提摩太后书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
2:1 Ki-tok ê Cheng-peng
Só͘-í, góa ê kiáⁿ, lí tio̍h óa-khò Ki-tok I-é-su ê un-tián kian-kiông khí-.lâi.
2:2 Lí tī chin chē kiàn-chèng-jîn ê bīn-chêng tùi góa só͘ thiaⁿ-.tio̍h ê tāichì, tio̍h kau-thok hō͘ hiahê tiong-sìn koh ē kham-tit kà-sī pa̍t lâng ê lâng.
2:3 Lí tio̍h chò Ki-tok I-é-su ê cheng-peng, lâi kah góa chò-hóe siū khó͘.
2:4 Chhut-cheng ê peng nā beh hō͘ koaⁿ-tiúⁿ hoaⁿ-hí, chiū m̄ thang hō͘ sè-sū tîⁿ-kha pa̍k-chhiú.
2:5 Chham-ka pí-sài ê lâng nā bô chun-chiàu pí-sài kui-chek, chiū bē tàng tit tio̍h chióng.
2:6 Kut-la̍t ê choh-sit lâng, tong-jiân ē-tàng seng tit tio̍h siu-sêng.
2:7 Góa só͘ kóng ê ōe lí tio̍h hó-hó-á siūⁿ, in-ūi Chú ē hō͘ lí hiáu-ngō͘ ta̍k hāng tāichì.
2:8 Lí tio̍h ē kì-tit góa só͘ thoân ê hok-im, I-é-su Ki-tok sī Ta-bi̍t ê kiáⁿ-sun, Siōng-tè hō͘ I tùi sí-lâng tiong koh-oa̍h.
2:9 Góa ūi tio̍h chit-ê hok-im siū khó͘, sīm-chì chhin-chhiūⁿ hoān-lâng hō͘ lâng kòa kha-liâu chhiú-khàu. Chóng-.sī, Siōng-tè ê tō-lí bô siū khún-pa̍k.
2:10 Só͘-í, góa ūi tio̍h Siōng-tè kéng-soán ê chú-bîn jím-siū it-chhè, hō͘ in mā ē tit tio̍h Ki-tok I-é-su ê chín-kiù kah éng-oán ê êng-kng.
2:11 Ē-bīn chiahê ōe sī thang siong-sìn ê, lán nā kah I tâng-sí, mā ē kah I tâng-oa̍h.
2:12 Lán nā thun-lún kàu-té, mā ē kah I-é-su Ki-tok chò-hóe chiáng-koân. Lán nā m̄ sêng-jīn I, I mā ē m̄ sêng-jīn lán.
2:13 Lán nā bô tiong-si̍t, I-é-su Ki-tok iû-goân sī sìn-si̍t, in-ūi I bē ûi-pōe kakī.
2:14 Chú Só͘ Kah-ì ê Kang-lâng
Lí tio̍h thê-chhéⁿ in ài ē kì-tit chiahê tāichì, tī Chú ê bīn-chêng bēng-lēng in m̄ thang ūi tio̍h giân-sû sio-chèⁿ, in-ūi ánne chò bô lī-ek, koh ē kà-pháiⁿ teh thiaⁿ ê lâng.
2:15 Lí tio̍h chīn-la̍t chò, thang hō͘ Siōng-tè kā lí khòaⁿ-chò sī khó-chhú ê, chò chi̍t-ê bô thang hiâm ê kang-lâng, chèng-khak káng-kái chin-lí ê sìn-sit.
2:16 Tio̍h siám-phiah chho͘-sio̍k bô lō͘-ēng ê ōe, in-ūi nā bô ánne, ē hō͘ lâng lī Siōng-tè ná hn̄g.
2:17 Chit khoán ê ōe ē chhin-chhiūⁿ to̍k-chhng seⁿ-thòaⁿ; Hu-mé-nái kah Hui-lé-toh to̍h sī chit khoán lâng.
2:18 In í-keng lī-khui chin-lí, kóng koh-oa̍h ê tāichì í-keng kòe-.khì, tì-sú hō͘ chi̍t-kóa lâng ê sìn-gióng pāi-hoāi.
2:19 Chóng-.sī, Siōng-tè ê tē-ki kian-kò͘ bē iô-tāng, téng-bīn ū khek jī kóng, " Chú bat I kakī ê chú-bîn. " Koh kóng, " Kiû-kiò Chú ê miâ ê lâng tio̍h lī-khui put-gī. "
2:20 Tī tōa keng chhù ê lāi-bīn, m̄ nā ū kim kah gîn ê khì-kū, mā ū chhâ-ê kah hûi ê; ū ê chò kùi-khì ê lō͘-ēng, ū ê chò khah chho͘-sio̍k ê lō͘-ēng.
2:21 Só͘-í, lâng nā chheng-khì kakī, lī-khui chiahê chho͘-sio̍k ê tāichì, chiū ē chiâⁿ-chò kùi-khì ê khì-kū, sèng-hòa hō͘ chú-lâng ēng, koh chún-pī hó-sè thang lâi chò ta̍k hāng hó sū.
2:22 Phiah-bián kah Tùi-chhiú Chhiong-tu̍t
Tio̍h siám-phiah siàu-liân lâng ê chêng-io̍k, lâi kah hiahê ēng chheng-khì ê sim-lêng kiû-kiò Chú ê lâng chò-hóe tui-kiû kong-gī, sìn-sim, thiàⁿ-sim kah hô-pêng.
2:23 M̄-thang chò gû-gōng bû-ti ê piān-lūn; lí chai chiahê tāichì ē ín-khí oan-ke.
2:24 Chú ê lô͘-po̍k m̄ thang oan-ke, tio̍h un-jiû khoán-thāi chèng lâng, gâu kà-sī, gâu thun-lún,
2:25 Ēng un-jiû lâi kéng-kài hiahê hoán-tùi chiá, kiámchhái Siōng-tè ē hō͘ in hóe-kái, thang lâi bat chin-lí.
2:26 Án-ne, in sûi-jiân í-keng tī Mô͘-kúi-ê chiáng tiong, mā ē hō͘ Chú ê lô͘-po̍k bán-hôe, lâi oân-sêng Siōng-tè ê chí-ì.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。