提摩太后书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
4:1 Tùi Tî-mó͘-theh ê Hoan-hù
Tī Siōng-tè kah teh beh sím-phòaⁿ oa̍h-lâng kah sí-lâng ê Ki-tok I-é-su ê bīn-chêng, koh in-ūi Ki-tok beh hián-hiān chài-lîm, góa pek-chhiat hoan-hù lí,
4:2 Tio̍h thoân hok-im; bô-lūn tio̍h-sî á-.sī bô tio̍h-sî, lóng tio̍h choan-sim lâi chìn-hêng; ēng kok chióng ê khoan-iông kah kà-sī, lâi khoàn-bián, kéng-kài kah kó͘-lē.
4:3 In-ūi hit-ê sî-ji̍t beh kàu, lâng ē m̄-thiaⁿ toan-chiàⁿ ê kà-sī, tian-tò hīⁿ-khang chiūⁿ koh chiàu kakī ê su-io̍k, phèng-chhiáⁿ chi̍t-ê koh chi̍t-ê in kah-ì thiaⁿ ê lāu-su.
4:4 In oa̍t thâu m̄-thiaⁿ chin-lí, tian-tò ài thiaⁿ bô-iáⁿ bô-chiah ê thoân-soat.
4:5 Chóng-.sī, lí bô-lūn tī siáⁿ-mi̍h khoân-kéng lóng tio̍h chiat-chè, jím-siū kan-khó͘, chò thoân hok-im ê kang, lâi chīn lí ê chit-hūn.
4:6 Taⁿ góa hi-seng hiàn hō͘ Siōng-tè ê kî í-keng kàu à, chit chūn sī góa lī-khui sè-kan ê sî-khek.
4:7 Góa í-keng keng-le̍k hit-ê hó ê cheng-chiàn, í-keng oân-sêng tio̍h pháu-cháu ê lō͘-thêng, í-keng kian-siú tio̍h chhî-siú ê sìn-gióng.
4:8 Taⁿ kong-gī ê koan-bián í-keng kā góa chún-pī hó-sè, to̍h-sī Chú chò kong-gī ê sím-phòaⁿ chiá, tī hit ji̍t beh hō͘ góa. M̄-nā hō͘ góa ê, mā beh hō͘ só͘-ū him-bō͘ Ki-tok chài-lîm hián-hiān ê lâng.
4:9 Su-jîn ê Kau-tài
Lí tio̍h chīn-liōng kóaⁿ-kín lâi góa chia.
4:10 In-ūi Tê-má tham-loân chit-ê sè-kan, chiū lī-khui góa khì The-sa-lô-nî-ke. Ku-lé-su-ke mā khì Ga-la̍h-tia, Tî-to mā khì Ta̍h-má-tia,
4:11 Chí-ū Lū-ka kah góa tī chia. Lí tio̍h chhōa Má-khó kah lí chò-hóe lâi, in-ūi i tùi góa ê kang-chok chin ū pang-chān.
4:12 Góa í-keng chhe-phài Tu-khi-kó͘ khì Ê-hu-soh.
4:13 Góa tī Tho͘-lo-a ê sî lâu tī Ka-pò͘ in tau ê gōa-saⁿ, lí lâi ê sî tio̍h sòa tòa-.lâi, mā tio̍h kā hiahê chheh tòa-.lâi, iû-kî-sī hiahê iûⁿ-phôe ê chheh.
4:14 Phah tâng sai-hū A-le̍k-san-toh kā góa hāi kah chin chhám, Chú ē chiàu i ê só͘ chò lâi kā i pò-èng.
4:15 Lí kakī mā tio̍h thê-hông, in-ūi i put-chí ke̍k-le̍k hoán-tùi lán só͘ thoân ê tō-lí.
4:16 Góa thâu chi̍t pái ūi kakī piān-kái ê sî, bô lâng tī góa ê sin piⁿ chi-chhî góa, chèng lâng lóng kā góa pàng-sak. Goān Siōng-tè bô kā chit-ê chōe kui tī in.
4:17 M̄ koh, Chú kah góa tông-chāi, hō͘ góa ū khùi-la̍t thang chhiong-hun soan-iông sìn-sit, hō͘ só͘-ū ê gōa-pang lâng lóng thiaⁿ-.tio̍h. Chòe-āu góa mā tùi sai ê chhùi hō͘ lâng kiù chhut-.lâi.
4:18 Chú ē kiù góa thoat-lī só͘-ū ê siâ-ok, mā ē chhōa góa an-choân chìn-ji̍p I tī thiⁿ-téng ê kok-tō͘. Goān êng-kng kui I, it-ti̍t kàu éng-oán bô chīn. A-men!
4:19 Kiat-bóe ê Chhéng-an
Chhiáⁿ thè góa kā Pu-lí-su-ki-lah, A-ku-lah kah O͘-ne-sí-ho͘h choân ke chhéng-an.
4:20 Ê-lá-su-toh kè-sio̍k tiàm tī Ko-lîn-to. To-lô-hui-mô͘ in-ūi phòa-pēⁿ, góa kā i lâu tī Mi-lé-toh.
4:21 Lí tio̍h chīn-liōng tī kôaⁿ-thiⁿ í-chêng lâi. Iû-bú-lō͘, Pò͘-tē, Lí-nò͘, Ku-láu-tia kah chèng hiaⁿ-tī chí-mōe, lóng beh kā lí chhéng-an.
4:22 Goān Chú kah lí ê sim-sîn tông-chāi! Goān Siōng-tè ê un-tián kah lín tông-chāi!
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。