以弗所书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
5:1 Tī Kng-bêng Tiong Seng-oa̍h
Lín kì-jiân chò Siōng-tè só͘ thiàⁿ ê kiáⁿ-jî, tio̍h o̍h Siōng-tè.
5:2 Kiâⁿ-ta̍h mā tio̍h ū thiàⁿ-sim, chhin-chhiūⁿ Ki-tok bat thiàⁿ lán, ūi tio̍h lán hi-seng kakī ê sèⁿ-miā, chiâⁿ-chò phang-phang ê chè-mi̍h hiàn hō͘ Siōng-tè.
5:3 Lín kì-jiân sī Siōng-tè ê chú-bîn, kan-îm kah it-chhè ê ù-òe á-.sī tham-sim, tī lín tiong-kan liân kóng-khí to m̄ thang.
5:4 M̄-thang kóng kiàn-siàu kah siâ-îm, á-.sī hā-liû ê ōe, tian-tò tio̍h kóng kám-siā Siōng-tè ê ōe.
5:5 Lín khak-si̍t chai, îm-loān, ù-òe á-.sī tham-loân ( Che sī chi̍t chióng ngó͘-siōng chông-pài ) ê lâng, lóng bē tàng chiâⁿ-chò Ki-tok kah Siōng-tè kok-tō͘ ê chú-bîn.
5:6 Chiâⁿ-chò Kng-bêng ê Kiáⁿ-jî
M̄-thang hō͘ lâng ēng hi-ké ê ōe khi-phiàn, in-ūi Siōng-tè ê siū-khì ē ūi tio̍h chiahê tāichì lîm-kàu tī hiahê pōe-ge̍k ê lâng.
5:7 Só͘-í, lín m̄ thang kah hit khoán lâng lâi-óng.
5:8 In-ūi lín kòe-khì tī o͘-àm tiong, m̄ koh, taⁿ lín chiâⁿ-chò sio̍k Chú ê lâng, sī tī kng-bêng tiong, kiâⁿ-ta̍h tio̍h chiàu kng-bêng ê lâng ê khoán-sit.
5:9 Kng-bêng só͘ kiat ê kóe-chí to̍h-sī liông-siān, kong-gī kah chin-lí.
5:10 Tio̍h bêng-chhat siáⁿ-mi̍h sī Chú só͘ hoaⁿ-hí ê tāichì.
5:11 M̄-thang chham-ú tī o͘-àm tiong teh chò ê bô lō͘-ēng ê tāichì, tian-tò tio̍h kā in chek-pī.
5:12 In am-am khàm-khàm teh chò ê tāichì, liân kóng to kiàn-siàu!
5:13 It-chhè nā ē siū chek-pī ê tāichì, chiū ē hō͘ kng hián-bêng chhut-.lâi, in-ūi hō͘ kng pō-lō͘ chiū ē hián-bêng.
5:14 Só͘-í, ū chi̍t kù ōe ánne kóng, Teh khùn ê lâng tio̍h chhéⁿ, (chù, ISI 26:19; 51:17; 52:1; 60:1) tùi sí-lâng tiong peh khí-.lâi! (chù, ISI 26:19) Ki-tok beh kā lí chiò-kng. (chù, ISI 60:1)
5:15 Hō͘ Sèng Sîn Chhiong-móa
Só͘-í, lín tio̍h chim-chiok khòaⁿ lín ê kiâⁿ-ta̍h, m̄ thang chò bô tì-sek ê lâng, tio̍h chò chhong-bêng ê lâng.
5:16 Tio̍h pá-ak ki-hōe, in-ūi hiān-kim sī siâ-ok ê sè-tāi.
5:17 Só͘-í, m̄ thang chò gōng lâng, tio̍h bêng-pe̍k siáⁿ-mi̍h sī Chú ê chí-ì.
5:18 Mā m̄ thang chiú-chùi, in-ūi chiú-chùi ē tì-kàu pāi-hoāi; tian-tò tio̍h hō͘ Sèng Sîn kā lín chhiong-móa.
5:19 Tio̍h ēng Si-phian, ēng Sèng-si, ēng lêng koa, hō͘-siong tùi-chhiùⁿ, tio̍h tùi sim-té chhiùⁿ Sèng-si kah Si-phian lâi oló Chú.
5:20 Tio̍h khò lán ê Chú I-é-su Ki-tok ê miâ, ūi tio̍h ta̍k hāng tāichì sî-siông lâi kám-siā Thiⁿ-pē Siōng-tè.
5:21 Hu-chhe ê Koan-hē
Lín tio̍h ēng kèng-ùi Ki-tok ê sim lâi hō͘-siōng sūn-ho̍k.
5:22 Chò hū-jîn-lâng ê, tio̍h chhin-chhiūⁿ sūn-ho̍k Chú ánne lâi sūn-ho̍k kakī ê tiōng-hu.
5:23 In-ūi tiōng-hu sī hū-jîn-lâng ê thâu, chhin-chhiūⁿ Ki-tok chò kàu-hōe ê thâu. Ki-tok pún-sin mā sī kàu-hōe ê Kiù-chú, kàu-hōe to̍h-sī I ê thé.
5:24 Chhin-chhiūⁿ kàu-hōe sūn-ho̍k Ki-tok, chò hū-jîn-lâng ê mā tio̍h sū-sū ánne sūn-ho̍k tiōng-hu.
5:25 Chò tiōng-hu ê, tio̍h thiàⁿ lín ê hū-jîn-lâng, chhin-chhiūⁿ Ki-tok thiàⁿ kàu-hōe, mā ūi tio̍h kàu-hōe hi-seng kakī.
5:26 Án-ne chò sī beh thong-kòe I ê ōe, ēng chúi sé chheng-khì lâi sèng-hòa kàu-hōe, kui hō͘ Siōng-tè,
5:27 Hō͘ kàu-hōe ū êng-kng, bô ù-tiám, bô jiâu-bûn á-.sī kî-tha khoat-tiám, chiâⁿ chò sèng-kiat bô khoat-tiám lâi hiàn hō͘ Chú kakī.
5:28 Siāng khoán, tiōng-hu tio̍h thiàⁿ kakī ê hū-jîn-lâng chhin-chhiūⁿ thiàⁿ kakī ê seng-khu; thiàⁿ kakī ê hū-jîn-lâng to̍h-sī thiàⁿ kakī.
5:29 Bô lâng ē oàn-hūn kakī ê seng-khu, tian-tò ē kā i pó-sioh chiàu-kò͘ kah Ki-tok tùi-thāi kàu-hōe kāng-khoán;
5:30 In-ūi lán sī Ki-tok seng-khu ê pah-thé.
5:31 Keng-tián kóng, " In-ūi ánne, lâng beh lī-khui pē-bú kah i ê bó͘ kiat-liân, nn̄g lâng chiâⁿ-chò chi̍t thé. " (chù, CSK 2:24)
5:32 Chit-tōaⁿ keng-bûn khé-sī chi̍t-ê ke̍k tōa ê ò-pì. Chiàu góa ê liáu-kái, che sī teh chí Ki-tok kah kàu-hōe ê koan-hē.
5:33 Chóng-.sī, che mā sek-iōng tī lín ta̍k lâng. Tiōng-hu tio̍h thiàⁿ i ê hū-jîn-lâng chhin-chhiūⁿ kakī; hū-jîn-lâng mā tio̍h kèng-ùi i ê tiōng-hu.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。