加拉太书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
1:1 Chhéng-an
Góa sī sù-tô͘ Páu-lô, góa chò sù-tô͘ m̄-sī thong-kòe lâng, mā m̄-sī tùi lâng, sī tùi I-é-su Ki-tok kah hō͘ I tùi sí-lâng tiong koh-oa̍h ê Thiⁿ-pē Siōng-tè ê ho͘-tiàu.
1:2 Góa kah tī chia ê hiaⁿ-tī chí-mōe siá phoe hō͘ Ga-la̍h-tia ê chèng kàu-hōe.
1:3 Goān lán ê Thiⁿ-pē Siōng-tè kah Chú I-é-su Ki-tok sù lín un-tián kah pêng-an.
1:4 Ūi tio̍h beh chín-kiù lán thoat-lī hiān-kim siâ-ok ê sè-tāi, Ki-tok ū chiàu lán ê Thiⁿ-pē Siōng-tè ê chí-ì lâi hiàn I pún-sin.
1:5 Goān êng-kng kui hō͘ Siōng-tè, it-ti̍t kàu éng-éng oán-oán. A-men!
1:6 Hok-im Tùi Ga-la̍h-tia ê Thiau-chiàn
Góa chin tio̍h-kiaⁿ, lín kèng-jiân hiah kín to̍h khì-sak hit ūi thong-kòe Ki-tok ê un-tián lâi ho͘-tiàu lín ê Siōng-tè, khì sìn pa̍t khoán ê hok-im.
1:7 Kî-si̍t bô pa̍t khoán ê hok-im, góa ánne kóng sī in-ūi ū lâng kā lín kiáu-jiáu, siūⁿ beh khiok-kái Ki-tok ê hok-im.
1:8 Bô-lūn sī goán á-.sī tùi thiⁿ-téng lâi ê thiⁿ-sài, nā só͘ thoân ê hok-im kah goán í-chêng só͘ thoân hō͘ lín ê hok-im bô kāng-khoán, hit-ê lâng tio̍h siū chiù-chó͘.
1:9 Góa í-chêng bat kóng kòe, taⁿ góa koh kóng chi̍t pái, nā ū lâng thoân hō͘ lín ê hok-im kah lín í-keng chiap-siū ê bô kāng-khoán, hit-ê lâng tio̍h siū chiù-chó͘.
1:10 Páu-lô ê Léng-tō
Góa ánne kóng, kám sī siūⁿ beh tit tio̍h lâng ê oló? M̄-sī, sī beh tit tio̍h Siōng-tè ê oló; góa kám teh kiû hō͘ lâng hoaⁿ-hí? Góa nā iáu koh ài hō͘ lâng hoaⁿ-hí, góa chiū m̄-sī Ki-tok ê lô͘-po̍k.
1:11 Páu-lô Chiâⁿ-chò Sù-tô͘
Hiaⁿ-tī chí-mōe, góa ài lín chai, góa só͘ thoân ê hok-im m̄-sī chiàu lâng ê ì-sù.
1:12 Chit-ê hok-im m̄-sī tùi lâng niá-siū, mā bô siū lâng kà-sī, sī tùi I-é-su Ki-tok lâi ê khé-sī.
1:13 Lín bat thiaⁿ tio̍h góa í-chêng chò Iô-tá-iah kàu-tô͘ ê hêng-ûi, to̍h-sī pek-hāi Siōng-tè ê kàu-hōe chin thiám, siūⁿ beh thiat-té kā i phò-hoāi.
1:14 Góa pí kâng chi̍t pòe ê Iô-tá-iah lâng koh khah chun-siú kàu-kui, koh khah jia̍t-sim chun-siú chó͘-sian ê thoân-thóng.
1:15 M̄ koh, tùi Siōng-tè ê un-tián, góa iáu-bōe chhut-sì I to̍h kéng-soán góa,
1:16 Tùi góa khé-sī I ê Kiáⁿ, hō͘ góa thang tùi gōa-pang lâng soan-iông I ê Kiáⁿ ê hok-im. Hit sî, góa lóng bô khì chhéng-kàu jīm-hô lâng,
1:17 Mā bô chiūⁿ Ê-lú-sa-lèm khì kìⁿ hiahê pí góa khah tāi-seng chò sù-tô͘ ê lâng; chí ū sûi-sî khì A-la-puh, jiân-āu koh tńg-lâi Ta-má-su-ko.
1:18 Saⁿ nî āu, góa chiah-khì Ê-lú-sa-lèm pài-hóng Piat-tò͘ kah i tòa cha̍p-gō͘ ji̍t.
1:19 Chú ê hiaⁿ-tī Iâ-kop í-gōa, góa lóng bô kìⁿ-kòe kî-tha ê sù-tô͘.
1:20 Góa só͘ siá ê lóng sī sū-si̍t; tī Siōng-tè ê bīn-chêng góa bô kóng pe̍h-chha̍t.
1:21 Āu-lâi, góa khì Su-lī-a kah Ki-lí-kiah ê ta̍k só͘-chāi.
1:22 Hit sî, sio̍k Iô-tá-iah tē-khu chèng kàu-hōe ê sìn-tô͘ lóng m̄ bat góa.
1:23 In kantaⁿ thiaⁿ lâng kóng, " Í-chêng pek-hāi lán ê lâng, taⁿ teh thoân i kòe-khì siūⁿ beh húi-bia̍t ê sìn-gióng! "
1:24 In chiū in-ūi góa ê iân-kò͘, kui êng-kng hō͘ Siōng-tè.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。