约翰一书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
3:1 Siōng-tè ê Kiáⁿ-jî
Lín siūⁿ khòaⁿ Thiⁿ-pē sī gōa-ni̍h thiàⁿ lán, I hō͘ lán thang kiò-chò Siōng-tè ê kiáⁿ-jî; sū-si̍t siōng, lán khak-si̍t sī I ê kiáⁿ-jî. Só͘-í, sè-kan lâng m̄ bat lán, sī in-ūi in m̄ bat Siōng-tè.
3:2 Chhin-ài ê hiaⁿ-tī chí-mōe, chitmá lán chò Siōng-tè ê kiáⁿ-jî, chiong-lâi ē piàn án-chóaⁿ, iáu-bōe hián-bêng. Lán chai, I nā chài-lîm, lán chiū ē chhin-chhiūⁿ I, in-ūi lán ē khòaⁿ tio̍h I ê chin-siōng.
3:3 Ki-tok sī sûn-kiat, só͘-í, tùi Ki-tok ū chit khoán ǹg-bāng ê lâng ē kakī pó-chhî sûn-kiat.
3:4 Lâng nā hoān chōe, to̍h-sī ûi-pōe Siōng-tè ê lu̍t-hoat, in-ūi chōe to̍h-sī ûi-pōe lu̍t-hoat.
3:5 Lín chai, Ki-tok hián-hiān sī beh tû-khì lâng ê chōe, m̄ koh, I pún-sin bô chōe.
3:6 Kah Ki-tok kiat-liân ê lâng, bē kè-sio̍k hoān chōe; kè-sio̍k hoān chōe ê lâng, m̄ bat khòaⁿ tio̍h Ki-tok, mā lóng m̄ bat I.
3:7 Hoān-chōe á-.sī Chheng-gī
Sè-kiáⁿ, m̄ thang hō͘ lâng kā lín bê-he̍k. Chun-chiàu kong-gī ê lâng chiah sī gī lâng, tú chhin-chhiūⁿ Ki-tok sī gī lâng.
3:8 Kè-sio̍k hoān chōe ê lâng sī sio̍k Mô͘-kúi, in-ūi Mô͘-kúi tùi khí-thâu to̍h hoān chōe; Siōng-tè ê Kiáⁿ hián-hiān ê bo̍k-tek sī beh húi-hoāi Mô͘-kúi-ê kang-chok.
3:9 Siōng-tè ê kiáⁿ-jî bē kè-sio̍k hoān chōe, in-ūi ū Siōng-tè ê oa̍h-miā tī in lāi-bīn; kì-jiân Siōng-tè sī in ê Thiⁿ-pē, in bē kè-sio̍k hoān chōe.
3:10 Siōng-tè ê kiáⁿ-jî kah Mô͘-kúi-ê kiáⁿ-jî khu-pia̍t kah chin chheng-chhó; bô chun-chiàu kong-gī kah bô thiàⁿ hiaⁿ-tī chí-mōe ê lâng, to̍h m̄-sī Siōng-tè ê kiáⁿ-jî.
3:11 Tio̍h Sio-thiàⁿ
Lán tio̍h sio-thiàⁿ, che sī lín tùi khí-thâu to̍h thiaⁿ-.tio̍h ê sìn-sit.
3:12 Lán m̄ thang chhin-chhiūⁿ Kai-ín, i sio̍k siâ-ok, thâi-sí kakī ê sió-tī. I siáⁿ-mi̍h iân-kò͘ thâi-sí kakī ê sió-tī? In-ūi i ê hêng-ûi siâ-ok, m̄ koh, sió-tī ê hêng-ûi chèng-ti̍t.
3:13 Hiaⁿ-tī chí-mōe, sè-kan lâng nā oàn-hūn lín, m̄ thang kám-kak kî-koài.
3:14 Lán chai lán í-keng chhut-sí ji̍p-oa̍h, in-ūi lán ū thiàⁿ hiaⁿ-tī chí-mōe; bô thiàⁿ-sim ê lâng, iáu siū sí-bông ê koán-hat.
3:15 Oàn-hūn hiaⁿ-tī á-.sī chí-mōe ê lâng to̍h-sī sat-jîn-hoān. Lín mā chai sat-jîn-hoān bô éng-oán ê oa̍h-miā tī i ê sim-lāi.
3:16 Ki-tok ūi lán hi-seng sèⁿ-miā, lán chiū tùi ánne chai-iáⁿ siáⁿ-mi̍h sī thiàⁿ-sim. Lán mā eng-kai ūi tio̍h hiaⁿ-tī á-.sī chí-mōe hi-seng sèⁿ-miā.
3:17 Nā ū hó-gia̍h lâng khòaⁿ tio̍h i ê hiaⁿ-tī á-.sī chí-mōe ū khiàm-khoeh, m̄ koh, bô tông-chêng liân-bín ê sim, ná ē-tàng kóng i thiàⁿ Siōng-tè?
3:18 Sè-kiáⁿ, sio-thiàⁿ m̄ thang kantaⁿ ēng ōe á-.sī ēng chhùi kóng, tio̍h ēng hêng-tōng lâi chèng-bêng.
3:19 Tī Siōng-tè ê Bīn-chêng Ū Chū-sìn
Chiū ánne, lán chai lán sī sio̍k chin-lí ê lâng. Lán nā siū liông-sim chek-pī, tī Siōng-tè ê bīn-chêng lán ē-tàng an-ún chū-chāi.
3:20 In-ūi Siōng-tè pí lán ê sim khah tōa, mā ta̍k hāng lóng chai.
3:21 Chhin-ài ê hiaⁿ-tī chí-mōe, lán ê liông-sim nā bô kā lán chek-pī, lán tī Siōng-tè ê bīn-chêng, chiū thang an-jiân chū-chāi.
3:22 Lán bô-lūn tùi Siōng-tè kiû siáⁿ-mi̍h, lóng ē tit tio̍h, in-ūi lán ū chun-siú I ê bēng-lēng, tī I ê bīn-chêng, chò I só͘ hoaⁿ-hí ê tāichì.
3:23 I ê kài-bēng sī ánne, lán tio̍h sìn I ê Kiáⁿ I-é-su Ki-tok ê miâ, mā tio̍h chiàu I hō͘ lán ê bēng-lēng sio-thiàⁿ.
3:24 Chun-siú Siōng-tè ê kài-bēng ê lâng to̍h-sī kah I kiat-liân; tùi Siōng-tè siúⁿ-sù hō͘ lán ê Sèng Sîn, lán chai Siōng-tè ū kah lán kiat-liân.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。