彼得前书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
5:1 Siōng-tè ê Iûⁿ-kûn
Góa chitmá ēng tiúⁿ-ló ê sin-hūn, khó͘-khǹg lín tiong-kan ê tiúⁿ-ló; góa koh sī Ki-tok siū khó͘ ê kiàn-chèng-jîn, mā beh hun-hióng teh beh hián-hiān ê êng-kng.
5:2 Lín tio̍h bo̍k-ióng Siōng-tè kau-tài lín ê iûⁿ-kûn, kā in chiàu-kò͘. M̄-sī bián-kióng, sī chiàu Siōng-tè ê chí-ì, kam-sim lo̍k-ì; m̄-sī ūi tio̍h tham-châi, sī hoaⁿ-hí lâi ho̍k-sāi;
5:3 Mā m̄-sī chò Siōng-tè kau-tài lín ê iûⁿ-kûn ê chú-lâng lâi kā in koán-hat, sī tio̍h chò in ê hó bô͘-iūⁿ.
5:4 Án-ne, tī tōa-bo̍k-chiá hián-hiān ê sî, lín chiah ē tit tio̍h bē sit-khì kong-chhái ê êng-koan.
5:5 Kah ánne kāng-khoán, lín siàu-liân lâng tio̍h sūn-ho̍k tióng-pòe. Lín tāi-ke tio̍h hō͘-siong khiam-sùn tùi-thāi, in-ūi keng-tián ū kì-chài kóng, " Siōng-tè kah kiau-ngō͘ ê lâng tùi-te̍k, siúⁿ-sù un-tián hō͘ khiam-pi ê lâng. "
5:6 Só͘-í, lín tio̍h tī Siōng-tè tōa khùi-la̍t ê chhiú-hā kakī khiam-pi, I kàu-sî ē kā lín ko-seng.
5:7 Lín tio̍h kā it-chhè ê chhau-hoân kau-thok hō͘ Siōng-tè, in-ūi I koan-sim lín.
5:8 Tio̍h kín-sīn, tio̍h kéng-séng. In-ūi lín ê tùi-te̍k Mô͘-kúi chhin-chhiūⁿ teh háu ê sai, sì-kè kiâⁿ teh chhōe thang thun-chia̍h ê lâng.
5:9 Tio̍h óa-khò kian-tēng ê sìn-sim lâi tí-khòng i, in-ūi lín chai choân sè-kài ê hiaⁿ-tī chí-mōe lóng teh siū kāng-khoán ê khó͘-lān.
5:10 Tán lín chiām-sî siū khó͘ liáu-āu, siúⁿ-sù it-chhè un-tián ê Siōng-tè, to̍h-sī thong-kòe Ki-tok ho͘-tiàu lín lâi tit tio̍h I éng-oán ê êng-kng ê hit ūi, ē chhin-sin sù lín khùi-la̍t, lâi tiông-sin kiàn-li̍p kian-kò͘ ê ki-chhó͘.
5:11 Goān koân-lêng kui hō͘ Siōng-tè, ti̍t-kàu éng-oán. A-men!
5:12 Kiat-bóe ê Chhéng-an
Thong-kòe tiong-si̍t ê hiaⁿ-tī Se-la̍h, góa siá chit tiuⁿ té-té ê phoe hō͘ lín, lâi bián-lē lín, mā kiàn-chèng che sī Siōng-tè chin-si̍t ê un-tián. Lín tio̍h tī chit-ê un-tián téng-bīn khiā chāi.
5:13 Tiàm tī Ba-bú-lông kah lín pêⁿ-pêⁿ siū kéng-soán ê kàu-hōe, í-ki̍p góa ê kiáⁿ Má-khó kā lín chhéng-an.
5:14 Lín tio̍h ēng thiàⁿ-sim ê lé-gî lâi hō͘-siong chhéng-an. Goān só͘-ū sio̍k Ki-tok ê lâng lóng tit tio̍h pêng-an!
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。