罗马书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
16:1 Thui-chiàn Hui-bé Chí-mōe
Góa kā lín thui-chiàn lán ê chí-mōe Hui-bé, i sī Kian-khu-lia̍h kàu-hōe ê chip-sū.
16:2 Chhiáⁿ lín chiàu sìn-tô͘ ê pún-hūn, ūi tio̍h Chú ê iân-kò͘ chiap-thāi i. I nā ū su-iàu, chhiáⁿ lín kā i pang-chān, in-ūi i bat hû-chō͘ chin chē lâng, pau-koat góa pún-sin.
16:3 Hiòng Lô-má ê Ki-tok-tô͘ Chhéng-an
Chhiáⁿ thè góa kā Ki-tok I-é-su ê tâng-kang — Pu-lí-su-ki-lah kah A-ku-lah chhéng-an.
16:4 In bat ūi tio̍h góa mō͘ sèⁿ-miā ê gûi-hiám. M̄-nā góa, liân gōa-pang ê kàu-hōe mā lóng tio̍h kā in kám-siā.
16:5 Mā chhiáⁿ kā tī in tau teh chū-hōe ê kàu-hē chhéng-an, chhiáⁿ thè góa kā só͘ thiàⁿ ê Ê-pai-né-toh chhéng-an, i sī A-si-a séng thâu chi̍t-ê sìn Ki-tok ê lâng.
16:6 Mā chhiáⁿ kā Mâ-lí-ah chhéng-an, i bat ūi tio̍h lín siū chin chē lô-khó͘.
16:7 Koh chhiáⁿ kā góa ê chhin-chiâⁿ An-to-nî-kó͘ kah Iû-nî-a chhéng-an, in bat kah góa tâng-chê siū koaiⁿ-kaⁿ, tī sù-tô͘ tiong-kan ū bêng-bōng, pí góa tāi-seng kui-sio̍k Ki-tok.
16:8 Chhiáⁿ thè góa kā tī Chú lāi góa só͘ thiàⁿ ê Am-phu-li-à-toh chhéng-an.
16:9 Chhiáⁿ lín kā tī Ki-tok kah góa tâng lô-khó͘ ê U-ba-nô͘, í-ki̍p góa só͘ thiàⁿ ê Su-ta-khù chhéng-an.
16:10 Chhiáⁿ lín kā tī Ki-tok siū-kòe khó-giām ê A-pe-leh chhéng-an.Chhiáⁿ lín kā Alísutobúloh chi̍t ke lâng chhéngan.
16:11 Chhiáⁿ Kā góa ê chhin-chiâⁿ Hi-lô-tióng chhéng-an, mā kā Nâ-ki-sò͘ chhù lāi sìn Chú ê lâng chhéng-an.
16:12 Chhiáⁿ thè góa kā ūi tio̍h Chú siū chin chē lô-khó͘ ê Tu-hoâi-ná kah Tú-hó-sah chhéng-an, mā kā só͘ thiàⁿ ê Pe̍h-sí-suh chhéng-an, i bat ūi tio̍h Chú lô-khó͘ kang-chok.
16:13 Chhiáⁿ kā siū Chú kéng-soán ê Ló͘-ho͘h kah i ê lāu-bú chhéng-an, i ê lāu-bú mā sī góa ê lāu-bú.
16:14 Chhiáⁿ kā A-sūn-kî-tó, Hu-lé-gòng, He̍k-mé, Pat-lô-bah, He̍k-má, í-ki̍p kah in chò-hóe ê hiaⁿ-tī chhéng-an.
16:15 Chhiáⁿ kā Hui-lô-ló-gò͘ kah Iû-lī-a, Nê-lé-iù kah i ê chí-mōe kah O͘-lúm-pah, í-ki̍p kah in chò-hóe ê chèng sèng-tô͘ chhéng-an.
16:16 Lín tio̍h ēng sèng-kiat ê lé-gî hō͘-siong chhéng-an. Ki-tok ê chèng kàu-hōe lóng kā lín chhéng-an.
16:17 Khoàn-bián M̄-thang Hun-lia̍t
Hiaⁿ-tī chí-mōe, lín tio̍h thê-hông chè-chō hun-lia̍t á-.sī hō͘ lín hoān chōe, ûi-pōe lín só͘ niá-siū ê kà-sī ê hiahê lâng.
16:18 In-ūi chit khoán lâng m̄-sī teh ho̍k-sāi lán ê Chú Ki-tok, sī teh kò͘ kakī ê pak-tó͘. In ēng hoa-giân khá-gí bê-he̍k láu-si̍t lâng ê sim.
16:19 In-ūi chèng lâng lóng chai lín ê sūn-ho̍k, só͘-í, góa ūi tio̍h lín hoaⁿ-hí. M̄ koh, góa ài lín tùi hó sū tio̍h khiáu, tùi pháiⁿ tāi tio̍h ū tì-hūi.
16:20 Sù pêng-an ê Siōng-tè chin kín chiū ē kā Sa-tán ta̍h chhùi, hō͘ i khut-ho̍k tī lín ê kha chêng. Goān lán ê Chú I-é-su Ki-tok ê un-tián kah lín tông-chāi!
16:21 Páu-lô Tâng-kang ê Chhéng-an
Góa ê tâng-kang Tî-mó͘-theh kah góa ê chhin-chiâⁿ Lō͘-kioh, Iá-sùn, Só͘-si-pá-toh kā lín chhéng-an.
16:22 Góa —Té-tioh, to̍h-sī chit tiuⁿ phoe ê tāi-pit-jîn, tī Chú lāi kā lín chhéng-an.
16:23 Chiap-thāi góa kah choân kàu-hōe ê Gâ-io̍h kā lín chhéng-an.
16:24 Siâⁿ lāi koán khò͘-pâng ê Ê-lá-su-toh kah lán ê hiaⁿ-tī Koah-toh kā lín chhéng-an.
16:25 Kiat-bóe ê Kî-tó
Goān êng-kng kui hō͘ Siōng-tè! I ē chiàu góa só͘ thoân ê hok-im, to̍h-sī soan-iông I-é-su Ki-tok, lâi kian-kò͘ lín ê sìn-sim. Chit-ê hok-im to̍h-sī bān-kó͘ í-lâi só͘ ún-ba̍t ê ò-pì.
16:26 Taⁿ chit-ê ò-pì í-keng chiàu éng-oán oa̍h ê Siōng-tè ê kài-bēng, thong-kòe sian-ti ê chheh hián-bêng chhut-.lâi, thang ín-chhōa bān-bîn lâi sìn koh sūn-ho̍k chit-ê hok-im.
16:27 Goān êng-kng thong-kòe I-é-su Ki-tok kui tī to̍k-it choân-tì ê Siōng-tè, ti̍t-kàu éng-oán. A-men!
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。