng kiû beh sí mā bē tit sí, ài beh sí mā sí bē khì.
9:7 Chháu-me̍h ê hêng-chōng chhin-chhiūⁿ chún-pī beh chhut-chiàn ê bé, thâu-khak téng kahná ū tì kim ê bián-liû, in ê bīn chhin-chhiūⁿ lâng ê bīn.
9:8 In ū chhin-chhiūⁿ chabó͘ lâng ê thâu-mn̂g, koh ū chhin-chhiūⁿ sai ê gê.
9:9 In ê heng-khám ū chhin-chhiūⁿ thih ê chiàn-kah, in ê si̍t hoat-chhut ê siaⁿ, chhin-chhiūⁿ chin chē bé-chhia phun-cháu-khì kau-chiàn ê siaⁿ.
9:10 In ū chhin-chhiūⁿ giat-á-thâng ê bóe-liu ū chhì, in ū koân-lêng thang ēng chit-ê bóe-liu lâi siong-hāi lâng gō͘ goe̍h-ji̍t.
9:11 Chháu-me̍h ū chi̍t-ê ông, to̍h-sī koán-hat bô-té chhim kheⁿ ê thiⁿ-sài, i ê miâ Hi-bú-lâi gí kiò-chò " A-ba-tòng", Hi-la̍h gí kiò-chò " A-po-lû-óng".
9:12 Thâu chi̍t-ê chai-hō í-keng kòe-.khì, í-āu iáu ū nn̄g-ê chai-hō teh beh lâi.
9:13 Tē-la̍k-ê thiⁿ-sài chi̍t ē pûn, góa thiaⁿ tio̍h chi̍t-ê siaⁿ, tùi Siōng-tè ê bīn-chêng ê kim-tôaⁿ sì-ê kak chhut-.lâi,
9:14 Kā gia̍h kó͘-chhoe ê tē-la̍k-ê thiⁿ-sài kóng, " Lí tio̍h kā pa̍k tī Iu-hu-la-té tōa hô hit sì-ê thiⁿ-sài tháu-pàng chhut-.lâi. "
9:15 Hit sì-ê thiⁿ-sài siū tháu-pàng ê tāichì, chá to̍h an-pâi hó-sè, tī hit-ê sî, hit-ê ji̍t, hit-ê goe̍h, hit-ê nî, beh lâi hāi-sí-lâng lūi ê saⁿ-hūn chi-it.
9:16 Góa ū thiaⁿ-kóng bé-peng ê sò͘-bo̍k chóng-kiōng ū nn̄g ek.
9:17 Góa tī ī-siōng tiong khòaⁿ tio̍h bé kah khiâ bé ê lâng chhin-chhiūⁿ ánne, in chhēng ê chiàn-kah sek-tì âng kah chhin-chhiūⁿ hóe, nâ kah chhin-chhiūⁿ nâ-pó-chio̍h, n̂g kah chhin-chhiūⁿ liû-hông; bé ê thâu chhin-chhiūⁿ sai ê thâu, tùi in ê chhùi thò͘-chhut hóe, ian kah liû-hông.
9:18 Jîn-lūi ê saⁿ-hūn chi-it, hō͘ tùi hit chiah bé ê chhùi thò͘ chhut-.lâi ê hóe, ian kah liû-hông saⁿ hāng ê chai-hō sat-hāi.
9:19 Chiahê bé ê koân-pèng tī in ê chhùi kah bóe-liu, in-ūi in ê bóe-liu chhin-chhiūⁿ chôa ū thâu, in ēng hiahê thâu lâi siong-hāi lâng.
9:20 Kî-tha bô siū chiahê chai-hō sat-hāi ê lâng iáu koh bô beh hóe-kái, bô beh hòng-khì in ê chhiú só͘ chō ê ngó͘-siōng, iû-goân teh pài hiahê kúi kah bē khòaⁿ, bē thiaⁿ, bē kiâⁿ, ēng kim, gîn, tâng, chio̍h, chhâ só͘ chō ê ngó͘-siōng.
9:21 Hiahê lâng hoān tio̍h thâi lâng, siâ-su̍t, îm-loān kah thau-the̍h ê chōe, mā bô hóe-kái.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。