希伯来书 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 福州话 粤语和合本 希腊文(WH-NT) 下载档案 关于语音圣经
13:1 Siōng-tè Só͘ Kah-ì ê Ho̍k-sāi
Lín tio̍h chhin-chhiūⁿ hiaⁿ-tī chí-mōe kè-sio̍k sio-thiàⁿ.
13:2 M̄-thang bē kì-tit chiap-thāi chhut-gōa lâng, in-ūi ánne chò ē tī bô-ì-tiong chiap-thāi tio̍h thiⁿ-sài.
13:3 Tio̍h koan-hoâi hiahê siū koaiⁿ-kaⁿ ê lâng, chhin-chhiūⁿ kah in tông koaiⁿ-kaⁿ. Tio̍h koan-hoâi hiahê siū ge̍k-thāi ê lâng, chhin-chhiūⁿ lín mā teh siū ge̍k-thāi.
13:4 Tāi-ke tio̍h chun-tiōng hun-in, hu-chhe tio̍h hō͘-siong tiong-si̍t, in-ūi Siōng-tè ē sím-phòaⁿ su-thong kiâⁿ kan-îm ê lâng.
13:5 Chò-lâng m̄ thang tham-châi, kakī só͘-ū ê tio̍h ti chiok, in-ūi Siōng-tè ū kóng, " Góa choa̍t-tùi bē pàng-sak lí, choa̍t-tùi bē lī-khui lí. " (chù, SBK 31:6; CSK 28:15)
13:6 Só͘-í, lán ē-tàng hó-táⁿ kóng, Chú sī góa ê pang-chān. Góa bô kiaⁿ-hiâⁿ, lâng ē-tàng tùi góa án-chóaⁿ? (chù, SPh 118:6)
13:7 Tio̍h siàu-liām í-chêng ín-chhōa lín, thoân Siōng-tè ê hok-im hō͘ lín ê lâng. Tio̍h chim-chiok khòaⁿ in hêng-ûi ê kiat-kio̍k, lâi ha̍k-si̍p in ê sìn-gióng.
13:8 I-é-su Ki-tok tùi kòe-khì-kàu kin-á-ji̍t, it-ti̍t kàu éng-oán lóng bē kái-piàn.
13:9 Lín m̄ thang hō͘ ta̍k-khoán kî-ī ê kàu-gī chhōa bê-lō͘ khì, in-ūi sim-sîn khah hó sī khò Siōng-tè ê un-tián lâi kian-kò͘; m̄ thang khò hiahê chia̍h-mi̍h kui-kú, in-ūi chun-siú chia̍h-mi̍h kui-kú ê lâng pēng bô tit tio̍h lī-ek.
13:10 Lán ū lán ê chè-tôaⁿ, tī hōe-bō͘ ho̍k-sāi ê Iô-tá-iah chè-si bô koân thang chia̍h lán chè-tôaⁿ téng ê chè-mi̍h.
13:11 Iô-tá-iah lâng ê tōa-chè-si tòa chengseⁿ ê hoeh ji̍p-khì chì-sèng-só͘ lâi sio̍k-chōe, khiok kā chengseⁿ ê si-thé tī iâⁿ gōa sio-tiāu.
13:12 Só͘-í, ūi tio̍h beh ēng kakī ê hoeh hō͘ chèng lâng chiâⁿ chò sèng-kiat, I-é-su mā tī iâⁿ gōa siū khó͘ lâi hi-seng.
13:13 Án-ne, lán mā tio̍h chhut-khì iâⁿ gōa kah I chò-hóe jím-siū lêng-jio̍k.
13:14 In-ūi tī tē-chiūⁿ lán bô éng-kiú ê siâⁿ, lán sī teh chhōe hit-ê teh beh lâi ê siâⁿ.
13:15 Só͘-í, lán tio̍h thong-kòe I-é-su, kè-sio̍k ēng oló ê chè hiàn hō͘ Siōng-tè, che to̍h-sī kong-khai sêng-jīn Chú ê miâ ê lâng ê chhùi-tûn só͘ kiat ê kóe-chí.
13:16 Tio̍h ē kì-tit chò hó sū kah hō͘-siong pang-chān, in-ūi che sī Siōng-tè só͘ hoaⁿ-hí ê chè-mi̍h.
13:17 Tio̍h sūn-ho̍k ín-chhōa lín ê lâng, tio̍h thiaⁿ in ê ōe, in-ūi in put-sî teh khòaⁿ-kò͘ lín ê lêng-hûn, thang tùi Siōng-tè ū kau-tài. Lín tio̍h hō͘ in hoaⁿ-hí lâi kang-chok; nā bô, in ē léng-sim thó͘-khùi, ánne tùi lín bô lī-ek.
13:18 Lín tio̍h kè-sio̍k ūi goán kî-tó. Goán khak-sìn kakī ū chheng-pe̍h ê liông-sim, ta̍k hāng tāichì ài beh kiâⁿ chèng-ti̍t ê lō͘.
13:19 Góa koh khah khún-kiû lín ūi góa kî-tó, hō͘ góa thang khah kín koh khì lín hia.
13:20 Chiok-hok kah Kiat-bóe ê Chhéng-an
Taⁿ Siōng-tè hō͘ lán ê Chú I-é-su koh-oa̍h khí-.lâi, thong-kòe I-é-su só͘ lâu ê hoeh, lâi khak-li̍p éng-oán ê iok, hō͘ I-é-su chiâⁿ-chò ín-chhōa iûⁿ-kûn ê tōa-bo̍k-chiá.
13:21 Goān sù pêng-an ê Siōng-tè, siúⁿ-sù hō͘ lín ta̍k hāng hó tāichì, lâi chun-chiàu I ê chí-ì; goān I thong-kòe I-é-su Ki-tok, tī lán ê sim-lāi chò tāichì, lâi hō͘ I hoaⁿ-hí; goān êng-kng kui tī Ki-tok, kàu tāi-tāi bô soah. A-men!
13:22 Hiaⁿ-tī chí-mōe, góa siá té-té ê phoe hō͘ lín, khǹg lín nāi-sim thiaⁿ góa khoàn-bián ê ōe.
13:23 Góa ài pò lín chai, lán ê hiaⁿ-tī Tî-mó͘-theh í-keng chhut kaⁿ. I nā khah kín lâi, góa ē kiò i kah góa chò-hóe khì lín hia.
13:24 Chhiáⁿ lín thè goán, kā hiahê ín-chhōa lín ê lâng kah chèng sèng-tô͘ chhéng-an; tùi I-ta-lí-ah lâi ê sìn-tô͘, mā beh kā lín chhéng-an.
13:25 Goān Siōng-tè ê un-tián kah lín chèng lâng tông-chāi. A-men!
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。