约翰一书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
5:1 Iâⁿ Kòe Sè-kan
Siong-sìn I-é-su sī Ki-tok ê lâng, lóng sī Siōng-tè ê kiáⁿ-jî; thiàⁿ pē-bú ê, mā ē thiàⁿ in só͘ seⁿ ê kiáⁿ-jī.
5:2 Lán nā thiàⁿ Siōng-tè koh chun-siú I ê kài-bēng, ánne lán chiū chai lán ū teh thiàⁿ Siōng-tè ê kiáⁿ-jî.
5:3 Chun-siú Siōng-tè ê kài-bēng, to̍h-sī thiàⁿ Siōng-tè; I ê kài-bēng m̄-sī oh chun-siú ê.
5:4 In-ūi Siōng-tè ê kiáⁿ-jî lóng ē-tàng iâⁿ-kòe sè-kan; lán ê sìn-gióng hō͘ lán iâⁿ-kòe sè-kan.
5:5 Iâⁿ-kòe sè-kan ê sī siáⁿ lâng? Kám m̄-sī hiahê siong-sìn I-é-su sī Siōng-tè ê Kiáⁿ ê lâng?
5:6 Kiàn-chèng I-é-su Ki-tok
Chit-ê I-é-su Ki-tok sī tùi chúi kah hoeh lâi ê; m̄-sī kantaⁿ ēng chúi, sī ēng chúi kah hoeh.
5:7 Sèng Sîn chhin-chū kiàn-chèng chit-ê sū-si̍t, in-ūi Sèng Sîn to̍h-sī chin-lí.
5:8 Ū saⁿ-ê teh chò kiàn-chèng, to̍h-sī Sèng Sîn, chúi kah hoeh, chit saⁿ-ê kiàn-chèng lóng ū it-tì.
5:9 Lâng ê kiàn-chèng lán to teh chiap-siū, Siōng-tè ê kiàn-chèng tong-jiân koh khah ū hāu-le̍k, in-ūi chit-ê sī Siōng-tè ūi tio̍h I ê Kiáⁿ só͘ chò ê kiàn-chèng.
5:10 Sìn Siōng-tè ê Kiáⁿ ê lâng, tī sim-lāi ū chit-ê kiàn-chèng; m̄-sìn Siōng-tè ê lô͘-po̍k, to̍h-sī lia̍h-chò Siōng-tè teh kóng pe̍h-chha̍t, in-ūi i m̄-sìn Siōng-tè ūi tio̍h I ê Kiáⁿ só͘ chò ê kiàn-chèng.
5:11 Chit-ê kiàn-chèng to̍h-sī, Siōng-tè í-keng ū siúⁿ-sù éng-oán ê oa̍h-miā hō͘ lán, chit-ê oa̍h-miā sī tùi I ê Kiáⁿ lâi ê.
5:12 Ū kah Siōng-tè ê Kiáⁿ kiat-liân ê lâng chiū ū chit-ê oa̍h-miā; bô kah Siōng-tè ê Kiáⁿ kiat-liân ê lâng chiū bô chit-ê oa̍h-miā.
5:13 Éng-oán ê Oa̍h-miā
Góa siá chiahê tāichì, sī beh hō͘ lín chai-iáⁿ, sìn Siōng-tè ê Kiáⁿ ê lâng ū éng-oán ê oa̍h-miā.
5:14 Lán tī Siōng-tè ê bīn-chêng ióng-kám bô kiaⁿ-hiâⁿ, in-ūi lán khak-sìn, nā chiàu I ê chí-ì, bô-lūn kiû siáⁿ-mi̍h, I lóng ē thiaⁿ lán ê kî-kiû.
5:15 Kì-jiân lán khak-sìn I ē thiaⁿ lán ê kî-kiû, lán chiū ánne chai-iáⁿ, lán tùi I kî-kiû ê í-keng tit tio̍h.
5:16 Lâng nā khòaⁿ tio̍h hiaⁿ-tī á-.sī chí-mōe hoān tio̍h bē tì-kàu sí ê chōe, tio̍h ǹg Siōng-tè kî-kiû, Siōng-tè ē siúⁿ-sù i oa̍h-miā; lâng só͘ hoān ê nā-sī ē tì-kàu sí ê chōe, góa bô kóng tio̍h ūi chit khoán chōe-jîn kî-tó.
5:17 Só͘-ū put-gī ê hêng-ûi lóng sī hoān chōe, m̄ koh, mā ū bián tì-kàu sí ê chōe.
5:18 Kéng-kài
Lán chai Siōng-tè ê kiáⁿ-jî bē kè-sio̍k hoān chōe, in-ūi ū Siōng-tè ê Kiáⁿ teh kā i pó-siú, hit-ê Mô͘-kúi kha̍p i bē tio̍h.
5:19 Lán chai lán sī sio̍k Siōng-tè, m̄ koh, choân sè-kan lóng siū hit-ê Mô͘-kúi koán-hat.
5:20 Lán mā chai Siōng-tè ê Kiáⁿ í-keng lîm-kàu, I koh hō͘ lán hiáu-ngō͘, lâi jīn-bat hit ūi chin-si̍t ê Siōng-tè. Lán kah chin-si̍t ê Siōng-tè kiat-liân, in-ūi lán kah I ê Kiáⁿ I-é-su Ki-tok mā ū kiat-liân. chit ūi sī chin-si̍t ê Siōng-tè, mā sī éng-oán ê oa̍h-miā.
5:21 Sè-kiáⁿ, lín tio̍h kín-sīn, siám-phiah ngó͘-siōng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。