哥林多前书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
11:1 Lín tio̍h o̍h góa, chhin-chhiūⁿ góa o̍h I-é-su Ki-tok.
11:2 Tà Thâu-kin ê Kui-tēng
Góa tio̍h kā lín oló, in-ūi lín put-sî ē kì-tit góa, koh chun-siú góa thoân hō͘ lín ê kà-sī.
11:3 Chóng-.sī, góa ài lín bêng-pe̍k, Ki-tok sī só͘-ū chapo͘ lâng ê thâu, chapo͘ lâng sī chabó͘ lâng ê thâu, Siōng-tè sī Ki-tok ê thâu.
11:4 Cha-po͘ lâng tī kong-kiōng tiûⁿ-só͘ kî-tó á-.sī thoân hok-im ê sî, nā tà thâu-kin to̍h-sī teh bú-jio̍k i ê thâu Ki-tok.
11:5 M̄ koh, chabó͘ lâng tī kî-tó á-.sī thoân hok-im ê sî, nā bô tà thâu-kin to̍h-sī teh bú-jio̍k i kakī ê thâu, to̍h-sī i ê tiōng-hu, chit khoán ê chabó͘ lâng kah thâu-mn̂g hō͘ lâng thì khí-.lâi ê chabó͘ lâng kāng-khoán.
11:6 In-ūi chabó͘ lâng nā bô tà thâu-kin, thâu-mn̂g tio̍h chián khí-.lâi; kì-jiân kā chián thâu-mn̂g á-.sī thì thâu-mn̂g khòaⁿ-chò kiàn-siàu, ánne chiū tio̍h tà thâu-kin khah hó.
11:7 Cha-po͘ lâng bô eng-kai tà thâu-kin, in-ūi i sī Siōng-tè ê hêng-siōng kah êng-kng; m̄ koh, chabó͘ lâng sī chapo͘ lâng ê êng-kng.
11:8 In-ūi chapo͘ lâng m̄-sī tùi chabó͘ lâng chō chhut-.lâi, to̍k-to̍k chabó͘ lâng sī tùi chapo͘ lâng chō chhut-.lâi ê.
11:9 Cha-po͘ lâng m̄-sī ūi tio̍h chabó͘ lâng chiah chhòng-chō ê, sī chabó͘ lâng ūi tio̍h chapo͘ lâng lâi chhòng-chō ê.
11:10 Só͘-í, chabó͘ lâng ê thâu tio̍h tà thâu-kin, lâi piáu-sī tùi koân-ui khut-ho̍k ê kì-hō, mā sī ūi tio̍h kèng-ùi thiⁿ-sài ê iân-kò͘.
11:11 Chóng-.sī, tī Chú ê lāi-bīn, chapo͘ lâng su-iàu chabó͘ lâng, chabó͘ lâng mā su-iàu chapo͘ lâng.
11:12 In-ūi chabó͘ lâng sī tùi chapo͘ lâng chō chhut-.lâi ê, chapo͘ lâng mā sī tùi chabó͘ lâng seⁿ ê; to̍k-to̍k bān-mi̍h lóng sī tùi Siōng-tè chō chhut-.lâi ê.
11:13 Lín tio̍h kakī phòaⁿ-toàn, chabó͘ lâng bô tà thâu-kin lâi tùi Siōng-tè kî-tó, kám ū sek-ha̍p?
11:14 Chiàu lâng ê pún-sèng, lâu tn̂g-thâu-mn̂g sī chapo͘ lâng ê kiàn-siàu.
11:15 M̄ koh, chabó͘ lâng lâu tn̂g-thâu-mn̂g sī i ê êng-kng, in-ūi tn̂g-thâu-mn̂g thang chò i ê jia-phè.
11:16 Nā ū lâng siūⁿ beh piān-pok, góa chí ū ē-tàng kóng, kantaⁿ tī goán kah Siōng-tè ê kàu-hōe ū chit khoán kui-kú.
