加拉太书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
6:1 Hun-tam Pa̍t lâng ê Tāng tàⁿ
Hiaⁿ-tī chí-mōe, nā ū lâng bô tiuⁿ-tî hām-lo̍h kòe-sit, lín sio̍k-lêng ê lâng tio̍h ēng un-jiû ê sim kā i kiù-chèng. Lín kakī mā tio̍h sió-sim, chiah bē siū ín-iú.
6:2 Lín tio̍h hō͘-siong hun-tam tāng-tàⁿ, ánne chò chiah sī teh si̍t-hiān Ki-tok ê kà-sī.
6:3 Bô siáⁿ châi-lêng koh siūⁿ kóng kakī chin gâu ê lâng, sī teh khi-phiàn kakī.
6:4 Ta̍k lâng lóng tio̍h séng-chhat kakī ê hêng-ûi; nā ū hó hêng-ûi, kantaⁿ thang tùi kakī khoa-kháu, bô su-iàu kah pa̍t lâng pí-phēng.
6:5 In-ūi ta̍k lâng ê tàⁿ tio̍h kakī taⁿ.
6:6 Ha̍k-si̍p tō-lí ê lâng, tio̍h kā ta̍k hāng hó mi̍h kah kà-sī i ê lâng chò-hóe hun-hióng.
6:7 M̄-thang khi-phiàn kakī, Siōng-tè sī bē tàng bú-jio̍k ê. Lâng ē chiàu i só͘ iā ê chéng lâi siu-sêng.
6:8 Ūi tio̍h boán-chiok kakī ê jio̍k-thé lâi iā chéng ê lâng, i ê siu-sêng to̍h-sī jio̍k-thé ê pāi-hoāi; ūi tio̍h hō͘ Sèng Sîn hoaⁿ-hí lâi iā chéng ê lâng, chiū ē tùi Sèng Sîn lâi siu-sêng éng-oán ê oa̍h-miā.
6:9 Chò hó sū m̄ thang sit-chì, in-ūi nā bô tiong-kan tn̄g-chām, sî kàu chiū ē ū siu-sêng.
6:10 Só͘-í, lán tio̍h pá-ak ki-hōe lâi tùi chèng lâng chò hó sū, iû-kî-sī tùi hiahê tùi sìn chiâⁿ-chò chi̍t ke ê lâng koh khah tio̍h tì-ì.
6:11 Kiat-bóe ê Chhéng-an
Lín khòaⁿ, góa chhin-pit ēng chiah tōa ê jī siá phoe hō͘ lín!
6:12 Hiahê tī gōa-piáu chng thé-bīn ê lâng, in siūⁿ beh bián-kióng lín chiap siū kat-lé. In ánne chò, kantaⁿ sī bô ài ūi tio̍h Ki-tok ê si̍p-jī-kè lâi siū pek-hāi.
6:13 Kî-si̍t liân hiahê siū kat-lé ê lâng mā bô lóng siú lu̍t-hoat. In ài lín chiap siū kat-lé, chiah ē-tàng khoa-kháu kóng lín ū chun-siú gōa-piáu ê lé-gî.
6:14 Nā-sī góa, góa it-tēng kantaⁿ beh khoa-kháu lán ê Chú I-é-su Ki-tok ê si̍p-jī-kè. In-ūi tùi góa lâi kóng, sè-kan í-keng tèng-sí tī si̍p-jī-kè; tùi sè-kan lâi kóng, góa mā í-keng tèng-sí tī si̍p-jī-kè.
6:15 Ū siū kat-lé kah bô siū kat-lé lóng bô iàu-kín, iàu-kín ê sī lán tio̍h chiâⁿ-chò sin chhòng-chō ê lâng.
6:16 Chiàu chit-ê chún-chek lâi seng-oa̍h ê lâng to̍h-sī Siōng-tè ê chú-bîn, goān pêng-an í-ki̍p liân-bín kah lín tông-chāi!
6:17 Tùi taⁿ í-āu, bô-lūn siáⁿ-mi̍h lâng lóng m̄ thang kā góa kiáu-jiáu, in-ūi góa ê seng-khu ū tòa I-é-su ê siong-jiah, chèng-bêng góa sī I ê lô͘-po̍k.
6:18 Hiaⁿ-tī chí-mōe, goān lán ê Chú I-é-su Ki-tok ê un-tián kah lín tông-chāi! A-men!
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。