以弗所书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
4:1 Kàu-hōe ê Ha̍p-it
Chò chi̍t-ê ūi tio̍h Chú chò siû-hoān ê lâng, góa khó͘-khǹg lín chò tāichì tio̍h hû-ha̍p Siōng-tè ê ho͘-tiàu.
4:2 Hoân-sū tio̍h khiam-pi, un-jiû, jím-nāi, ēng thiàⁿ-sim hō͘-siong khoan-iông,
4:3 Ēng hô-pêng hō͘-siōng kiat-liân, chīn-la̍t pó-chhî Sèng Sîn só͘ sù hō͘ lín ê ha̍p-it.
4:4 Seng-khu chí ū chi̍t-ê, Sèng Sîn chí ū chi̍t-ê, tú chhin-chhiūⁿ Siōng-tè ho͘-tiàu lán lâi tit tio̍h ê ǹg-bāng mā sī chi̍t-ê.
4:5 Chú chí ū chi̍t-ê, sìn-gióng chí ū chi̍t-ê, sé-lé mā chí ū chi̍t-ê.
4:6 Siōng-tè chí ū chi̍t-ê, I chò jîn-lūi chèng lâng ê Thiⁿ-pē; I tī ú-tiū ê tiong-kan, koàn-chhoàn bān-mi̍h, koán-hat it-chhè.
4:7 Chóng-.sī, lán ta̍k lâng lóng chiàu Ki-tok só͘ un-sù hō͘ lán ê hūn-gia̍h lâi niá-siū.
4:8 Chiàu keng-tián só͘ kóng, I seng khì-kàu siōng koân ê thiⁿ-téng, tòa hiahê siū lia̍h ê chò-hóe khì, mā siúⁿ-sù un-tián hō͘ lâng. (chù, SPh 68:18)
4:9 " I seng koân " Kám m̄-sī teh kóng I bat kàng lo̍h-khì tē-hā?
4:10 Án-ne, " Kàng-lo̍h "ê hit ūi to̍h-sī " Seng-koân " kàu thiⁿ-téng ê hit ūi, thang lâi chhiong-móa ú-tiū bān-mi̍h.
4:11 Siōng-tè siúⁿ-sù hō͘ lâng ê, ū sù-tô͘, ū sian-ti, ū thoân hok-im ê, ū bo̍k-chiá kah kàu-su.
4:12 Án-ne chò sī beh chong-pī Siōng-tè ê chú-bîn, thang lâi chò chhe-ēng ê kang, khí-chō Ki-tok ê seng-khu.
4:13 Chòe-āu, lán lóng thang tùi Siōng-tè ê Kiáⁿ ū it-tì ê sìn-gióng kah jīn-bat, chiâⁿ-chò chi̍t-ê oân-choân ê lâng, hō͘ Ki-tok chhiong-móa-lâi tióng-tōa sêng-jîn, ta̍t-kàu Ki-tok ê oân-choân kéng-kài.
4:14 Án-ne, lán bô koh-chài sī gín'á, bē koh hō͘ ta̍k chióng kàu-gī ê hong iô-tāng phiau-liû, tiòng tio̍h lâng ê kúi-kè kah môa-phiàn, tì-sú hō͘ lâng ín-iú khì.
4:15 Lán tian-tò tio̍h ēng thiàⁿ-sim kóng sêng-si̍t-ōe, ta̍k hong-bīn lóng o̍h Ki-tok ê bô͘-iūⁿ lâi chiām-chiām sêng-tióng, in-ūi Ki-tok sī lán ê thâu.
4:16 Thong-kòe Ki-tok, kui seng-khu ê kok ki-thé kiat-ha̍p khí-.lâi, hō͘-siong chiap-èng, hoat-hui kok ki-thé ê kong-lêng, hō͘ seng-khu ná tióng-tōa, koh ēng thiàⁿ-sim lâi khí-chō kakī.
4:17 Ki-tok hō͘ Lán Chiâⁿ-chò Sin Lâng
Só͘-í, góa hōng Chú ê miâ khó͘-khǹg lín, m̄ thang koh-chài kè-sio̍k kòe gōa-pang lâng hit khoán ê seng-oa̍h. In ê su-sióng khang-hi koh hàm-kó͘,
4:18 In ê sim-su o͘-àm, keh-tn̄g Siōng-tè siúⁿ-sù ê oa̍h-miā, in-ūi in lóng bû-ti iū-koh kò͘-chi̍p.
4:19 In sòng-sit liông-sim, chiū hòng-chhiòng kakī ê su-io̍k, koh tham-loân ta̍k chióng ù-òe ê hêng-ûi.
4:20 M̄ koh, lín pēng m̄-sī ánne teh ha̍k-si̍p Ki-tok.
4:21 Lín eng-kai ū thiaⁿ-kòe Ki-tok ê tāichì, koh ū ha̍k-si̍p I ê kà-sī; I-é-su pún-sin to̍h-sī chin-lí.
4:22 Án-ne, lín tio̍h thoat-lī í-chêng ê seng-oa̍h, thǹg-khì kū ê lâng, kā kū ê" Góa " Ōaⁿ sin; kū ê" Góa " In-ūi su-io̍k ê ín-iú í-keng teh pāi-hoāi.
4:23 Lín ê sim-su ì-liām mā tio̍h ōaⁿ sin,
4:24 Tio̍h chiâⁿ-chò sin ê lâng, to̍h-sī chiàu Siōng-tè ēng chin-lí só͘ 产 seⁿ ê kong-gī kah sèng-kiat lâi chhòng-chō ê sin lâng.
4:25 Só͘-í, lín tio̍h tû-khì pe̍h-chha̍t, ta̍k lâng kah i ê chhù-piⁿ kóng sêng-si̍t-ōe, (chù, CKL 8:16)In-ūi lán lóng sī Ki-tok ê ki-thé.
4:26 Lín ê siū-khì m̄ thang tì-sú hoān chōe. (chù, SPh 4:4) M̄-thang siū-khì-kàu ji̍t lo̍h iáu-bōe soah,
4:27 Mā m̄ thang hō͘ Mô͘-kúi ū khang-phāng thang ji̍p.
4:28 Bat chò-chha̍t ê m̄ thang koh thau-the̍h, tio̍h lô-khó͘ chò-kang lâi tit tio̍h chèng-tong ê siu-ji̍p, chiah ē-tàng pang-chān khiàm-khoeh ê lâng.
4:29 M̄-thang kóng pháiⁿ ōe, tian-tò tio̍h kóng ē chō-chiū lâng ê hó ōe, hō͘ thiaⁿ-.tio̍h ê lâng tit tio̍h lī-ek.
4:30 Mā m̄ thang hō͘ Siōng-tè ê Sèng Sîn iu-siong, in-ūi Sèng Sîn sī Siōng-tè ê ìn-kì, pó-chèng lín ē tī chín-kiù ê ji̍t tit tio̍h tháu-pàng.
4:31 Tio̍h tû-khì lín tiong-kan só͘-ū ê khó͘-to̍k, oàn-hūn, siū-khì, pháiⁿ sèng-tē, húi-pòng kah it-chhè ê ok-to̍k.
4:32 Koh tio̍h ēng jîn-chû hō͘-siōng khoán-thāi, chûn liân-bín ê sim, tāi-ke hō͘-siōng sià-bián, tú chhin-chhiūⁿ Siōng-tè thong-kòe Ki-tok bat kā lín sià-bián kāng-khoán.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。