歌罗西书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
3:1 Lí ê Sèⁿ-miā Ún-chông tī Ki-tok Lāi-bīn
Kì-jiân lín í-keng kah Ki-tok tâng-chê koh-oa̍h, lín chiū tio̍h kiû tī thiⁿ-téng ê sū; Ki-tok tī hia, chē tī Siōng-tè ê tōa pêng.
3:2 Lín tio̍h tì-ì thiⁿ-téng ê tāichì, m̄ thang tì-ì tē-chiūⁿ ê tāichì.
3:3 In-ūi lín í-keng sí, lín ê oa̍h-miā kah Ki-tok chò-hóe ún-chông tī Siōng-tè lāi-bīn.
3:4 Ki-tok sī lán ê oa̍h-miā, I hián-hiān ê sî, lín mā ē kah I chò-hóe hián-hiān, lâi hun-hióng I ê êng-iāu.
3:5 Kū ê kah Sin ê Oa̍h-miā
Só͘-í, lín tio̍h húi-bia̍t lín tī tē-chiūⁿ ê io̍k-bōng, to̍h-sī kan-îm, ù-òe, siâ-ok, pháiⁿ ê su-io̍k kah tham-sim. Tham-sim sī chi̍t chióng ê ngó͘-siōng chông-pài.
3:6 In-ūi chiahê tāichì, Siōng-tè ē tùi pōe-ge̍k I ê lâng tōa siū-khì.
3:7 Lín í-chêng tī chiahê io̍k-bōng tiong teh seng-oa̍h ê sî, kiâⁿ-ta̍h mā siū chiahê io̍k-bōng chi-phòe.
3:8 M̄ koh, chitmá lín tio̍h thiat-té khì-sak oàn-hūn, siū-khì, ok-to̍k, húi-pòng kah kóng lahsap-ōe.
3:9 M̄-thang kóng pe̍h-chha̍t sio phiàn, in-ūi lín í-keng hòng-khì kū ê chò lâng kah hêng-ûi,
3:10 Chiâⁿ-chò chi̍t-ê sin ê lâng. Chhòng-chō-chú chiàu kakī ê hêng-siōng kè-sio̍k teh kā chit-ê sin ê lâng ōaⁿ sin, lâi hō͘ i ē-tàng thiat-té jīn-bat Siōng-tè.
3:11 Án-ne, chiū bô koh hun-pia̍t Hi-la̍h lâng á-.sī Iô-tá-iah lâng, siū kat-lé á-.sī bô siū kat-lé, iá-bân ê lâng, bī-khai-hòa ê lâng, chò lô͘-po̍k ê á-.sī chū-iû ê, to̍k-to̍k Ki-tok sī it-chhè, mā tī it-chhè ê lāi-bīn.
3:12 Lín kì-jiân sī Siōng-tè só͘ kéng-soán ê chú-bîn, sī sèng-kiat koh tit tio̍h I ê thiàⁿ ê lâng, lín tio̍h ēng liân-bín, jîn-chû, khiam-pi, un-jiû kah nāi-sim chò saⁿ lâi chhēng.
3:13 Lín tiong-kan nā ū kiù-hun, tio̍h hō͘-siong khoan-iông, hō͘-siōng sià-bián; chhin-chhiūⁿ Chú ū sià-bián lín, lín mā tio̍h ánne hō͘-siōng sià-bián.
3:14 Pí chiahê koh khah iàu-kín ê, tio̍h ài ū thiàⁿ-sim, in-ūi thiàⁿ-sim ē kiat-liân it-chhè, hō͘ lâng oân-choân hô-hó.
3:15 Tio̍h hō͘ Ki-tok só͘ siúⁿ-sù ê hô-pêng tī lín ê sim-lāi chò chú; ūi tio̍h beh hō͘ lín ū chit-ê hô-pêng, Siōng-tè soán-tiàu lín, lâi chiâⁿ-chò chi̍t thé. Lín tio̍h kám-siā Siōng-tè.
3:16 Tio̍h hō͘ Ki-tok ê tō-lí chhiong-móa tī lín ê sim-lāi; tio̍h ēng ta̍k chióng ê tì-hūi hō͘-siong kà-sī, hō͘-siōng khoàn-bián; tio̍h chhiùⁿ Si-phian, Sèng-si kah lêng-koa, tùi sim-té hoat-chhut oló ê siaⁿ, lâi kám-siā Siōng-tè.
3:17 Lín bô-lūn kóng siáⁿ-mi̍h á-.sī chò siáⁿ-mi̍h, lóng tio̍h chiàu Chú I-é-su ê chí-ì, thong-kòe I lâi kám-siā Thiⁿ-pē Siōng-tè.
3:18 Sin Sèⁿ-miā tiong ê Jîn-chè Koan-hē
Chò-lâng ê bó͘ tio̍h sūn-ho̍k i ê tiōng-hu, che sī lí-só͘-tong-jiân ê.
3:19 Chò tiōng-hu ê tio̍h thiàⁿ lí ê bó͘, m̄ thang kā i pháiⁿ khoán-thāi.
3:20 Chò kiáⁿ-jî ê tio̍h ta̍k hāng tāichì sūn-ho̍k pē-bú, in-ūi che sī Chú só͘ hoaⁿ-hí ê.
3:21 Chò lāu-pē ê lâng m̄ thang kek kiáⁿ-jî siū-khì, chiah bē hō͘ in hoe-sim sit-chì.
3:22 Chò lô͘-po̍k ê lâng tio̍h ta̍k hāng tāichì sūn-ho̍k hiahê sè-chiūⁿ ê chú-lâng. Lín phah-piàⁿ chò, m̄-sī ūi tio̍h beh hō͘ in hoaⁿ-hí, tio̍h sêng-sim sêng-ì lâi chò, in-ūi lín sī kèng-ùi Siōng-tè ê lô͘-po̍k.
3:23 Lín bô-lūn chò siáⁿ-mi̍h, tio̍h chīn-sim lâi chò, ná chhin-chhiūⁿ teh ho̍k-sāi Chú, m̄-sī teh ho̍k-sāi lâng.
3:24 Lín tio̍h ē kì-tit, Chú ē kā lín pò-siúⁿ, hō͘ lín tùi I tit tio̍h sán-gia̍p. Lín sī teh ho̍k-sāi Chú Ki-tok.
3:25 Chò put-gī ê lâng ē siū put-gī ê pò-èng, in-ūi Siōng-tè ēng kāng chi̍t-ê phiau-chún tùi-thāi múi chi̍t-ê lâng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。