帖撒罗尼迦后书 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 福州话 粤语和合本 希腊文(WH-NT) 下载档案 关于语音圣经
1:1 Chhéng-an
Góa Páu-lô kah Se-la̍h í-ki̍p Tî-mó͘-theh siá phoe hō͘ The-sa-lô-nî-ke, sio̍k Thiⁿ-pē Siōng-tè kah Chú I-é-su Ki-tok ê kàu-hōe.
1:2 Goān lín tùi Thiⁿ-pē Siōng-tè kah Chú I-é-su Ki-tok tit tio̍h un-tián kah pêng-an.
1:3 Kám-siā kah Kó͘-lē
Hiaⁿ-tī chí-mōe, goán eng-kai ūi tio̍h lín put-sî kám-siā Siōng-tè, ánne chò sī tong-jiân, in-ūi lín ê sìn-sim ū tōa sêng-tióng, lín sio-thiàⁿ ê sim mā it-ti̍t teh ke-thiⁿ.
1:4 Só͘-í, goán tī Siōng-tè ê chèng kàu-hōe, lóng ēng lín lâi chò khoa-kháu, in-ūi lín siū pek-hāi kah jím-siū hoān-lān ê sî, ū pó-chhî jím-nāi kah sìn-sim.
1:5 Che chèng-bêng Siōng-tè phòaⁿ-tēng lín ē kham-tit sêng-siū Siōng-tè kok-tō͘, lín to̍h-sī ūi tio̍h che teh kè-sio̍k siū khó͘.
1:6 In-ūi Siōng-tè chiàu kong-gī teh sím-phòaⁿ, I ē ēng chai-lān pò-èng hiahê hō͘ lín tú tio̍h chai-lān ê lâng,
1:7 Mā ē hō͘ lín chiahê tú tio̍h chai-lān ê lâng kah goán tâng-chê tit tio̍h an-hioh, to̍h-sī Chú I-é-su kah ū koân-lêng ê thiⁿ-sài tī hóe-iām tiong tùi thiⁿ hián-hiān ê sî, thang kah goán chò-hóe tit tio̍h tháu-pàng.
1:8 Hit sî, I ē hêng-hoa̍t hiahê m̄ bat Siōng-tè kah m̄ sūn-ho̍k lán ê Chú I-é-su ê hok-im ê lâng.
1:9 Chit khoán lâng ē siū éng-oán bia̍t-bông ê hêng-hoa̍t kah Siōng-tè keh-lī, lī-khui I êng-iāu ê khùi-la̍t.
1:10 Chú chài-lîm ê ji̍t, I ē tùi chiahê sìn-tô͘ tit tio̍h êng-iāu, koh tit tio̍h só͘-ū sìn I ê lâng ê oló, in-ūi lín ū sìn goán tùi lín só͘ chò ê kiàn-chèng.
1:11 Ūi tio̍h ánne, goán mā put-sî thè lín kî-tó, goān lán ê Siōng-tè hō͘ lín ê seng-oa̍h ē hû-ha̍p I ê ho͘-tiàu, mā siúⁿ-sù hō͘ lín ū khùi-la̍t, lâi oân-sêng it-chhè hiòng-siān ê goān-bōng kah khò sìn-sim só͘ chò ê kang,
1:12 Thang hō͘ lán ê Chú I-é-su ê miâ, tùi lín tit tio̍h êng-kng, lín mā tùi I tit tio̍h êng-kng. Che lóng sī lán ê Siōng-tè kah Chú I-é-su Ki-tok ê un-tián.
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。