提摩太前书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
5:1 Tùi Sìn-tô͘ Ka-têng ê Koan-hoâi
M̄-thang chek-pī lāu lâng, tio̍h chhin-chhiūⁿ khó͘-khǹg lāu-pē ánne kā i khoàn-bián; tùi siàu-liân lâng khoàn-bián mā tio̍h chhin-chhiūⁿ khó͘-khǹg kakī ê hiaⁿ-tī;
5:2 Tùi-thāi lāu hū-jîn-lâng tio̍h chhin-chhiūⁿ teh tùi-thāi kakī ê lāu-bú; tio̍h ēng oân-choân sûn-kiat ê sim tùi-thāi siàu-liân hū-jîn-lâng, ná chhin-chhiūⁿ teh tùi-thāi kakī ê chí-mōe.
5:3 Tio̍h chun-kèng chin-chiàⁿ teh chiú-kóaⁿ ê hū-jîn-lâng.
5:4 M̄ koh, chò kóaⁿ-hū ê kiáⁿ-jī-sun ê, tio̍h seng o̍h tī kakī ê ka-têng iú-hàu sī-tōa, in-ūi che sī Siōng-tè só͘ hoaⁿ-hí ê.
5:5 Chin-chiàⁿ bô-i bô-óa ê kóaⁿ-hū chí ū gióng-bōng Siōng-tè, mê-ji̍t kè-sio̍k khún-kiû kî-tó.
5:6 M̄ koh, chhia-hoa ê kóaⁿ-hū sûi-jiân teh oa̍h, kî-si̍t sim-sîn í-keng sí-.khì.
5:7 Lí tio̍h kā in kà-sī chiahê tāichì, chiah bián hō͘ in siū lâng phoe-phêng.
5:8 Lâng nā bô chiàu-kò͘ chhin-lâng, sīm-chì bô chiàu-kò͘ kakī ê ka-têng, to̍h-sī ûi-pōe sìn-gióng, pí bô sìn ê lâng koh khah hāi.
5:9 Kóaⁿ-hū it-tēng tio̍h chhiau-kòe la̍k-cha̍p hòe chiah thang teng-kì, koh tio̍h kantaⁿ kiat-hun chi̍t pái,
5:10 Mā tio̍h ū hó hêng-ûi ê chèng-kì, chhin-chhiūⁿ iúⁿ-chhī kiáⁿ-jî, chiap-thāi chhut-gōa lâng, kā sìn-tô͘ sé kha, chín-chè tú tio̍h hoān-lān ê lâng, choan-sim chò hó sū, téng-téng.
5:11 M̄ koh, siàu-liân ê kóaⁿ-hū m̄ thang kā i teng-kì, in-ūi in chêng-io̍k chi̍t ē chhiong-tōng, chiū ē khì-sak Ki-tok, siūⁿ beh koh-kè,
5:12 Soah lâi ûi-pōe khí-thâu ê sè-goān, tì-sú kakī siū tēng chōe.
5:13 Jî-chhiáⁿ in koh o̍h pîntōaⁿ, kòe-ke kòe-hō͘ khì chhitthô; m̄ nā pîntōaⁿ, mā chin kāu-ōe, ài chhap êng-á-sū, kóng chi̍t-kóa bô eng-kai kóng ê ōe.
5:14 Só͘-í, góa ài siàu-liân ê kóaⁿ-hū koh-kè, seⁿ kiáⁿ, liāu-lí ka-têng, chiah bē hō͘ tùi-te̍k ū ki-hōe lâi kóng lán ê pháiⁿ ōe.
5:15 In-ūi in í-keng ū chi̍t-kóa lâng hoan-thâu khì tòe Sa-tán.
5:16 M̄ koh, sìn Chú ê hū-jîn-lâng ê chhù lāi nā ū kóaⁿ-hū, tio̍h kā i pang-chān, m̄ thang kā chit-ê tàⁿ sak hō͘ kàu-hōe, hō͘ kàu-hōe thang pang-chān hiahê chin-chiàⁿ bô-i bô-óa ê kóaⁿ-hū.
5:17 Tùi Tiúⁿ-ló ê Kà-sī
Gâu tī-lí kàu-hōe ê tiúⁿ-ló, tio̍h ka-pē kā i chun-kèng; tùi hiahê te̍k-pia̍t chīn-la̍t teh kóng tō-lí kah kà-sī ê tiúⁿ-ló, koh khah tio̍h ánne.
5:18 In-ūi keng-tián kóng, " Teh thoa chio̍h-bō ê gû, m̄ thang kā i kòa gû-chhùi-lam. " (chù, SBK 25:4) Koh kóng, " Kang-lâng eng-kai tit tio̍h kang-chîⁿ. " (chù, Lk 10:7)
5:19 Tùi tiúⁿ-ló ê khòng-kò, nā m̄-sī ū nn̄g-ê á-.sī saⁿ-ê chèng-jîn, chiū m̄ thang siū-lí.
5:20 Hoān-chōe ê lâng tio̍h tī chèng lâng ê bīn-chêng kā i chek-pī, thang hō͘ kî-tha ê lâng mā tit tio̍h kéng-kài.
5:21 Góa tī Siōng-tè kah Ki-tok I-é-su í-ki̍p siū kéng-soán ê thiⁿ-sài bīn-chêng bēng-lēng lí, tio̍h chun-siú chiahê chí-sī, m̄ thang ū phian-kiàn, chò tāichì m̄ thang su-phian.
5:22 M̄-thang sûi-piān kā lâng kiâⁿ hōaⁿ-chhiú-lé, mā m̄ thang chham-ú pa̍t lâng ê hoān chōe; tio̍h kò͘-siú kakī ê sûn-kiat.
5:23 In-ūi lí ê ūi-tn̂g bô hó koh kāu-pēⁿ, só͘-í, m̄ thang kantaⁿ lim chúi, mā tio̍h lim tām-po̍h-á chiú.
5:24 Ū chi̍t-kóa lâng ê chōe chin bêng-hián, iáu-bōe sím-phòaⁿ chiū chin chheng-chhó; ū ê lâng ê chōe kàu āu-lâi chiah ē lō͘-hiān.
5:25 Chhin-chhiūⁿ ánne, hó hêng-ûi mā chin bêng-hián, hiahê bô bêng-hián ê mā khàm bē tiâu.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。