以弗所书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
6:1 Pē-bú kah Kiáⁿ-jî ê Koan-hē
Chò kiáⁿ-jî ê, tio̍h sūn-ho̍k pē-bú, che sī lí-só͘-tong-jiân ê.
6:2 " Tio̍h hàu-kèng pē-bú ", che sī thâu chi̍t tiâu hù-tài tī èng-ín ê kài-bēng.
6:3 Chiū-sī kóng, Án-ne, lín chiū ē sū-sū heng-thong, tī sè-kan hióng-siū tn̂g hòe-siū. (chù, CAG 20:12; SBK 5:16)
6:4 Chò lāu-pē ê, lín m̄ thang kek kiáⁿ-jî siū-khì, tio̍h ēng Chú ê kéng-kài kah kà-sī lâi kā in pôe-ióng.
6:5 Chú-lâng kah Lô͘-po̍k ê Koan-hē
Chò lô͘-po̍k ê, lín tio̍h kah sūn-ho̍k Ki-tok kāng-khoán, ēng kiaⁿ-hiâⁿ kah sêng-si̍t ê sim, sūn-ho̍k lín tī sè-kan ê chú-lâng.
6:6 M̄-thang tī lâng ê bīn-chêng chò hō͘ lâng khòaⁿ, hō͘ lâng hoaⁿ-hí; tio̍h chhin-chhiūⁿ chò Ki-tok ê lô͘-po̍k, chun-chiàu Siōng-tè ê chí-ì, sêng-sim sêng-ì lâi chò.
6:7 Tio̍h kam-sim lo̍k-ì chīn lô͘-po̍k ê pún-hūn, chhin-chhiūⁿ teh ho̍k-sāi Chú, m̄-sī teh ho̍k-sāi lâng.
6:8 Lín tio̍h chai, bô-lūn chò lô͘-po̍k á-.sī chū-iû ê lâng, Chú lóng ē chiàu ta̍k lâng ê kiâⁿ-ta̍h lâi kā in pò-siúⁿ.
6:9 Chò chú-lâng ê mā tio̍h ánne khoán-thāi lô͘-po̍k, m̄ thang kā in tōa-siaⁿ khióng-hat. Lín tio̍h chai, in kah lín lóng sio̍k kāng chi̍t-ūi thiⁿ-téng ê Chú. Chú ēng kāng-khoán ê thài-tō͘ tùi-thāi múi chi̍t-ê lâng.
6:10 Siōng-tè Só͘ Sù Choân-thò ê Bú-chong
Chòe-āu, góa khó͘-khǹg lín tio̍h kah Chú kiat-liân, khò I koân-lêng ê khùi-la̍t lâi chiâⁿ-chò kian-kiông ê lâng.
6:11 Tio̍h chhēng Siōng-tè só͘ sù choân-hù ê chiàn-kah, hō͘ lín ē-tàng khiā chāi, lâi tí-khòng Mô͘-kúi-ê kúi-kè.
6:12 In-ūi lán m̄-sī kah hia̍t-khì ê lâng kau-chiàn, lán ê tùi-te̍k sī thian-kài ê siâ-lêng, to̍h-sī chit-ê o͘-àm sè-tāi ê ú-tiū ê koân-lêng chiá, chip-chèng-chiá, chiáng-koân-chiá.
6:13 Só͘-í, tio̍h chhēng Siōng-tè só͘ sù choân-hù ê chiàn-kah, thang tī siâ-ok ê ji̍t-chí ē-tàng tí-khòng tùi-te̍k ê kong-kek, chiàn-tàu kàu-té, khiā chāi siú-tiâu tīn-tē.
6:14 Só͘-í, lín tio̍h khiā ho͘ chāi, ēng chin-lí chò io-tòa lâi hâ, ēng chèng-gī chò chiàn-kah lâi chhēng,
6:15 Ēng sûi-sî soan-iông hô-pêng ê hok-im chò ê lâi chhēng.
6:16 Tio̍h put-sî ēng sìn-sim chò tîn-pâi, chiah ē-tàng phah-bia̍t siâ-ok chiá ê hóe-chìⁿ.
6:17 Koh tio̍h ēng chín-kiù chò thâu-khoe, ēng Sèng Sîn — to̍h-sī Siōng-tè ê ōe chò kiàm.
6:18 Tio̍h khò Sèng Sîn choân-sim kî-tó, tiāⁿtiāⁿ khún-kiû. Tio̍h put-sî kéng-séng, sî-siông ūi tio̍h só͘-ū ê sìn-tô͘ kî-tó.
6:19 Mā chhiáⁿ ūi tio̍h góa kî-tó, kiû Siōng-tè sù góa sìn-sit, thang hó-táⁿ khui chhùi soan-káng hok-im ê ò-pì.
6:20 Ūi tio̍h chit-ê hok-im, góa chitmá tī kaⁿ-.ni̍h chò chi̍t-ê kòa thih-liān ê tāi-sài, chhiáⁿ lí mā tio̍h ūi góa khún-kiû Siōng-tè, sù góa ē-tàng hó-táⁿ lâi soan-iông góa eng-kai kóng ê sìn-sit.
6:21 Chòe-āu ê Chhéng-an
Lán só͘ thiàⁿ ê hiaⁿ-tī, mā sī tiong-si̍t ê chhe-ēng — Tu-khi-kó͘, ē kā lín pò-kò góa ê tāichì kah góa ê kīn-hóng.
6:22 Ūi tio̍h ánne, góa chhe i khì lín hia, sī beh pò lín chai goán ê tāichì, thang hō͘ lín an-sim.
6:23 Goān Thiⁿ-pē Siōng-tè kah Chú I-é-su Ki-tok sù pêng-an, thiàⁿ-sim kah sìn-sim hō͘ chèng hiaⁿ-tī chí-mōe!
6:24 Goān Siōng-tè ê un-tián kah só͘-ū ēng bē piàn ê thiàⁿ-sim lâi thiàⁿ Chú I-é-su Ki-tok ê lâng tông-chāi!
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。