11:17 Chú ê Boán-chhan
Taⁿ góa beh kā lín chí-sī ē-bīn chiahê ōe, m̄-sī beh kā lín oló, in-ūi lín ê chū-hōe si̍t-chāi sī iú-sún bû-ek.
11:18 Tē it, góa thiaⁿ-kóng lín chū-hōe ê sî ū kiat-tóng hun-phài, góa siong-sìn che ū chi̍t-pō͘-hūn sī sū-si̍t.
11:19 Lín tiong-kan lân-bián ū bô kāng ê ì-kiàn, ánne chiah khòaⁿ ē-chhut siáⁿ lâng ê ì-kiàn khah chèng-khak.
11:20 Lín chū-hōe ê sî, pēng m̄-sī teh chia̍h Chú ê boán-chhan.
11:21 In-ūi lín ta̍k lâng lóng kóaⁿ-kín teh chia̍h kakī tòa-.lâi ê mi̍h, kiat-kó ū lâng pak-tó͘ iau, ū lâng chiú-chùi.
11:22 Lín tòa chhù-.ni̍h kám bē tàng lim-chia̍h? Lín sī teh khòaⁿ-khin Siōng-tè ê kàu-hōe, mā beh hō͘ bô thang lim-chia̍h ê lâng kiàn-siàu, sī-.bô? Góa tio̍h tùi lín án-chóaⁿ kóng? Tùi chit-hāng tāichì, góa bô beh kā lín oló.
11:23 Góa tùi Chú só͘ niá-siū ê, góa mā thoân hō͘ lín, to̍h-sī Chú I-é-su hō͘ lâng chhut-bē hit mê ū the̍h piáⁿ,
11:24 Kám-siā Siōng-tè liáu-āu, kā piáⁿ peh-khui, kóng, " Chit-ê sī góa ê seng-khu, ūi tio̍h lín hi-seng ê, lín tio̍h chiàu ánne lâi kì-liām góa. "
11:25 Chia̍h liáu-āu koh phâng poe, kóng, " Chit-ê poe sī sin ê iok, sī ēng góa ê hoeh siat-li̍p ê, lín ta̍k pái lim ê sî, tio̍h chiàu ánne lâi kì-liām góa. "
11:26 Án-ne, lín ta̍k pái chia̍h chit-ê piáⁿ, lim chit-ê poe ê sî, sī teh piáu-bêng Chú ê sí, it-ti̍t kàu I koh-chài-lîm.
11:27 Só͘-í, nā bô ēng kèng-khiân ê sim lâi chia̍h Chú ê piáⁿ, lim Chú ê poe, sī bô ha̍p-gî ê, sī teh siat-to̍k Chú ê seng-khu kah hoeh.
11:28 Ta̍k lâng tio̍h séng-chhat kakī, chiah thang chia̍h chit-ê piáⁿ, lim chit-ê poe.
11:29 Lâng nā bô chheng-chhó chia̍h piáⁿ lim poe kah Chú seng-khu ê koan-hē, ánne, chia̍h chit-ê piáⁿ, lim chit-ê poe, to̍h-sī kakī teh jiá-lâi sím-phòaⁿ.
11:30 In-ūi ánne, lín chiah ē ū chin chē lâng soe-lám kah phòa-pēⁿ, mā bē chió lâng sí-.khì.
11:31 Lán nā seng séng-chhat kakī, chiū bē tì-sú siū sím-phòaⁿ.
11:32 Chóng-.sī, lán siū Chú sím-phòaⁿ sī teh hō͘ Chú kā lán kéng-kài, chiah m̄-bián kah sè-kan lâng chò-hóe siū tēng chōe.
11:33 Só͘-í, góa ê hiaⁿ-tī chí-mōe, lín chū-chi̍p beh chia̍h Chú ê boán-chhan ê sî, tio̍h hō͘-siong thèng-hāu.
11:34 Nā ū lâng iau, tio̍h tī chhù-.ni̍h seng chia̍h, chiah bián-tit chū-hōe ê sî soah piàn-chò siū Siōng-tè sím-phòaⁿ. Kî-tha ê tāichì, tán góa khì lín hia ê sî chiah lâi kái-koat.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。