希伯来书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
8:1 Lán ê Tōa-chè-si I-é-su
Góa só͘ kóng ê iàu-tiám to̍h-sī, lán ū chit khoán ê tōa-chè-si, I chē tī thiⁿ-téng chì-tōa Siōng-tè pó-chō ê chiàⁿ pêng.
8:2 I tī sèng-só͘ kah chin ê hōe-bō͘ teh ho̍k-sāi, chit-ê hōe-bō͘ sī Chú só͘ siat-li̍p ê, m̄-sī lâng só͘ chō ê.
8:3 Múi chi̍t-ê tōa-chè-si ê siat-li̍p, lóng sī ūi tio̍h hiàn lé-mi̍h kah chè-sū, só͘-í, chit-ê tōa-chè-si mā it-tēng tio̍h ū siáⁿ-mi̍h thang hiàn.
8:4 I-é-su nā lâu tī tē-chiūⁿ chiū bô chò chè-si, in-ūi í-keng ū chè-si chiàu lu̍t-hoat teh hiàn lé-mi̍h.
8:5 Chiàu lu̍t-hoat ê chè-si só͘ chò ê ho̍k-sāi, chí-put-kò sī hóng-chō thiⁿ-téng ê hōe-bō͘ kah iáⁿ-siōng. Tú chhin-chhiūⁿ Mô͘-se beh chō hōe-bō͘ ê sî, Siōng-tè ū kā i chí-sī, kóng, " Lí tio̍h kín-sīn, it-chhè tio̍h chiò tī soaⁿ téng góa kā lí chí-sī ê khoán-sit lâi chō. " (chù, CAG 25: 40)
8:6 Taⁿ I-é-su í-keng tit tio̍h koh khah chun-kùi ê ho̍k-sāi, I chò koh khah hó ê iok ê tiong-pó. Chit-ê iok sī ēng koh khah hó ê èng-ín lâi siat-li̍p ê.
8:7 Thâu chi̍t-ê iok nā bô siáⁿ-mi̍h khoat-tiám, chiū bô su-iàu li̍p tē-jī-ê iok.
8:8 Siōng-tè kā in chí-chek, kóng, lí khòaⁿ, ji̍t-chí teh beh kàu, góa beh kah I-su-la-el jîn-bîn í-ki̍p Iô-tah jîn-bîn li̍p sin ê iok.
8:9 Chit-ê iok bô chhin-chhiūⁿ chêng góa kah in ê chó͘-sian só͘ li̍p ê, to̍h-sī khan in ê chhiú, chhōa in chhut Ai-gi̍p ê sî só͘ li̍p ê, in-ūi in bô kè-sio̍k siú góa ê iok, góa mā bô beh khòaⁿ-kò͘ in.
8:10 Chú koh kóng, Chiahê ji̍t í-āu, góa kah I-su-la-el lâng beh li̍p ê iok sī ánne, góa beh kā góa ê lu̍t-hoat khǹg tī in ê thâu-náu, khek tī in ê sim. Góa beh chò in ê Siōng-tè, in beh chò Góa ê chú-bîn.
8:11 In lóng bē koh kà-sī in ê tông-pau á-.sī in ê hiaⁿ-tī chí-mōe kóng, lí tio̍h bat Chú. In-ūi tùi siōng sè kàu siōng tōa, in lóng ē bat góa.
8:12 Góa ē sià-bián in ê put-gī, bô koh ē kì-tit in ê chōe-ok. " (chù, ILM 31:31-34)
8:13 Siōng-tè kì-jiân kóng-khí sin ê iok, chiū hō͘ thâu chi̍t-ê iok piàn-chò kū ê. Hitê chiām-chiām kū khì koh soe-thè ê chiū ē liâmpiⁿ siau-sit-.khì.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。