腓立比书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
2:1 Ki-tok Chò Lán ê Bô͘-hoān
Lín kah Ki-tok kiat-liân ū tit tio̍h siáⁿ-mi̍h kek-lē? Kám ū tùi I ê thiàⁿ-sim tit tio̍h an-ùi? Kám kah Sèng Sîn ū siáⁿ-mi̍h kau-thong? Kám ū thé-giām tio̍h Siōng-tè ê chû-pi kah liân-bín?
2:2 Lín tio̍h ū kāng-khoán ê sim-chì, kāng-khoán ê thiàⁿ-sim, kám-chêng hô-hâi, siūⁿ-hoat it-tì, thang hō͘ góa chhiong-móa hoaⁿ-hí.
2:3 M̄-thang chū-su chū-lī, tui-kiû hu-êng, tian-tò tio̍h ēng khiam-sùn ê sim, khòaⁿ pa̍t lâng pí kakī khah gâu.
2:4 M̄-thang kantaⁿ kò͘ kakī ê tāichì, mā tio̍h kò͘ pa̍t lâng ê tāichì.
2:5 Lín tio̍h ū Ki-tok I-é-su ê sim-chì,
2:6 Ki-tok goân-pún ū Siōng-tè ê sin-hūn, khiok bô kian-chhî tio̍h kah Siōng-tè ū pêng-téng ê tē-ūi.
2:7 I tian-tò piàⁿ khang kakī, chhú lô͘-po̍k ê sin-hūn chhut-sì chò lâng, chiâⁿ-chò lâng ê hêng-thé chhut-hiān.
2:8 I chū-goān khiam-pi, sūn-ho̍k kàu sí, sīm-chì sí tī si̍p-jī-kè téng.
2:9 Só͘-í, Siōng-tè kā I thê-seng kàu siōng koân ê tē-ūi, siúⁿ-sù I chhiau-oa̍t bān-miâ ê miâ.
2:10 In-ūi ánne, ūi tio̍h kèng-tiōng I-é-su ê miâ, thiⁿ-téng, tē-chiūⁿ kah tē-hā, só͘-ū ê kha-thâu-u lóng tio̍h kūi lo̍h-khì kèng-pài.
2:11 Só͘-ū ê chhùi lóng ē soan-pò͘ sêng-jīn " I-é-su Ki-tok sī Chú ", lâi kui êng-kng hō͘ Thiⁿ-pē Siōng-tè.
2:12 Chhin-chhiūⁿ Kng teh Chiò Sè-kan
Só͘-í, chhin-ài ê hiaⁿ-tī chí-mōe, góa tī lín hia ê sî lín lóng ū sūn-ho̍k góa; chitmá góa bô kah lín chò-hóe, lín koh khah tio̍h sūn-ho̍k. Lín tio̍h kè-sio̍k kiaⁿ-hiâⁿ phi̍h-phi̍h chhoah, phah-piàⁿ lâi oân-sêng lín kakī ê tit-kiù.
2:13 In-ūi Siōng-tè put-sî to tī lín tiong-kan teh chò-kang, hō͘ lín ū ì-goān koh ū khùi-la̍t lâi si̍t-hiān I ê hó chí-ì.
2:14 Bô-lūn chò siáⁿ-mi̍h tāichì lóng m̄ thang bâi-oàn, m̄ thang cheng-lūn.
2:15 Án-ne, lín chiū ē chheng-pe̍h sûn-kiat, tī chit-ê siâ-ok koh hú-pāi ê sè-tāi, chò chi̍t-ê bô khoat-tiám koh chin-si̍t bô ké ê lâng, chiâⁿ-chò Siōng-tè ê kiáⁿ-jî. Tio̍h tī lín tiong-kan hoat kng, chhin-chhiūⁿ kng teh chiò sè-kan, lâi kian-siú sù oa̍h-miā ê sìn-sit.
2:16 Án-ne, chiah ē-tàng hō͘ góa tī Ki-tok chài-lîm ê ji̍t ū thang khoa-kháu, in-ūi góa m̄-sī khang-khang pháu-cháu, góa só͘-ū ê lô-khó͘ lóng bô óng-hùi.
2:17 Ká-sú góa tio̍h ài lâu hoeh, lâi phoah tī lín ēng sìn-sim só͘ hiàn ê chè-mi̍h téng-bīn, góa mā hoaⁿ-hí, mā beh kah lín tāi-ke chò-hóe hoaⁿ-hí.
2:18 Lín mā tio̍h ánne lâi hoaⁿ-hí kah góa chò-hóe hoaⁿ-hí.
2:19 Tî-mó͘-theh kah Ē-pa-hu-ló-tit
Góa ǹg-bāng Chú I-é-su ē-tàng hō͘ góa kóaⁿ-kín chhe-phài Tî-mó͘-theh khì lín hia, thang hō͘ góa thiaⁿ tio̍h lín ê siau-sit lâi an góa ê sim.
2:20 Chí-ū i chi̍t lâng ū kah góa tâng-sim, koh chin-chiàⁿ koan-sim lín ê tāichì.
2:21 Chèng lâng lóng sī koan-sim kakī ê tāichì, m̄-sī koan-sim I-é-su Ki-tok ê tāichì.
2:22 M̄ koh, Tî-mó͘-theh ê chò lâng lín lóng chai, i chhin-chhiūⁿ kiáⁿ tùi lāu-pē kah góa chò-hóe lô-khó͘ lâi heng-khí hok-im.
2:23 Só͘-í, góa khòaⁿ góa ê to͘-ha̍p án-chóaⁿ, ǹg-bāng ē-tàng kóaⁿ-kín chhe i khì lín hia.
2:24 Chóng-.sī, góa khak-sìn Chú ē hō͘ góa pún-sin mā chin kín ē-tàng khì kìⁿ lín.
2:25 M̄ koh, góa siūⁿ kóng iàu-kín ê sī tio̍h chhe Ē-pa-hu-ló-tit tńg-khì lín hia. I sī góa ê hiaⁿ-tī, tâng-kang kah chiàn-iú, tī góa su-iàu ê sî lâi chi-oân pang-chān góa.
2:26 I chin siàu-liām lín tāi-ke, mā ū thiaⁿ tio̍h lín chai i phòa-pēⁿ ê tāichì, só͘-í, i ê sim chin kan-khó͘.
2:27 I khak-si̍t ū phòa-pēⁿ kah hiám-hiám-á sí-.khì. M̄ koh, Siōng-tè liân-bín i, mā ū liân-bín góa, hō͘ góa m̄-bián koh ke-thiⁿ iu-siong.
2:28 Só͘-í, góa koh khah tì-ì beh chhe i tńg-khì lín hia, hō͘ lín koh khòaⁿ tio̍h i lâi hoaⁿ-hí, mā thang kiám-chió góa ê iu-siong.
2:29 Só͘-í, lín tio̍h hoaⁿ-hoaⁿ hí-hí lâi chiap-la̍p chit ūi Chú lāi ê hiaⁿ-tī, mā tio̍h chun-tiōng chit khoán ê lâng.
2:30 In-ūi i ūi tio̍h chò Ki-tok ê kang 险 hiám sí-.khì. I kakī piàⁿ-miā chò-kang, siūⁿ beh pó͘ lín ho̍k-sāi góa bô kàu-gia̍h ê só͘-chāi.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。