腓立比书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
3:1 Chin-chiàⁿ ê Kong-gī
Góa ê hiaⁿ-tī chí-mōe, kiat-bóe lâi kóng, lín tio̍h khò Chú lâi hoaⁿ-hí. Góa koh siá chiahê ōe hō͘ lín, tùi góa lâi kóng bē hùi-khì, tùi lín lâi kóng khiok ū pang-chān.
3:2 Tio̍h chù-ì hit tīn káu tóng, thê-hông hiahê pháiⁿ lâng, chù-ì hiahê kian-chhî kat-lé ê lâng.
3:3 Kî-si̍t lán chiah sī chin-chiàⁿ siū kat-lé ê lâng. Lán thong-kòe Sèng Sîn lâi kèng-pài Siōng-tè, khoa-kháu kah Ki-tok I-é-su kiat-liân, bô óa-khò gōa-piáu ê lé-gî.
3:4 Nā kóng beh óa-khò lé-gî, góa mā ē; nā ū lâng siūⁿ kóng ē-tàng óa-khò lé-gî, góa koh khah ē-tàng.
3:5 Góa chhut-sì tē-peh ji̍t to̍h siū kat-lé, sī I-su-la-el lâng, sio̍k Biān-iá-mín chi-cho̍k, sī sûn-chhùi ê Hi-bú-lâi lâng; chiàu lu̍t-hoat lâi kóng, góa sī Hoa-lí-sái phài ê lâng;
3:6 Góa in-ūi kòe-thâu jia̍t-sim, soah chiâⁿ-chò pek-hāi kàu-hōe ê lâng; nā kóng chun-siú Mô͘-se lu̍t-hoat, chiū ē-tàng hō͘ lâng chheng-chò gī lâng, góa lóng bô thang hông chí-chek ê só͘-chāi.
3:7 M̄ koh, í-chêng tùi góa ū lī-ek ê, chitmá in-ūi Ki-tok ê iân-kò͘, góa lóng kā in khòaⁿ-chò sī sún-sit.
3:8 M̄-nā ánne, góa chin-chiàⁿ kā bān sū lóng khòaⁿ-chò bô lī-ek, in-ūi góa kā bat góa ê Chú Ki-tok I-é-su khòaⁿ-chò siōng pó-pòe; góa ūi tio̍h I pàng-sak it-chhè, kā hiahê lóng khòaⁿ-chò pùn-sò, sī ūi tio̍h ài beh tit tio̍h Ki-tok,
3:9 Lâi kah Ki-tok oân-choân kiat-liân. Góa m̄-sī kakī khò lu̍t-hoat lâi tit tio̍h gī; góa chitmá ū ê gī, sī tùi sìn-khò Ki-tok lâi tit tio̍h ê, sī Siōng-tè ūi tio̍h góa ê sìn só͘ siúⁿ-sù ê.
3:10 Góa só͘ ì-ài ê sī jīn-bat Ki-tok, koh thé-giām I koh-oa̍h ê koân-lêng kah I chò-hóe siū khó͘, keng-giām I ê sí,
3:11 Ǹg-bāng kakī mā ē-tàng tùi sí koh-oa̍h.
3:12 Ǹg Bo̍k-phiau Ti̍t Cháu
Án-ne m̄-sī kóng góa í-keng sêng-kong, á-.sī í-keng oân-choân; góa kè-sio̍k hiòng chêng cháu, khòaⁿ ē-tàng tit tio̍h siúⁿ á-bē. Kî-si̍t Ki-tok I-é-su í-keng tit tio̍h góa.
3:13 Hiaⁿ-tī chí-mōe, góa bô siūⁿ kóng kakī í-keng tit tio̍h siúⁿ, chí ū choan-sim chi̍t hāng, to̍h-sī bē kì-tit āu-bīn ê tāichì, tì-ì thâu-chêng ê tāichì,
3:14 Ǹg bo̍k-phiau ti̍t-ti̍t cháu, kàu tit tio̍h siúⁿ ûi-chí; to̍h-sī Siōng-tè thong-kòe Ki-tok I-é-su, tiàu góa khì niá-siū hit-ê tùi téng-bīn lâi ê oa̍h-miā.
3:15 Só͘-í, lán tiong-kan lêng-sèng sêng-se̍k ê lâng, tio̍h ū kāng-khoán ê sim-chì; lín tiong-kan nā ū bô kāng-khoán ê sim-chì, Siōng-tè mā ē ēng chit-ê tāichì kā lín khé-sī.
3:16 Bô-lūn án-chóaⁿ, lán tio̍h chiàu í-keng kiâⁿ-kòe ê lō͘-sòaⁿ kè-sio̍k kiâⁿ.
3:17 Hāu-hoat Páu-lô
Hiaⁿ-tī chí-mōe, lín tio̍h o̍h góa, goán í-keng ū chò hó bô͘-hoān hō͘ lín; lín tio̍h ha̍k-si̍p hiahê chiàu chit-ê bô͘-hoān teh kiâⁿ ê lâng.
3:18 Góa í-keng kā lín kóng chin chē pái, taⁿ góa koh lâu ba̍k-sái kā lín khó͘-khǹg, ū chin chē lâng ê hêng-ûi hō͘ in chiâⁿ-chò Ki-tok si̍p-jī-kè ê tùi-te̍k.
3:19 In ê kiat-kio̍k sī tîm-lûn, in kā in ê pak-tó͘ tòng-chò sîn-bêng, in kā kiàn-siàu khòaⁿ-chò sī êng-kng, in kantaⁿ tì-ì tē-chiūⁿ ê tāichì.
3:20 In-ūi lán sī Siōng-tè kok-tō͘ ê kok-bîn, mā teh ǹg-bāng Kiù-sè-Chú, to̍h-sī Chú I-é-su Ki-tok tùi hia lâi.
3:21 I ē ēng hō͘ bān-mi̍h khut-ho̍k ê koân-lêng lâi kái-piàn lán pi-chiān ê jio̍k-thé, hō͘ lán chiâⁿ-chò kah I kāng-khoán êng-iāu.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。