哥林多前书 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 福州话 粤语和合本 希腊文(WH-NT) 下载档案 关于语音圣经
5:1 Bīn-tùi Kàu-hōe Tiong ê Îm-loān
Góa khak-si̍t thiaⁿ tio̍h lín tiong-kan ū îm-loān ê tāichì, to̍h-sī ū lâng siu-liû āu-bó chò bó͘, hit khoán ê îm-loān liân kàu-hōe gōa mā bô.
5:2 Lín ná ē iáu teh kiau-ngō͘ chū-tōa? Kèng-jiân bô kám-kak ai-siong, bô kā chò chit khoán tāichì ê lâng tùi lín tiong-kan kóaⁿ chhut-.khì!
5:3 Góa lâng sûi-jiân bô tī lín hia, sim khiok kah lín chò-hóe. Góa í-keng hōng Chú I-é-su ê miâ, kā hoān chit khoán chōe ê lâng phòaⁿ-chōe;
5:4 Chiū-sī lín chū-hōe ê sî, góa ê sim-sîn kah lín chò-hóe, khò lán ê Chú I-é-su ê koân-lêng,
5:5 Kā hit khoán lâng ê seng-khu kau hō͘ Sa-tán khì húi-hoāi i ê jio̍k-thé, thang hō͘ i ê lêng-hûn tī lán ê Chú I-é-su chài-lîm ê ji̍t-chí tit-kiù.
5:6 Lín ê khoa-kháu chin m̄-hó, lín kám m̄-chai tām-po̍h-á kàⁿ-bó ē kā kui-sn̂g ê mī-hún-chhè hoat khí-.lâi?
5:7 Kū ê kàⁿ tio̍h tû hō͘ chheng-khì, hō͘ lín chiâⁿ-chò sin ê mī-hún-chhè. Kî-si̍t lín sī bô-kàⁿ ê chhè, in-ūi lán Pôaⁿ-kòe-cheh ê iûⁿ-ko — Ki-tok í-keng ūi lán hi-seng ā.
5:8 Só͘-í, lán m̄ thang ēng pháiⁿ-sim ok-to̍k ê kū kàⁿ-bó, tio̍h ēng sûn-choân chin-si̍t ê bô-kàⁿ piáⁿ chò chè-mi̍h lâi siú cheh.
5:9 Í-chêng góa kià hit-tiuⁿ phoe hō͘ lín, ū kā lín kéng-kài m̄ thang kah îm-loān ê lâng lâi-óng.
5:10 Góa m̄ sī teh chí sè-kan hiahê îm-loān, tham-sim, chà-khi á-.sī pài ngó͘-siōng ê lâng; nā-sī ánne, lín soah tio̍h lī-khui sè-kan chiah ū khó-lêng.
5:11 Chóng-.sī, taⁿ góa siá chit tiuⁿ phoe hō͘ lín, sī beh kóng, m̄ thang kah hiahê chū-chheng sī Ki-tok-tô͘, khiok sī îm-loān, tham-sim, pài ngó͘-siōng, húi-pòng, hò͘ⁿ-chiú, chà-khi ê lâng lâi-óng, liân kah chit khoán lâng kâng toh chia̍h pn̄g mā m̄ thang.
5:12 Phoe-phòaⁿ kàu-hōe gōa ê lâng m̄-sī góa ê tāichì, Siōng-tè ē kā in sím-phòaⁿ.
5:13 Lín kám m̄-sī tio̍h phoe-phòaⁿ kàu-hōe lāi ê lâng? Keng-tián ū kì-chài, Lín tio̍h kā siâ-ok ê lâng tùi lín tiong-kan kóaⁿ chhut-.khì. (chù, SBK 17:7; 19:19; 22:21,24; 24: 7)
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。